laino guztien gainetik

Dagoeneko hementxe daukagu hotz bolada. Tenperaturak nabarmen jaitsi dira eta horrelaxe geratuko dira igandera arte. Azkenean iritsi zaiguna ez da izango 1956an gertatu zenaren antzekoa, zeren eta aukera hori bazegoen orain dela 3 egun genituen iragarpenetan, baina hala ere iritsi zaiguna ez da iristen urtero.

Tenperaturak oraindik ere beherago joango dira bihar eta bereziki larunbat goizean.

Zumaian izango ditugun tenperaturak:

Bihar, ostirala: tmin: -3 ºC  tmax: 3 ºC

Larunbatean: tmin: -5 ºC  tmax: 5 ºC

Igandean: tmin: 3 ºC  tmax: 9 ºC

Beraz, momenturik hotzena larunbat goiza izango da. Ostiral eta larunbata bitarteko gau horretan zerua nahiko garbi geratu daitekeela ematen du eta horrexegatik tenperatura minimoak behea joko du. Zumaian horrelako tenperatura orain dela aspalditik ez da izan. 1985eko urtarrilaren 6an -6 ºC izan genuen Zumaian eta ordutik ez da tenperatura hori izan. Larunbat honetan balio horretara hurbildu daiteke.

Elur kontuak berriz gaur arratsaldean oraindik egin dezake, baina bihar ez da prezipitaziorik espero, beharbada goizaldean zertxobait. Arratsaldean ostarte zabalak irekiko dira.

Larunbatean eguna argi hasiko da, tenperatura baxuekin, baina goizean zehar estaltzen joango da eta eguerditik aurrera prezipitatzen hasiko da. Ematen du hasieran elurra izango dela, baina pixkanaka elur bustia izango da eta bukaeran euritara joko du. Tenperatura goiz hotz baten ondoren, pixkanaka errekuperatzen joango da.

Igandean fronte bero batek euri asko ekarriko digu, baina beste aldetik tenperatura asko igoko da. Beraz, igande euritsua espero dugu.

Hurrengo astean berriro ere Europako aire hotza sartu daiteke berriro eta tenperaturaren beherakada handia ekarri berriz ere, baina hori ikusiko dugu.

Igande honetan itsasoa nola egongo den, denok nahi dugu jakin, bereziki lehengo igandean eduki zuen garrantzia eta gero. Ba ematen du oraingoan ere ez dela bare egongo eta emozioa ere oraindik egon daiteke gizonen estropadan. Nesken estropadan dudarik gabe emozioa hor egongo da dagoen itsasoa dagoela.

Iragarpenak oraintxe bertan zera esango luke:

Igandean hondoko itsasoa handituz joango da goizean zehar eta estropada momenturako ipar-mendebaldeko hondoko itsasoa 2 metro ingurukoa izango da 13 segunduko periodoarekin (eta hori ez da gutxi). Bestalde haizea goizean zehar ipar-mendebaldetik finkatzen joango da eta baita ere indartuz, ez ordea aurreko igandean bezain beste. Goizeko hamaiketan ia haizerik ez da egongo, orduantxe hasiko baita haizea ipar-mendebaldetik finkatzen (batazbeste 3 km/h-ko abiadura). Baina hamabitan ipar-mendebaldeko haizea 10 km/h-ra iritsi daiteke eta bigarren tandan 13 km/h-ra.

Hau ikusi ondoren esan dezaket itsasoa bare ez dela egongo. Haizeak beharbada ez du haize olatu gehiegi sortuko, eta beraz lehengo igandearekin konparatuz oso ezberdina izango da egoera. Garrantzitsuena hondoko itsasoa izango da, 2 metro ingurukoa. Honek esan nahi du olatu erregularrak eta bueltan hartzeko modukoak izango direla, eta gainera handiak. Horrek diferentziak markatu ditzake. Beraz, itsasoa lehengo igandearekin konparatuz ez da horren nahasia izango, haize olatu gutxi, baina olatuak izango ditugu eta ez dira txikiak izango.

Aupa Zumaia!!!!!

Bihar beroa albiste izango da. Hego haizea espero dugu, gainera indarra hartuz joango da egunean zehar eta bukaerarako nahiko zakar joko du. Hego haize honek tenperatura gorantz bultzatuko du eta 28 ºC-ko maximoa izan dezakegu. Ez dago gaizki garai honetarako. Dena den, hau ez da gauza arraro bat eta badaki garai honetan horrelakoak egiten. Bihar gainera eguzkia izango da jaun eta jabe eta horrek ere lagunduko du tenperatura igotzen.

Larunbatean goizean oraindik ere hego haizea izango da nagusi eta eutsiko dio oraindik. Arratsaldeak aurrera egin ahala hodeiak ugarituz joango dira eta zaparradaren batekin bukatu daiteke eguna. Gainera haize aldaketa emango da eta hegotik iparrera pasako gara. Horrek tenperaturaren beherakada ere ekarriko du, bereziki iganderako. Tenperatura maximoa 23 ºC inguruan geratu daiteke.

Igandean ipar haizearekin hodeiak izango dira nagusi eta euria ere egin dezake. Dena den, oraintxe bertan ez dago batere garbi zenbat egin dezakeen. Hori bai, tenperatura nabarmen jaitsiko da eta maximoa 15 ºC inguruan geratuko da. Beraz, aldaketa handi samarra.

 Dena den, okerraldi honek ez du gehiegi iraungo eta asteartetik aurrera berriro ere giro antiziklonikoa bueltatuko da.

Aipagarria biharko tenperatura. Aprobetxatu.

Motxo arrantzontzia dela eta, ea laister lortzen duten hortik kentzea, zeren eta astelehenetik aurrera depresio sakon batek eragingo digu, eta horrek itsasoa erabat zakartuko du. Astelehen eguerdi aldera hasiko gara nabaritzen nola olatuen altuera gero eta handiagoa den. Arratsaldean 3-4 metroko olatuak izango ditugu, hondoko itsasoa ia guztia eta iragarpenak betetzen badira, asteartean 7-8 metroko olatuak egon daitezke eta puntualki hortik gora ere bai. Beraz, Motxo ez badute gaur, bihar edo igandean ateratzen, denborale horrek guztiz desegingo du ontzia. 

Gaur arratsaldean jokatuko da Kontxan sartzeko estropada eta itsasoaren egoera ez da txarra izango. Ipar mendebaldeko haizea ibiliko da batazbestekoa 10 eta 15 km/h bitartean kokatuz. Olatuak metro bete inguruan. Beraz, bare-bare ere ez dugu izango itsasoa.

Bestalde, astebururako eguraldi bikaina espero da. Oro har eguzkia izango da nagusi eta tenperatura oso atsegina izango da maximoak 20 eta 25 ºC bitartean geratuz. Beharbada, igandean zertxobait beroago 25 ºC inguruan ibiliko da termometroa, baina dena den eguraldi dotorea eta bero handirik gabekoa, oso aproposa bai hondartzara joateko edo baita ere iganden Kontxara hurbildu (estropada ikustera) eta egun pasa egiteko.

 Datorren astean 7tik aurrera aldaketa garrantzitsua etorri daiteke, udazken giroa ekarri bait dezake mendebaldetik hurbilduko zaigun depresiogune batek. Honekin tenperaturaren beherakada eta euria iritsiko lirateke, haizea ere protagonista izan litekeelarik. Ikusiko dugu hori. 

Ostiralean Euskal jai eguna ospatuko da eta eguraldiaren nondik norakoak eman nahi ditut. Ez da eguraldi eguzkitsua espero, baina batzutan horrek ere festari lagundu egiten dio, zeren eta jendea hondartzara joan beharrean kalean ibiltzen baita.

 Beno, gaur gauerako fronte bat iritsiko zaigu eta eguraldiaren aldaketa ekarriko du. Horrela, bihar goizean euria, ipar haizea eta tenperatura freskoa nagusituko dira. Arratsaldean, zerbait arintzea posible da, frontea pasata egongo baita, baina hodeiek jarraituko dute nagusitzen.

 Ostiralean fronterik ez dugu izango, baina antizikloia Atlantikoan ipinita, ipar haizea bidaliko digu eta horrekin hodeiak izango dira nagusi. Horrela, goiz goizetik zeru estaliak eta zirimiria nagusituko dira eta gainera ipar haizearekin tenperatura fresko-fresko mantenduko da, maximoa 19 ºC inguruan geratuz. Arratsaldean, zertxobait arindu dezake, eta ostarteren bat edo beste ere zabaldu daiteke, baina une batzutan berriro ere zerua estaltzeko eta euri pixka bat egiteko aukera ezin da baztertu. Beraz, udako eguraldia ez dugu izango, baina dena den euri askorik egitea ere ez da espero. Horrelako eguraldia festaz gozatzeko nahiko aproposa izan daiteke, jendea hondartzara joan beharrean kalean geratuko baita, giro polita sortuz.

Larunbatean ere nahiko goibel ibiliko da eguraldia, eta igandetik aurrera hoberako bidea hartu dezake, baina egun dexente falta dira eta beste aukera batzuk ere badaude. Dena den, probabilitate handiena oraintxe bertan eguraldiaren hobekuntza izateko aukerak du. 

Egoera konplikatu baten aurrean aurkitzen gara. Goi geruzetan aire poltsa hotz bat iritsiko zaigu biharko eta horrek ezegonkortasuna areagotu egingo du. Beste alde batetik lurrazalean depresio bat sortuko da Mediterraneoan eta horri loturiko fronte bat iritsiko zaigu asteazkenerako. Mediterraneoko aire masa izango denez hezetasunez kargatua etorriko zaigu eta goi geruzetan egongo de ezegonkortasunarekin batera euri asko egitea espero da.

Urrutira joan gabe biharko, hilaren 15a 40 eta 70 mm pilatzea espero da kantauri isurialdean eta baita ere Zumaia aldean. Baina asteazkenean oraindik euri gehiago espero da 80 eta 130 mm bitartean, baita ere kantauri isurialdean. Beraz, orain ditugun datuak kontuan hartuta, egoera larri baten aurrean egon gaitezke. Horrexegatik iragarpen berrien gainean egotea komeni da eta iragarpena konfirmatzen bada, beharbada neurri batzuk hartzea komeniko da. Iragarpen berriei adi-adi jarraitzeko gomendioa emango dizuet, ez dadin ezer garrantzitsurik gertatu. Ea ez den ezer gertatzen.

Hego haizea dabil agintari aste osoan eta gainera momentu batzutan gogor jotzen ari da.

 Astebururako egoera berezia daukagu gure aurrean. Atlantikoan Penintsularen hego mendebaldean ziklogenesi prozesu bat gertatuko da probabilitate handiarekin ostiral gauean eta azkar asko sakonduko da, bapateko ziklogenesia izan daitekeelarik. Horrek zikloi sakon bat sortuko du eta Galizia aldetik pasako dela ematen du. Momenturik sakonenean 970 mb-ko presioa izan dezake bere erdigunean. Horrek hego aldeko haize bolada bortitzak sortu ditzake Euskal Herri osoan eta baita ere Zumaian. Dena den bere ibilbidea oraindik ere zehazteko dago eta aldaketa nabariak eman daitezke. Beraz, iragarpenen jarraipen bat egitea komeni da.

Oraintxe bertan ditugun datuekin hauxe gertatu daiteke.

Larunbatean zeruan hodeiak izango dira nagusi, baina ostarteak ere zabalduko dira. Euri pixka bat egin dezake baina ezer gutxi. Aipagarriena haizea izango da. Goizean hego-ekialdeko haizea ibiliko da eta bolada gogorrak eman daitezke, 80 km/h-koak, baina okerrena arratsaldeak aurrera egin ahala etorriko da. Orduan hego-mendebaldeko haize boladek 120 km/h-ko abiadura gainditu dezakete. Hori horrela mantenduko da igande goizaldean ere. Gero igandean gauzak bere onera bueltatuko dira. Bestalde, larunbatean tenperatura oso altua izango da 22 ºC inguruan geratuz maximoa.

Igandean hodeiak eta ostarteak tartekatuko dira, euri pixka bat egitea baztertu gabe. Tenperatura jaitsi egingo da eta maximoa 15 ºC-tan geratuko da eta haizea mendebaldetik ibiliko da, goizaldean oso zakar, baina egunak aurrera egin ahala indar gutxiagorekin.

Iragarpen guztia zikloi horren ibilbidearen eta sakontze prozesuaren menpe dagoenez, iragarpen berrien jarraipena egitea komeni da.

Beraz, kontuz haizearekin asteburuan.

Iritsi zaigu berriro ere beste hotzaldi bat. Antizikloiak Islandia hegoaldean kokatuta Europan zehar aire masa oso hotza garraiatuko du Euskal Herrira. Gainera hotza gurekin geratuko da asteburu osoan, beraz ihauteriak ospatzeko giro hotza (mozorratzeko erropa ugari jantzitzea hobea izango da).

 Prezipitazio aldetik bihar izango da egunik garrantzitsuena eta horrexegatik elurra egiteko aukera handiak ikusten ditut. Egia da, azkenengo hotzaldian ez zuela zuritu, baina bihar berriro ere aukera hori hortxe egongo da. Benetan egun oso hotza izango da, tenperatura minimoa 0 ºC-koa izango da eta maximoa 3 ºC-koa bakarrik. Txingorra bezalako elurra egin dezake, baina malutak erortzea ere ezin da baztertu. Egun osoan egongo da elurra egiteko aukera eta zuritzekoa ere bai. Gainera, bi ezegonkortasun lerro pasako dira eta beraz elurte polit bat ikusteko aukera izan dezakegu. Beharbada, 10 zentimetro pilatu daiteke. Dena den, kostaldean beti ere zailtasunak izaten dira zuritzeko itsasoa hor baitago eta beraz, ikusiko dugu baina aukera handia dagoela ezin dezaket uka.

 Gerora eta asteburuari begira, hotzak gurekin jarraituko du, baina prezipitazioa asko murriztuko denez, ez da espero zuritzea. Beraz, ihauterietan hotza eta noizbehinka beharbada elur maluta bat edo beste baina garrantzi gutxikoa. Termometroetan merkurioa ez da 3-4  ºC-tik gora joango, eta minimoak negatiboak ere izan daitezke -1 ºC ingurukoak. Kriston hotza.

Hasi da aire masa hotza iparraldetik guregana iristen eta gaurtik aurrera hotza izango da gure artean gutxienez igandera arte. Egun hotzena larunbata izango da tenperatura minimoa -1 ºC eta maximoa 2ºC.

Elurra ere apostu egin beharko banu baietz esango nuke, baina ez gaur. Elurra bihar arratsaldean hasiko da eta bazterrak txurituko dituela pentsatzen dut. Larunbat goizean esnatzerakoan hondartzak eta kaleak zuri ikusiko ditugula uste dut. Gero larunbatean zehar ere elurra egiten jarraituko du. Elur geruza zehaztea zaila da, baina esango nuke 10 cm-ko geruza izan dezakegula.

 Laburbilduz bihar eta etzi izango dira egunik okerrenak eta elurra ere egingo du, gainera zuritu ere bai (hori espero dut nik). Hortaz aparte hotz handia, tenperatura maximoak asteburu osoan ez dira 3 ºC-tik pasako eta minimoak 0 eta -1ºC bitartean. Gainera, gaur arratsaldean eta bihar haizea indarrarekin ibiliko da eta horrek hotz sentsazioa areagotu egingo du.