laino guztien gainetik

Egun guzti hauetan gertatzen ari den bezalaxe, asteburuan ere euria izango dugu gure artean, bereziki larunbatean. Igandean zertxobait arinago ibiliko da eguraldia eta eguerdi partean ostarte batzuk ere ireki daitezke. Tenperaturan ez dugu aldaketa handirik nabarituko. Igandea zertxobait hotzagoa izango da baina tira. Larunbatean 12 ºC-tan geratuko da termometroa eta igandean 10 ºC-tan.

Beraz, bihar goizetik hasi eta larunbat osoan zehar euria eta euria egingo du. Litro asko pilatuko dira eta zaila izango da aterguneren bat aurkitzea.

Igandean hobera egingo du bereziki eguerdi partean, baina tenperatura zertxobait beherago geratuko da.

Albiste bezala eman nahiko nuke hurrengo asterako espero dena. Astelehenean euria eta haize bortitza izango dugu. Itsasoa ere haserretuko da eta 5 metroko olatuak egon daitezke egunaren bukaeran. Eta asteartetik aurrera, aire masa hotza iritsiko zaigu ipar latitudeetatik eta elurra beheraino jaitsi daiteke. Oraintxe bertan modeloak aztertuz, esan dezaket asteartean elurra 400 metrora jaitsiko dela eta asteazkenean beharbada 100-200 metrora. Dena den, xehetasunak aldatu daitezke, baina denborale hau izateko aukera % 60 -koa da. Beraz, aukera handia dago hurrengo astean benetako negua gure artean izatekoa. Gainera, ekaitzak eta txingorra ere aipatu behar dira. Kontuz ibili bereziki kotxea hartu behar baduzue.

Eguraldi dotorea espero dugu astebururako. Antizikloia izango da egoeraren jaun eta jabe eta beraz, eguzkia nagusituko da. Hori bai, tenperaturak ez dira lehengo astekoak izango eta freskura edo hotza ere nabarituko dugu gauetan eta goizeko lehen orduetan. Egunez eguzkiak epelduko du giroa, baina 20 ºC-ko muga ez da gaindituko. 15 eta 18 ºC bitartean geratuko dira termometroak asteburuan egunez.

 Beraz, bai bihar eta baita ere asteburu osoan eguzkia jaun eta jabe eta ipar-ekialdeko haizea ibiliko denez, tenperatura ez da gehiegi igoko. Dena den, egunez giro goxo xamarra izango dugu.

 Datorren astean asteartetik aurrera ematen du denboraldiko lehen aire masa hotza iritsiko dela, negu giroa ekarriz. Antizikloia Atlantikoan ipiniko da eta hortik ipar haizea bidaliko digu. Horrela, ipar latitudeetako aire masa hotza iritsiko zaigu, Islandiatik eta elurra nahiko behera etorri daiteke, 500-600 metrora beharbada. Dena den, oraindik nahiko urruti dagoenez, egoera aldatu daiteke, baina orain ditugun datuak kontuan hartuz, aukerak handiak dira.

Biharkoa benetan egun makurra izango da. Alde batetik zaparradak emango dira, momentu batzutan ekaitz ikutukoak eta txingorrarekin. Gainera, haizea indartsu ibiliko da, beraz aterkia erabiltzeko ere egun txarra. Eta hori gutxi bada, tenperatura asko jaitsiko da, neguko egun baten itxura hartuz. Tenperatura maximoa 13 ºC inguruan geratuko da. Horrela, aurtengo lehen elurtea izango dugu 1300 metrotik gora, bereziki Pirineotan. Dena den hotzaldi honek gutxi iraungo du, eta berriro igandetik aurrera tenperatura epelak izango ditugu hego ikutuko haizearekin.

Larunbatean egunaren hasieran euri pixka bat egin dezake, baina arratsaldean nabarmen egingo du hobera, atertuz eta ostarteak irekiz. Oraindik ere fresko antzean joango da eguna, baina termometroa 17 ºC-raino iritsiko da. Gainera haizeak ere indarra galduko du eta arratsalde nahiko atsegina geratuko da.

Igandean egun polita espero da. Beharbada hodei batzuk izango dira zeruan, baina eguzkia nagusituko da eta hego ikutuko haizearekin berriro 20 ºC-tik gora joango da termometroa, berriro ere hondartzarako giroa.

Beraz, ederra diferentzia bihartik igandera. Bihar negu giroa eta handik bi egunetara uda giroa. Hurrengo mapan biharko, tenperatura 0 ºC-tan zein altueretan espero den ikusi daiteke. Gure lurraldean 1500-1600 metro inguruan kokatuko da 0 ºC-ko tenperatura, baina elurra pixka bat beherako agertuko da, 1300 metro inguruan.

Aste honetako ostegunean izango da Kontxara joateko sailkapen estropada eta horregatik itsasoko egoeraren berri emango dizuet.

Haize askorik ez da espero. Ipar-ekialdetik ibiliko da haizea 10 km/h-ko batezbesteko abiadurarekin. Eta ipar-mendebaldeko hondoko itsasoak 1 eta 1,5 metro bitarteko olatuak altxaraziko ditu.

Beraz, bare-bare ez da egongo itsasoa. Olatuak egongo dira, baina beharbada ez guk nahiko genukeen haina. Dena den, aupa Zumaia.

Iganderako ematen du itsasoa asko mugituko dela, depresio sakon bat Kantauritik gertu pasatzea espero baita, eta honek 3 metroko olatuak eragin ditzake. Beraz, igandean emozioa ez da faltako itsasoa hain gaizto jartzen bada. Ikusiko dugu.

Larunbatean iritsi zen iragarritako beroa, hego haizeari esker eta baita ere ondoren ekaitz zaparrada galanta. 25 mm jaso ziren ia bi ordu iraun zuen zaparradan, eta 12 mm ordu bakar batean. Zumaian bakarrik bota zuen hain kantitate handia, beste toki askotan ez zuen apenas ezer bota.

Ekaitz ikutuko zaparrada hauek horrelakoak dira, toki batean pilat bat egiten du eta handik gutxira dagoen beste toki batean ia ezertxo ere ez.

Bihar bertan kanpora noa radar meteorologikoei buruzko kongresu batetara. Beraz, aste osoa kanpoan izango naiz eta iragarpena ezin izango dut egin.

Mapak nabarmen aldatu dira ostegunetik hona eta uhin luzera txikiko perturbazio batek atmosfera ezegonkortu egingo du nabarmen gaur arratsaldetik aurrera. Honek esan nahi du, ekaitz arriskua izango dugula, bereziki gaur 9etatik aurrera, eta ekaitz hauek zaparrada mardulak, txingorra eta haize bolada oso gogorrak ekarri ditzakete. Gainera, litro asko pilatu daiteke denbora gutxian.

 Beraz, nahiz eta zaparrada hauek ez diren ziurrak, probabilitate altua dago sua pizten den momentuan zaparrada mardulen bat izatekoa. Kontuz beraz, gaur gauean eta ea suertea dugun eta ez den momentu horretan ezer gertatzen.

Atzo gainetik pasa zitzaigun ezegonkortasunaren azken ikutu bezala, gaur goizean zaparrada mardula izan dugu Zumaian. Ordu bakar batean 21 mm pilatu dira eta hori ez da gutxi. Dena den, ez du arazo gehiegirik sortu.

Hondartzara joan nahi duen jende asko dago eta horientzat albiste onak dauzkat. Bihartik aurrera udako giro sanoa datorkigu. Eguzkia eta tenperatura ederrak izango ditugu jaun eta jabe. Tenperatura maximoak 20 eta 25 ºC bitartean geratuko dira, itsasoko brisa ibiliko delarik. Gainera ematen du astebukaera ere horrelakoa izango dela, baina hori ostegunean zehaztuko dizuet. Beraz, albiste bezala ematen dizuet iragarpen hau, zeren hain eguraldi tristea izan ondoren albistea da udako giroa datorkigula gutxienez lau edo bost egunetarako.

Egoera arriskutsua aurreikusten genuen ostiralean asteburu honetarako, bereziki larunbat eta igande bitarteko gauerako eta halaxe gertatu da. Litro pila bat jaso dira, bereziki Bizkaian eta ondorioz uholdeak izan ditugu.