Atez atearen aurkako plataforma: “Udal Gobernuaren jarrerarekin dezepzionatuta atera gara bileratik”

Plataformako kideak, prentsaurrekoaren ondoren

‘Birzkiplana bai, Atez Atekorik ez’ plataformako kideek bilera izan dute gaur goizean Iñaki Agirrezabalaga alkatea eta Maitane Agirre zinegotziarekin. Beraiekin zeramatzaten kudeaketa sistema horren aurka orain artean bildu dituzten 3.806 sinadura, eta horiek ematen dieten “zilegitasuna”. Bilera ondoren deitu duten prentsaurrekoan azaldu dutenez, “dezepzionatuta atera dira bileratik, Udal Gobernuak erakutsi duen jarrerarekin”.

Plataformako kideek azaldu dutenez, bi eskaera zuzenekin joan dira bilerara: “Atez ateko sistemaren ezartzea bertan behera uztea, eta gaur egungo edukiontzien sistema sustatzea, eta bosgarren edukiontzia erabiltzeko aukera herritarrei erraztea”. Alkateak erantzun zuzenik eman ez diela salatu dute. “Udazkenean erantzungo digula esan du. Ezin gara udazkenera arte zain egon, sistema hau ezartzeko prozesua dagoeneko abian dago eta. Pentsatzen dugu kalkulu politikoa dela, eta iruditzen zaigu protesta hau diluitu nahi dutela”.

Atez atekoaren birziklatze maila bera bermatzen duen sistema bat aurkezteko eskatu omen die alkatea.“Esan digu beharrezkoa dela %80ko birziklatze maila bermatzen duen sistema bat ezartzea, eta Atez atekoa dela kopuru hori ziurtatzen duena. Neurri horietara heltzen den beste sistema bat aurkezten badugu, prest dagoela hitz egiteko. Ez hori bakarrik, erraustegirik egingo ez dela bermatzen duen sistema bat izan behar omen du. Gu herritar batzuk gara; ez gara politikoak. Ez da gure ardura erantzun horiek ematea; ez dugu joko politiko batean sartu nahi. Zumaiako bilketa sistemaz gaude arduratuta, eta ez dugu gure bizkar gainean erraustegiaren karga hartu nahi”.

Bosgarren edukiontziaren erabilera indartu behar delakoan daude: “Birziklatzearen alde gaude. Asko gara hondakinak gaika sailkatzen ditugunak; batzuk aspalditik, gainera, eta neurri batean kopuru horiek lortu daitezkeela uste dugu”.

Horretarako herritarrak kontzientziatzea beharrezkoa ikusten dute, eta baita bosgarren edukiontzia erabiltzeko oztoporik ez jartzea. “Edukiontzi hori erabili nahi zuten herritar batzuei oztopoak jarri zaizkie: Udalak edota Mankomunitateak ez diete giltzarik eman nahi izan”. Horren harira, eta jasotako sinaduraz ohartuta, alkateak zer esan omen die: “Hurrengo hilabeteetan birziklatutako gaien datuak gora egin behar dutela, eta Mankomunitateari adi egoteko esango diola. Hori joko zikina da, tranpa. Jasotzen diren hondakinen %50 organikoa da, eta herritar askoei ez zaie bosgarren edukiontzia erabiltzen uzten. Aukera hori eman behar zaie herritarrei”. “Gure ustea da ez daudela birziklatzearen alde, atez atekoa ezartzearen alde, baizik”.

3.806 sinadura

Aste hauetan Atez ateko sistemaren aurkako 3.806 sinadura jaso dituzte. “Notarioak ontzat hartu ditu sinadura hauek eta hori ziurtatzen duen dokumentua dugu”. Kopuru hau udal hauteskundetako hautesle erroldaren (7.333) %51,9 dela diote, eta hauteskunde horietan emandako boto guztien (4.806) %79. Sinadurak biltzeko kanpainarekin jarraitzeko asmoa dutela gaineratu zuten.

Plataformak Mankomunitatearekin (eskatu dute, baina erantzunik ez omen dute jaso oraindik) eta Udaleko gainontzeko alderdi politikoekin biltzeko asmoa dute. Horretaz gain, blog bat ere martxan jarri dute: plataformazumaia.blogspot.com.