“Lixto, lixto! Bukatu da! Jarri handi handian Beñat aske dela!”, esan digu pozez gainezka Beñat Lizeagaren ama Mari Begok, telefonoa hartu orduko. Gaur gauean etxera ekartzea espero dute.“Gaur goizeko 9:20an eman digu albistea Onintza Ostolaza abokatuak, eta emozioari eutsi ezinik gaude. Gaur gauean etxera ekarriko dugu Beñat!. Donostiako epaitegira bidean harrapatu du Mari Bego. “Epaitegira gatoz, 30.000 euroko bermea ematera. Ondoren Madrilera joango gara eta espetxetik atera bezain pronto Zumaiara. Abiatzen garenean abisatuko dugu! Beraz, gauzak ondo bidean, gaur gaualdean izan daiteke Beñat Lizeaga berriro etxean.
Beñatekin batera aske geldituko dira Xalbador Ramirez, Aitziber Plazaola eta Bergoi Madernaz, denak ere 30.000 euroko fidantza ordainduta, eta epaiketaren zain.
