Plenoak atzera bota du “birziklapena bai, atez atekorik ez” mozioa

Udal Gobernuaren ezezko zazpi botoekin, Plenoak ez du onartu EAJk eta PSEk herri plataformaren alde aurkeztutako mozioa. Aretoa jendez gainezka, giroa bero-bero, Udal Gobernuko zinegotzien kontra “diktadoreak, faxistak!” gisako oihuak entzun ziren zenbait unetan.

• EAJren oharra: “Udal Gobernu honek pleno honetatik ondorioak atera beharko lituzke”

• Ezker Abertzalea, EA eta Aralarren oharra: “Desgaste politikoa egitea da alderdi batzuen helburua”

• Udal Gobernuaren oharra: “Zenbaitek egindako irainak, mehatxuak eta errepestu faltak tokiz kanpo daude”

• EAJren oharra (2): “Tinko gaitzesten ditugu plenoan izandak irainak, mehatxuak eta errespetu faltak”

Udal pleno bat jarraitzeko gutxitan bezalako jendetza bildu zen atzo udaletxeko areto nagusian. Hondakinen auziak hautsak harrotu ditu herrian, eta atzo EAJk eta PSEk aurkeztutako “birziklapena bai, atez atekorik ez” mozioa zen eztabaidatzekoa.

EAJko bozeramaile Montse Aranak azaldu zuen mozioaren edukia. Atez atekoa inposatu nahi izatea eta herritarren iritzia aintzat ez hartzea egin zion kritika Udal Gobernuari. “Parte hartzeaz hitz egiten duzu baina gero ez da betetzen. Inposaketarekin ez goaz inora. Jendea hezitu egin behar da. Eta zumaiarrek erakutsi dute badakitela birziklatzen: Udal Elkarteak emandako datuen arabera, 2011n gora egin du bilketa selektiboaren portzentziak”. Horrez gain, nabarmendu zuen herritarrek badutela birziklatzeko borondatea, kanpainak behar bezala egiten badira: “2011n 69 lagunek eskatu zuten giltza; 2012an, bi astean, mila lagunek, plataformak egindako lanari esker”. Hori guztia dela eta, atez ateko sistema ezartzeko prozesua bertan behera uzteko eta edukiontzien bidezko gaikako bilketa sistema sustatzeko eskatu zuen.

“Erabakitzeko eskubidea eskatzen du Bilduk: bada, ezin da gauza bat eskatu eta gero kontrakoa egin”, salatu zuen PSEko ordezkari Emiliano Cabañasek. “Udal Gobernuak aintzat hartuko ditu lau mila herritarren sinadurak edo ez?”

Ingurumen zinegotzi Aitor Leiza (Aralar): “Gaur egun, guztira, %35 birziklatzen da. Egun hauetan organikoa bereizteko banatu diren ontzi guzti horiekin espero dut aurrerantzean datuak askoz hobeak izango direla… Eta bestetik, parte hartzeko aukera izan da”.

Iñaki Agirrezabalaga alkateak hartu zuen hitza ondoren. Birziklatzea ez dela eskubidea, betebeharra dela azpimarratu zuen, eta atez ateko sistemarekin lortu direla emaitzarik onenak. “Eta atez atekoa ez da sistema itxi bat: herri bakoitzaren ezaugarrien arabera, teknikoki egokitu daitekeen sistema da”.

Montse Aranak eskatu zuen mozioan planteatzen diren bi eskaerei lotzeko eztabaida –publikoaren txalo zaparrada–, eta Emiliano Cabañasek ere bide beretik hitz egin zuen: “Herriak esan du ez duela nahi atez ateko sistema, eta Udal Gobernuak erantzuna eman beharko luke. Bestetik, herritarrei eskatzen diegu bosgarren edukiontzia erabiltzeko, eta Udalari sustatzeko. Ez dakigu sistema horrek zer eman dezakeen, orain arte ez delako behar bezala bultzatu. Ahalegina egin ondoren emaitzak aztertu beharko dira eta ikusi helburuak betetzen diren edo ez, aldatu edo hobetu behar den, baina proba egin eta gero”.

Aitor Leizak jarraitu zuen eztabaidarekin: “Ez dugu zalantzan jartzen tailer batek ezin duela oliorik isuri erriora, baina guk lasai asko kutsa ditzakegu gure mendiak zaborrarekin”. Eta ondoren plataformari zuzendu zitzaion: “Plataformari eskaini zitzaion sistema alternatiboa aurkezteko aukera, eta uko egin zion, esanez hori politikoen lana dela”. Publiko artetik “gezurra!, gezurra!” oihuak entzun, eta giroa berotzen hasi zen. Alkateak errespetua eskatu eta horrela erantzun zuen herritar batek: “Errespetua herritarroi ere bai, gezurra esaten ari zarete eta!”.

Leiza: “Zuek diozue ez nahasteko hondakinen bilketa eta errauskailua, bi gauza ezberdin direla. Errauskailua Arroan jartzea proposatu zenean, sekulako zalaparta sortu zen; beraz, gai honek badu zerikusirik errauskailuarekin. Errauskailuarik gabeko alternatiba bat badaukagu, Alduntzinek aurkeztu zuena, hain zuzen ere”. Berriro oihuak publikotik: “Diktadoreak, fatxak!”.

Alkateak azaldu zuen kanpotik gauzak beste modu batera ikusten dituztela, eta gogorarazi Espainiako Ministeritzak “modelikotzat” jo duela Usurbilgo eredua. Publikotik erreakzioa: “Orain Espainia, komeni zaizuenean!”.

EAJko Ana Arranzek hartu zuen ondoren hitza: “Erabakia herriak hartu behar du, eta ez da biderik jarri hori gauzatzeko. Ezer inposatu baino lehen, eman aukera herriari iritzia eman dezan, eta, entzun ondoren, hartu erabakia. Denborak arrazoia eman digu: herriari ez diozue aukerarik eman eta inoiz ikusi ez bezalako herri mugimendua sortu da, eta 4.000 sinadura bildu ditu”. Eta horrela amaitu zuen: “Gaur egun edukiontzi berdera nahasirik botatzen duguna gaika biltzeko sistema bat bilatu behar da”.

Azkenengoz, Aitor Leizak hartu zuen berriro hitza: “Atzera buelta daukan erabakia da gurea; EAJk inori kontsultatu gabe hartutako hainbat erabakik ez dute atzera bueltarik”. Eta horrela amaitu zuen, jendearen oihuen artean: “Eta herritarren plataformaz hitz egiten da, baina EAJk sortutako plataforma da”. Giroa erabat sutu zen orduan.

Plataformak hartu zuen hitza

Herritarren artetik hitza eskatu zuen Oier Kortak, Plataformaren izenean. Alkateak hitz egiteko aukera eman zion. Horrela hitz egin zuen: “Aitor Leizak esan du guk uko egin geniola alternatiba bat aurkezteko aukerarik. Hori gezurra da. Guk eskatu genuen moratoria bat, galdetu genuen ea prest zeundeten. Esan zenuten ezetz. Gero, alkateak esan zigun udazkenean emango zigula erantzuna. Udazkenean? Eta bitartean? Zuei benetan interesatzen zaizue birziklatzea edo egutegi politikoari begira zaudete? Gu elkarrekin lan egiteko prest gaude, baina 4.000 herritar horien sinadurak errespetatu. Bestetik, ni ez naiz EAJko afiliatuta. Plataforman sartu nintzen 2008tik birziklatzen dudalako”. Eta horrela amaitu zuen: “Oraintxe daukazue aukera demostratzeko zer demokratak zareten. Alferrik da kalean parte hartzeaz hitz egitea eta demokrazia orain! eskatzen duten pankartak jartzea” .

Tentsio handia izan zen bozkatzeko orduan ere. EAJk eta PSEk mozioaren aldeko botoa eman zuten. Aitor Leizak ezezkoa eman zuenean, publikotik herritar batek salaketa gogorra egin zion zinegotziari: “Zenbaten truke, Aitor, zenbaten truke?”. Oihu artean, Bilduk ere kontrako botoa eman zuen. Beraz, plenoak ez zuen mozioa onartu.