laino guztien gainetik

Aste honetan nabarmenena tenperaturaren gorakada izan da. Lehengo astean elurra ere egin zuen gutxi bada ere. Aste honetan tenperatura maximoak 20 ºC-ko muga gainditu du,  hego haizearen laguntzarekin, beraz ederra diferentzia.

Asteburu honetan , bai ostiralean eta baita larunbatean ere, hego haizea izango da nagusi, eta haize honekin badakigu zer gertatzen den, hodei ugari zeruan, euri aldetik ia ezertxo ere ez eta tenperatura oso epelak. Tenperatura maximoa berriro ere 20 ºC-ren bueltan ibiliko da eta minimoa 15 ºC-ren bueltan. Gainera haizea nahiko zakar ibiliko da momentu batzutan.

Igadean ordea, aldaketa txiki bat emango da. Haizea mendebaldetik ibiliko da eta horrekin batera fronte batek euri pixka bat lagako digu, bereziki goizean zehar. Arratsalde bukaeran berriro ere hobera egingo du. Tenperaturaren beherakada ere nabarituko dugu, maximoa 14 ºC-ren bueltan geratuz.

Beraz, asteburu osoa kontuan hartuz ezin gara gehiegi kexatu.  

Bete betean gaude murgildurik beste hotzaldi batean, negu honetan askotan gertatu den bezala, baina ikusten zaio akabera. Gaur eta bihar hotza egiten jarraituko du, baina pixkanaka tenperatura hasiko da errekuperatzen. Dena den, antizikloia guregana etortzen igandean hasiko da, eta gainera bere ibilbidean, larunbatean, ipar haizea eta fronte bat ekarriko dizkigu.

 Beraz, larunbatean egun euritsua izatea espero dut. Goiz goizetik hasita euria nagusituko da eta ipar haizea bizi bizi ibiliko da. Gainera, tenperatura oraindik ere hotza izango da eta maximoa 7 ºC-ra bakarrik iritsiko da. Laburtuz egun traketsa.

Igandean ordea, eguraldiak nabarmen egingo du hobera, bereziki arratsaldean. Oraindik ere goizean hodeiak izango dira nagusi eta ezin da baztertu euri pixka bat egitea, nahiz eta oraintxe bertan euria egiteko aukera txikia den. Tenperatura ere egunean zehar gorantz joango da maximoa 10 ºC-ra hurbilduz.

Datorren aste hasieran aspaldiko partez giro eguzkitsua nagusituko da, antizikloia gain gainean ipiniko baita.

Hego haizea dabil agintari aste osoan eta gainera momentu batzutan gogor jotzen ari da.

 Astebururako egoera berezia daukagu gure aurrean. Atlantikoan Penintsularen hego mendebaldean ziklogenesi prozesu bat gertatuko da probabilitate handiarekin ostiral gauean eta azkar asko sakonduko da, bapateko ziklogenesia izan daitekeelarik. Horrek zikloi sakon bat sortuko du eta Galizia aldetik pasako dela ematen du. Momenturik sakonenean 970 mb-ko presioa izan dezake bere erdigunean. Horrek hego aldeko haize bolada bortitzak sortu ditzake Euskal Herri osoan eta baita ere Zumaian. Dena den bere ibilbidea oraindik ere zehazteko dago eta aldaketa nabariak eman daitezke. Beraz, iragarpenen jarraipen bat egitea komeni da.

Oraintxe bertan ditugun datuekin hauxe gertatu daiteke.

Larunbatean zeruan hodeiak izango dira nagusi, baina ostarteak ere zabalduko dira. Euri pixka bat egin dezake baina ezer gutxi. Aipagarriena haizea izango da. Goizean hego-ekialdeko haizea ibiliko da eta bolada gogorrak eman daitezke, 80 km/h-koak, baina okerrena arratsaldeak aurrera egin ahala etorriko da. Orduan hego-mendebaldeko haize boladek 120 km/h-ko abiadura gainditu dezakete. Hori horrela mantenduko da igande goizaldean ere. Gero igandean gauzak bere onera bueltatuko dira. Bestalde, larunbatean tenperatura oso altua izango da 22 ºC inguruan geratuz maximoa.

Igandean hodeiak eta ostarteak tartekatuko dira, euri pixka bat egitea baztertu gabe. Tenperatura jaitsi egingo da eta maximoa 15 ºC-tan geratuko da eta haizea mendebaldetik ibiliko da, goizaldean oso zakar, baina egunak aurrera egin ahala indar gutxiagorekin.

Iragarpen guztia zikloi horren ibilbidearen eta sakontze prozesuaren menpe dagoenez, iragarpen berrien jarraipena egitea komeni da.

Beraz, kontuz haizearekin asteburuan.

Laga dugu atzean hotzaldia eta orain beste egoera batean murgildurik gaude. Tenperatura pixkanaka bere onera bueltatzen ari da eta horrelaxe jarraituko du hurrengo astean ere. Egoera berri honetan euri askorik ez da ikusten, beharbada aipagarriena hego haizea izango da, zeren eta momentu batzutan gogor joko du.

Bihar ipar-mendebaldeko haizea nagusituko da eta horrekin euria eta tenperaturaren beherakada etorriko dira.

Larunbat goizean oraindik ere euria egingo du, baina pixkanaka haizea mendebaltzen joango da eta arratsalderako atertu egingo du, hego ikutuko haizearekin. Baliteke goizaldean zaparrada trumoitsuren bat izatea (ostiral arratsaldean ere arrisku hori hor egongo da). Tenperatura fresko samarra, maximoa 11 ºC-ren bueltan.

Igandean aipagarriena haizea izango da. Hego haize zakarra espero da, bolada oso gogorrekin, 100 km/h-ko muga ere gainditu daiteke, bereziki arratsaldean. Haize honekin hodeiak ibiliko dira zeruan, ostarteak ere zabaldu daitezke, baina euria egitea zaila izango da. Tenperatura zertxobait igoko da, maximoa 13 ºC-koa izango baita, baina haize horrekin hotz sentzazioa areagotu egingo da.

Laburtuz, atzean laga dugu hotzaldia eta oraingo egoera berrian tenperatura epelagoak izango ditugu.

Iritsi zaigu berriro ere beste hotzaldi bat. Antizikloiak Islandia hegoaldean kokatuta Europan zehar aire masa oso hotza garraiatuko du Euskal Herrira. Gainera hotza gurekin geratuko da asteburu osoan, beraz ihauteriak ospatzeko giro hotza (mozorratzeko erropa ugari jantzitzea hobea izango da).

 Prezipitazio aldetik bihar izango da egunik garrantzitsuena eta horrexegatik elurra egiteko aukera handiak ikusten ditut. Egia da, azkenengo hotzaldian ez zuela zuritu, baina bihar berriro ere aukera hori hortxe egongo da. Benetan egun oso hotza izango da, tenperatura minimoa 0 ºC-koa izango da eta maximoa 3 ºC-koa bakarrik. Txingorra bezalako elurra egin dezake, baina malutak erortzea ere ezin da baztertu. Egun osoan egongo da elurra egiteko aukera eta zuritzekoa ere bai. Gainera, bi ezegonkortasun lerro pasako dira eta beraz elurte polit bat ikusteko aukera izan dezakegu. Beharbada, 10 zentimetro pilatu daiteke. Dena den, kostaldean beti ere zailtasunak izaten dira zuritzeko itsasoa hor baitago eta beraz, ikusiko dugu baina aukera handia dagoela ezin dezaket uka.

 Gerora eta asteburuari begira, hotzak gurekin jarraituko du, baina prezipitazioa asko murriztuko denez, ez da espero zuritzea. Beraz, ihauterietan hotza eta noizbehinka beharbada elur maluta bat edo beste baina garrantzi gutxikoa. Termometroetan merkurioa ez da 3-4  ºC-tik gora joango, eta minimoak negatiboak ere izan daitezke -1 ºC ingurukoak. Kriston hotza.

Larunbatean euria egingo du, baina aurreko asteburuarekin konparatuz askoz ere gutxiago.

Zirkulazio zonal baten barnean gaude eta horrek esan nahi du mendebaldeko haizea ibiliko dela. Gaur eta bihar hego ikutuarekin, eta beraz ia ez du euririk egingo.

Larunbatean berriz, ipar-mendebaldeko ikutu bat hartuko du eta hori nahikoa izango da hodeiak eta euria nagusitzeko. Tenperatura fresko baina garai honetarako egokia, maximoa 13 ºC inguruan geratuko da.

Igandean antizikloia gure gainean jarriko da eta horrek hobekuntza nabarmena ekarriko du. Beharbada, goizaldean hodei batzuk geratuko dira, baina goizean zehar eguzkia nagusituko da. Dena den, goi eta erdi-mailako hodeiak agertuko dira eta zerua zuritzea lortuko dute, bereziki eguerditik aurrera. Hala ere, ateri eutsiko dio egun osoan. Tenperatura oso atsegina izango da, maximoa 14 ºC ingurukoa.

Euria izango da protagonista gaur arratsaldetik aurrera eta asteburu osoan zehar. Euri asko egitea espero da. Tenperatura aurreko egunetan izan dugunarekin konparatuz epelagoa izango da, baina hala ere hotza egingo du. Ipar-mendebaldeko haizea ibiliko da indarrez, bereziki bihar, ostirala, bolada zakarrekin, baina asteburu osoan ere hortik etorriko zaigu haizea eta beraz, iturria irekita geratuko da. Hortik, fronte ezberdinek zeharkatuko dute gure lurraldea, euria ekarriz. Litro dexente pilatzea espero dugu, lau egunetan 100 mm inguru eta hori asko da.

Bai larunbata eta bai igandea nahiko berdintsu. Bi egunetan zerua goibel egongo da eta euria egingo du gogotik. Haizea ipar-mendebaldetik eta tenperatura hotza. Tenperatura maximoak 10 ºC-ren bueltan geratuko dira eta minimoak 5 ºC-ren bueltan.

Beraz, euria protagonista asteburu osoan.

Gaur eta bihar ateri eutsiko dio, baina larunbatean berriro ere euria iritsiko zaigu. Ematen du depresio bat Penintsulatik pasako dela, mendebaldetik ekialdera.

Larunbatean hego haize ikutuarekin hasiko dugu eguna, baina pixkanaka haizea aldakor geratuko da eta azkenerako iparrak ere sartuko du muturra. Horrela, goizean zehar ateri eutsiko dio, baina arratsaldean hodei sendoagoak iritsiko zaizkigu eta euria egingo du arratsalde bukaerarako edo gauerako. Tenperatura oraindik nahiko atsegina izango da, maximoa 14 ºC-ren bueltan geratuko delarik.

Igandean ipar haizea nagusituko da eta euria egingo du, bereziki goizaldean eta goizean. Litekeena da igande arratsaldean arintze aldera egitea. Tenperatura jaisten hasiko da eta maximoa 10 ºC-ren bueltan geratuko da.

Hurrengo astearen hasieran Europatik aire hotza iristeko probabilitatea dago, nahiz eta oraindik ezin den zihurtatu. Kasu horretan tenperaturaren beherakada areagotu egingo da eta hotza izango da aipagarriena. Dena den, aire masa nahiko lehorra izango denez, prezipitazio aldetik gauza gutxi izango litzateke.

Hotzaldiaren ondoren tenperatura etorri da bere onera eta horrelaxe jarraituko du baita ere asteburuan. Gaur depresio sakon bat pasako da Kantauri osoa zeharkatuz eta aipagarriena horrek eragingo duen haizetea izango da. Bereziki, eguerdi partean 100 km/h-tik gorako boladak eman daitezke. Gainera zaparrada mardulak ere izango ditugu ipar-mendebaldeko haize zakar horrekin.

Bihar gauzak baretu egingo dira eta egun polit bat geratuko da, prezipitaziorik gabe eta egun eguzkitsua orokorrean. Haizea aldakor hasieran baina pixkanaka hego ikutua hartuko du eta bukaerarako indartu ere egingo da.

Larunbatean hego haizea izango da nagusi. Hodeiak izango ditugu zeruan baina euria egitea zaila izango da. Beharbada, tantaren bat eror daiteke arratsaldean. Hego haizearekin tenperaturak gora egingo du eta maximoa 15 ºC-ren bueltan geratuko da.

Igandean goizean zehar euri pixka bat egin dezake ipar-mendebaldeko ikutua hartuko baitu haizeak, baina antizikloia guregana etorriko denez, arratsaldean hobera egingo du eta ostarteak irekiko dira, gero eta zabalagoak orduak aurrera egin ahala. Tenperatura larunbatean baino freskoago, baina hala ere atsegina, 12 º C-ren bueltan.

Beraz, asteburuan eguraldia ez da albiste izango eta egoera normal horren baitan tenperatura atseginak eta euri pixka bat izango ditugu.

Hasi da aire masa hotza iparraldetik guregana iristen eta gaurtik aurrera hotza izango da gure artean gutxienez igandera arte. Egun hotzena larunbata izango da tenperatura minimoa -1 ºC eta maximoa 2ºC.

Elurra ere apostu egin beharko banu baietz esango nuke, baina ez gaur. Elurra bihar arratsaldean hasiko da eta bazterrak txurituko dituela pentsatzen dut. Larunbat goizean esnatzerakoan hondartzak eta kaleak zuri ikusiko ditugula uste dut. Gero larunbatean zehar ere elurra egiten jarraituko du. Elur geruza zehaztea zaila da, baina esango nuke 10 cm-ko geruza izan dezakegula.

 Laburbilduz bihar eta etzi izango dira egunik okerrenak eta elurra ere egingo du, gainera zuritu ere bai (hori espero dut nik). Hortaz aparte hotz handia, tenperatura maximoak asteburu osoan ez dira 3 ºC-tik pasako eta minimoak 0 eta -1ºC bitartean. Gainera, gaur arratsaldean eta bihar haizea indarrarekin ibiliko da eta horrek hotz sentsazioa areagotu egingo du.