Giro lasaiagoa esaten dut, zeren eta pasa ditugun gauzak pasa ondoren, bapateko ziklogenesia eta euri kontuak, asteburua ez da eguzkitsua izango, baina egoera zailik ez da espero.
Bihar ez du euririk egingo eta tenperatura altuak espero dira, maximoa 20 ºC-ra hurbilduko da eta goizean eguzkia ikusiko dugu, arratsaldean hodeiak ugarituz. Hego haizea ibiliko da indartsu eta egunaren bukaeran gehiago indartuko da eta boladaren batek 90 km/h-ko harrapatu dezake, baina oso puntuala izango da. Honek ez du zerikusirik izango larunbat goizaldean izan genuen haizearekin.
Asteburuan fronte pare bat pasako dira, baina euri aldetik ez dute gehiegi lagako. Larunbatean beharbada gehiago egin dezake, bereziki eguerdi partean eta arratsaldeko lehen orduetan. Gainera haizeak ipar-mendebaldera egingo du eta tenperatura asko jaitsiko da, maximoa 12 ºC-tan geratuz. Gero igandean berriro ere hego haizea bueltatuko da eta euri pixka bat egin dezake, baina gutxi.
Beraz, oro har asteburuan euria egingo du, bereziki larunbatean, eta tenperaturak nahiko epelak izango dira, larunbatean freskoagoak.
Gero astelehenerako gauzak ez daude batere argi. Aire masa hotza iristeko aukera badago eta elurra beheraino iristekoa ere bai, bereziki asteartean, baina gerta daiteke azkenean aire masa hori guregana ez iristea. Iristeko aukera %60 koa da, baina elurra itsas mailan kokatzekoa %30. Beraz, eredu matematikoen eboluzioa jarraitu beharra dago astelehenean zer iritsiko zaigun jakiteko.
0 Responses to “Giro lasaiagoa asteburuan, baina dena den euria ere egingo du”