Langile bat hil da gaur goizaldean Zumaiako Okin enpresan.
Gorka Ramosek zortzi hilabete zeramatzan Okin enpresak Korta Industrialdean duen Artadi Alimentación lantegian lan egiten –Oronan egin zuen lan aurretik–. Ogia egiten dute bertan, eta hondakinak bildu –saltzeko balio ez duten ogiak, orea…– eta edukinontzietara eramatea zen Gorkaren zeregina. Oraindik argitzeko dauden arrazoiengatik, bart gauean, hondakinez betetako edukinontzi horietako batean zendu da. Enpresako segurtasun kameretako irudiak aztertuta, ikusi dute Gorka Ramos atzo gaueko hamabiak laurden gutxi aldera joan zela edukinontzira, eta berta sartu edo erori zela. Edukinontzi barruan zer gertatu zen, kamerek ez dute jaso. Bideoan dauzkazue Langile Batzordeko presidente Iñaki Benaventek (ELA) eman dituen azalpenak –gazteleraz daude–.
Udalaren oharra
Jakin ahal izan dugunez, ez da ohiko prozedura langilea edukinontzian sartzea, ez da bere zereginetan sartzen. Hondakinak garraiatu eta edukinontzira botatzeko langileak ibilgailu bat erabiltzen baitu. Dena den, enpresako iturri batek azaldu digunez, noizean behin edukinontzira igo eta barruko hondakinak zapaltzen dituzte, “lekua egiteko, edota sortzen diren gas burbuiluak makil batekin lehertu, bolumena jaisteko”.
Horrelako edukinontzi batean gertatu da ezbeharra.
Ramos edukinontzi barrura bere kabuz sartu edo erori ote den, Osalanek martxan jarri duen ikerketak argitu beharko du. Azaldu digutenez, edukinontzi barruko hondakinak hatzitu egiten dira, gas burbuilak sortzen dira, eta bertan harrapatuta gelditzeko arrisku handia dago.
Edukinontziek lau aho dituzte; normalean bi izaten dituzte zabalik.
Ohi baino gehiago atzeratzen ari zela ikusirik, lankideak bila hasi dira, goizaldeko hirurak aldera edukinontzi barruan zegoela ohartu diren arte. Laguntzen saiatu dira, baina ordurako hilik zegoen. Laguntzen saiatu diren 11 lagun artatu dituzte, gasa arnastu dutelakoan, baina denak etxean dira jada, bat izan ezik. Oraindik erietxean dago, baina ez gasa arnasteagatik, irinari alergia diolako baizik. Dirudienez, laguntzen ari zela ohi baino irin gehiago arnastu du.
Produkzioa eten dute 24 orduz
Lantegiko 150 langileek produkzioa 24 orduz etetea erabaki dute, eta bihar goizeko 11:00etan elkarretaratzea egingo dute enpresaren aurrean. ELAko ordezkari Iñaki Benaventek azaldu duenez, “langileak lur jota daude. Gure produkzioa ezin da une batetik bestera eten, eta lanean jarraitu behar izan dugu, negar malkotan, lankide bat hil dela jakin arren. Dagoeneko eten dugu, 24 orduz”. Benaventek azpimarratu du “mutil alaia eta oso jatorra” zela Gorka Ramos.
Osalanen ikerketa
Osalanek jadanik zabaldu du ikerketa, eta gaur arratsalderako ziurrenik prest izango du lehen txostena.
