laino guztien gainetik

Bihar eguraldi polita izango dugu olarru eguna ospatzeko. Alde batetik euririk ez du egingo eta beste alde batetik tenperatura atsegina izango dugu. Tenperatura maximoa 22º C-raino iritsiko da, tenperatura oso egokia. Zerua ez da urdin egongo, agertuko baitira hodei zurixka batzuk, baina ez dute eragin handirik izango eguraldian. Beraz, eguraldi polita eta atsegina biharkoa, hodei zurixkek zerua apainduko dutelarik.

Barkatu atzo iragarpenik egin ez izatea, baina nahiko lanpetuta nabil eta iruzkinak ere ez ditut erantzun, baina denborarekin erantzungo ditut. Egia esan, gogoa daukat galdera asko izateko eta galdera horiek erantzuteko. Ea iragarpena nola egiten den edo edozein duda badaukazue galdetu eta komentatuko ditugu.

Gaur fronte hotz bat iritsiko zaigu eta ondorioz eguraldia erabat aldatuko da. Gaurtik aurrera aipagarriena tenperaturetan nabarituko dugun beherakada izango da. Orain arte, oraindik ere udako tenperaturak izan ditugu, 25 ºC-tik behera, baina bihartik aurrera 16 edo 17 ºC-tan geratuko gara, hori da aldea hori.

 Tenperaturen beherakadaz gain, euria ere egingo du. Gaur eguerditik aurrera zaparradak izango ditugu eta une batzutan ekaitz ikutuko zaparrada indartsuak izan ditzakegu, txingorra eta guzti. Gainera, eguerditik aurrera haizea ere indartu egingo da, ipar-mendebaldekoa eta 70 km/h-ko boladak izango dira. Beraz, euria eta haizea arratsalderako. Eta esandakoa tenperaturak behera nabarmen. Gaur gauean 13 ºC-ra jaitsiko da termometroa.

Bihar eta etzi hodeiak nagusi eta baita euria ere. Haizea ipar-mendebaldekoa izango da eta oraindik ere nahiko gogor joko du. Tenperatura maximoak 16-17 ºC inguruan geratuko dira.

Igandean ematen du hobera egingo duela. Goizean oraindik ere hodeiak eta euri pixka bat egin dezake, baina arratsaldean atertu eta ostarteak irekiko dira. Haizea bareago ibiliko da iparraldetik eta tenperatura zertxobait gorantz joango da, 19 ºC-ra.

 Beraz, nahiz eta oraindik astronomikoki udan egon, udazken giroa datorkigu. Gainera hurrengo asteari begira ere 16tik aurrera beste okertze nabarmen bat etor daiteke, baina hori ikusiko dugu oraindik dexente geratzen baita.

Ez da euri askorik espero baina zerbait egin dezake, bereziki bihar arratsaldean eta larunbatean.

Bihar hego haize indartsua ibiliko da goizean eta hori izango da aipagarriena. Bolada indartsuak espero dira eta batzutan 80 km/h-ko abiadura gainditu dezakete haize-boladek. Arratsalderako fronte batek egingo digu bisita eta euri pixka bat lagako digu, baina ez gehiegi. Gainera arratsaldean haizea mendebaltzen eta indarra galtzen joango da. Tenperatura bihar nahiko altua izango da, hego haizeari esker, 27 ºC-ko maximoarekin.

Larunbatean hodeiak eta ostarteak tartekatuko dira eta zaparradaxkaren bat bota dezake, baina ez du asko botako. Beharbada, aukera handiena hasieran eta bukaeran izango da. Tenperaturak beherako bidea hartuko du 21 º-ko maximoarekin.

Igandean hasieran hodeiak egongo dira eta euri pixka bat egitea ezin da baztertu, baina hobera egingo du eta arratsalde eguzkitsua geratuko da, tenperatura atseginarekin (22º-ko maximoa izango da).

Gaur Kontxara begira egongo gara arratsaldean eta olatuak behintzat egongo dira. Haizea iparraldetik ibiliko da 8 km/h-ko batezbesteko abiadurarekin eta hondoko itsasoak 1,5 metro inguruko olatuak altxatuko ditu. Beraz, pixka bat mugitua egongo da itsasoa.

Igandean Donostira joateko eguraldi nahiko polita izango da. Goizean hodeiak izango ditugu, baina zaila izango da euria egitea, eta eguerditik aurrera ostarte zabalak irekiko dira. Bestalde, itsaso mugitua izango dugu 2 eta 3 metroko olatuekin (interesgarria izango da estropada horrelako itsasoarekin, ea Zumaia hor dagoen).

Asteburuko gauzarik aipagarriena beroa izango da, bai bihar baina bereziki larunbatean hego haize nahiko zakarra ibiliko baita, batez ere goizean. Beraz bost kirol proba egiteko hego haizea eta beroa kontuan hartu beharko dira. Termometroa 34 º-ra iritsi daiteke eguerdi eta arratsaldeko lehen orduetan.

 Bihar eguraldi polita izango dugu, oro har eguzkitsua, beharbada hodeiren bat edo beste agertu daiteke baina garrantzi gutxikoa. Tenperaturak ere gora egingo du eta dagoeneko bero puntu bat somatuko dugu, baina brisak eguerditik aurrera beroari neurria hartu eta giro atsegina lagako du. Barnealdean bero handia egingo duenez ekaitzak sortu daitezke azken orduan eta Zumairaino iritsi, baina biharkoan arriskua txikia da.

Larunbatean hego haizea nahiko indartsu ibiliko da eta horrek ez du brisa irteten lagako, beraz bero zakarra espero dugu. Lehen esan dudan bezala 34 ºC-ko maximoa izan dezakegu, eta beraz kirola egiteko lasai hartu beharko dira gauzak. Arratsaldean hego haizea indarra galtzen joango da eta enbata izateko aukera ere badago (galerna). Gainera, beroa dela eta ekaitz arriskua areagotu egingo da arratsalde bukaeran. Horrela giroa freskatuko da gauerako.

Igandean oraindik hodei hondarrak geratuko dira eta euri pixka bat egitea ere baliteke, baina ostarteak zabalduko dira eguerdi partean eta tenperatura nabarmen jaitsiko da, maximoa 23 ºC inguruan geratuz.

 Hurrengo mapan larunbatean 1500 metrora izango dugun tenperatura agertzen zaigu. Hemen 20 ºC-ko isoterma daukagu gainean eta hori bero handia da.

Bihar oporrak hartzen ditut eta abuztu bukaera arte ez naiz lanean ibiliko. Beraz, iragarpenak egiten ere atseden bat hartuko dut.

 Bihar fronte bat pasatuko da gure gainetik. Ez da fronte sendoa eta beraz hodeiak eta euri pixka bat utziko dizkigu, bereziki goizean. Gerora hobetuz joango da eguraldia eta arratsaldean ostarteak ere zabaldu daitezke. Beste aldaketa bat tenperaturetan nabarituko dugu, zeren iparraldeko haizearekin eta hodei hoiekin termometroak behera egingo du, 21 ºC inguruan geratuz maximoa.

Eta hobekuntza horrek jarraipena izango du. Asteburu benetan dotorea espero dut, eguzkia eta tenperatura altuak baina bero handiegirik gabe (maximoa 25 ºC inguruan geratuko da) brisa ibiliko baita. Beharbada igandean iparrak muturra sartzen badu hodei baxuak agertu daitezke, baina ez dago oso garbi. Dena den, igandean hodeiak agertzen badira ere euririk ez da espero eta momentu honetan ez da ikusten hodei gehiegirik.

Beno ba, biharkoa kenduta udako asteburua datorkigu. Disfrutatu eta ondo ibili oporretan.

Bihar egun dotorea geratuko da, goizeko lainoak nahiko azkar desagertuko baitira. Azoreetako antizikloia ziri moduan sartuko da (erderaz cuña anticiclónica esaten dena) gurean eta hori bihar behintzat nabarituko dugu, egun eguzkitsua geratuz. Gainera tenperaturak gora egingo du 23 ºC inguruan geratuz maximoa.

Larunbatean ia egun osoan zehar eguzkia nagusituko da eta gainera tenperatura oraindik gorago ibiliko da 25 ºC inguruan geratuz eguerdi partean. Baina barnealdeko beroa dela eta arratsalde bukaeran edo iluntzean zaparrada trumoitsuak eman daitezke, behintzat arrisku hori hor dago. Gero igandea hodeiekin eta euri pixkatekin hasiko da, baina arratsaldean hobera egingo du. Dena den igandean nabarituko dugu giroa freskoago dagoela eta termometroa 20-21 ºC inguruan geratuko da haizea iparraldetik ibiliko baita nahiko fin.

 Ba horixe, larunbata polita ia egun osoa eta igandea motelago.

 Hurrengo mapan espero den prezipitazioa ikusi dezakegu larunbat gauerako. 6 ordutan pilatuko litzatekeen kantitatea erakusten digu. Bereziki, Pirineo aldean ematen du gehien, baina gurean ere arriskua hor dago (gainera ekaitz ikutuko zaparradak izango lirateke).