Itxas-Gain K.E.

Itxas-Gaineko piraguistak Nafarroa aldean izan dira joandako asteburu honetan, eta bi garaipen handi lortu dituzte. Larunbatean Iruñean hartu zuten parte Alfredo Agirre memorialean, eta taldeka lehen postua lortu zuen Itxas-Gainek, 48 punturekin. Atzetik sailkatu ziren Iruñeako Piragüismo Pamplona eta Kayak Castro Urdiales. Hurrengo egunean, Ebro ibaian, Garesko estropada irabazi zute nagusitasun handiarekin (261 puntu), Castro Urdialesen eta Piragüismo Pamplonaren aurretik. Hurrengo estropada ekainaren 19an eta 20an jokatuko dute, Aranjuezen.

Horrez gain, gogoratu behar da asteburu honetan jokatuko dela Zumaia-Sakoneta-Zumaia proba, arratsaldeko 4:30etik aurrera. 40 bat piraguak hartuko dute parte eta arranpla paretik abiatuko dira. Itsasoko kayaken Gipuzkoako Txapelketa izango da .

Distantzia luzeko Espainiako Txapelketak jokatu dira asteburuan Sevillan. Han izan dira klubeko zortzi ordezkari, eta lan bikaina egin dute taldeka 25. postua lortu baitu Itxas-Gainek –97 klubek hartu dute parte–. Emaitza oso ona da, kontuan hartuta Itxas-Gainek zortzi piraguista baino ez dituela eraman. Banakako emaitzak hauek izan dira: senior mailan, Iñigo Peña 11.; jubeniletan, Miren Lopetegi 10., Maitane Ruiz 18., Loredi Alzibar 28., eta Amaia Olaizola 38.; kadete mailan, Laura Peña 19., Alex Alzibar 32. (kanoan); Xabi Lopezek ezin izan zuen 2.000 metroetako kortea pasa, bizpahiru segundorengatik, eta ezin izan zuen proba osatu. Bidaia luzea eta nekagarria izan da, ostegunean abiatu eta atzo gauean iritsi baitziren, baina ondo egindako lanak neke guztiak arintzen ditu.

Denboraldia ezin hobeto hasi da Itxas-Gainentzat, estropada bakarrean Gipuzkoako eta Euskadiko txapelketak bereganatu baititu. Duela bi asteburu Zumaian jokatzekoa zen Gipuzkoako Txapelketa bertan behera gelditu zen, eta federazioek eta klubek adostu zuten txapelketa hori Euskadikoarekin batera jokatzea Irunen. Joan den igandean izan zen estropada, eta, beste behin, Itxas-Gainek maila handia eman zuen talde bezala. Banaka lehen postua inork lortu ez zuen arren, postu on asko esskuratu ziren eta horri esker da Itxas-Gain 2010eko Gipuzkoako eta Euskadiko txapeldun. Itxas-Gaineko piraguistek 1.813 puntu eskuratu zituzten; bigarren Santiagotarrak sailkatu zen, 1.685 punturekin; eta hirugarren postuaDonostia Kayakentzat izan zen, 1.508 punturekin.

Postu batzuk aipatzekotan, gizonezkoetan, senior mailan Xabier Osa beteranoak hirugarren postua eskuratu zuen. Xabier Centeno, Mikel Solozabal eta David Julia juniorrak hirugarren, laugarren eta bosgarren sailkatu ziren, hurrenez hurren. Kadete mailan, berriz, Xabier Lopez hirugarren izan zen, Jon Zendoia bosgarren eta Mikel Uranga seigarren. Emakumezkoetan junior mailako Miren Lopetegi, Loredi Alzibar eta Amaia Olaizola bigarren, laugarren eta bosgarren izan ziren, hurrenez hurren. Laura Peña hirugarrena izan zen kadeen artean.

Zorionak denori!

Gaur goizean jokatu den kontrolean lortu du munduko txapelketarako txartela. Txapelketa Abuztuaren 13,14,15 eta 16an jokatuko da Kanadan eta bertan k4 1000 proban hartuko du parte. Zorionak Iñigo!

Joan den asteburuan jokatu zen 500 metroko Espainiako kopa Asturiasko Trasona urtegian, bertan parte hartu zuen Iñigo Peña taldekideak eta hirugarren poztu ezin hobea eskuratu zuen. Urte hasieran Sevillan emandako maila ona, eta geroago 1000 metroko Espainiako kopan lortutako emaitza onak ez zirela kasualitatea izan erakutsi zuen Iñigok eta ekainean jokatuko den “master” txapelketarako kontutan hartu beharreko aurkaria izango dela argi laga zuen.

K4 prestatzen
Bakarkako txapelketetan emaitza bikainak lortzen ari den arren, munduko txapelketari begira, K4ean ari da entrenatzen Iñigo. Ekainean, munduko txapelketara joateko hauta proba egin behar dute beste K4 baten aurka eta proba horretako irabazleak eskuratuko du munduko txapelketan parte hartzeko txartela.

Taldekideok, zorionak eman nahi dizkiogu Iñigori, etxetik kanpo egiten ari den lan guztiarengatik eta Itxas-Gain K.E.aren izena hain altu eramateagatik. Besterik gabe, zorionak eta zorte on.

500 metroko kopako emaitza guztiak hemen dituzue ikusgai.

Larunbat arratsaldean eta igande goizean jokatu zen espainiako maratoi kopan hartu zuten parte Itxas-Gain K.E.eko neska-mutilak. Txapelketa, Leongo Porma urtegian jokatu zen eta zumaiarrak taldekako 9. Postua lortu zuten. Txapelketa hau, hilaren bukaeran jokatuko den espiniako txapelketari begira garratzitsua zen.

Larunbat arratsaldean kadete eta seniorrak izan ziren uretan. Kadeteek 12km-ko estropada izan zuten. Mutilen mailan, Mikel Uranga eta Ander Tolosa 26. postuan sailkatu ziren K2an, K1eko proban, Xabier Lopez 19. eta Jon Zendoia 33. izan ziren eta Alexander Altzibar 13. C1ean. Kadete nesketan berriz, Amaia Olaizola eta Maitane Ruiz 5. sailkatu ziren K2an eta Laura Peña eta Idurre Peña 9. K1ean Loredi Altzibar 15. postuan helmugaratu zen.

Gaztetxoen estropadak amaitu ondoren, seniorren txanda iritsi zen, hauek 20km-ko distantzia bete behar zuten. Bertan, Imanol Atorrasagasti eta Ekaitz Esteban 10. izan ziren K2an eta Haize Galarraga 12. K1ean. Honenbestez larunbatean egin beharrekoak amaitu ziren.

Igandean junior eta beteranoen txanda izan zen. Hauek 16km egin behar izan zituzten. Mutilen mailan Kepa Larrañagak eta Mikel Solozabalek brontzezko domina lortu zuten K2an eta Kepa Etxabe 2. izan zen K1ean. David Julia eta Xabier Centenok ezin izan zuten parte hartu David gaixotu egin baitzen. Nesketan berriz, Karmele Eizagirre 9. izan zen K1ean. Beteranoen mailan Vicente Royo “Gatxi” 10. sailkatu zen K1ean.

Emaitza guztiak hemen dituzue ikusgai.

Asteburu honetan jokoan zen Espainiako 1000 metroko txapelketan parte hartu du Iñigo Peña taldekide gazteak. Txapelketa Asturiasko Trasona urtegian jokatu da eta emaitza ona eskuratu du.

Atzo klasifikazio estropadak arazo askorik gabe gainditu ondoren, gaur goizean jokatu den finalean bosgarren postua eskuratu du. Lehen urteko seniorra dela kontutan izanik oso emaitza ona dela esan beharra dago.

Emaitza guztiak  hemen dituzue ikusgai.

Larunbat eguerdian jokatu ze Euskadiko maratoi txapelketa Orion. Itxas-Gaineko piraguistak, lan txukun bat egiteko esperantzarekin joan ziren, baina, taldekide batzuk kanpoan egoteak eta beste batzuek izandako arazoek, bigarren postuarekin konformatu beharra ekarri zien.

Senior mailari dagokionez, k2ko proban, Imanol Atorrasagasti eta Ekaitz Esteban garaile izan ziren. Xabi Osa eta Oier Aizpurua bigarren sailkatu ziren eta Xabi Korta eta Vicente Royo “Gatxi” seigarren sailkatu ziren. K1eko proban ez zuten suerte handiegirik izan taldeko parte hartzaileek, Josu Ansolak, lan erdietan, piragua puskatu zuen bigarren zihoanean eta Haize Galarragak berriz, lema hautsi zuen azken itzulian, hirugarren zihoanean.

Jubenil mailan, Xabier Centeno eta David Juliak garaipena erdietsi zuten k2ko proban. K1eko proban aldiz, Kepa etxabe hirugarren izan zen eta Mikel Solozabal laugarren. Neskei dagokionez, Miren Lopetegik garaipena lortu zuen eta Karmele Eizagirre hirugarren izan zen k1eko proban.

Kadeteen mailan, Ander Tolosa eta Mikel Urangak garaipena lortu zuten. Xabi Lopez hirugarren sailkatu zen k1eko proban eta Alex Altzibar bigarren izan zen C1eko proban. K2 nesketan, Laura Peña eta Loredi Altzibar hirugarren sailkatu ziren.

Emaitza guztiak hemen dituzue.

Emaitza gazi gozoak lortu dituzte piraguistek Sevillan jokatutako Espainiako txapelketan. Senior mailari dagokionez, Iñigo Peñak merezitako 8. postua eskuratu zuen. Josu Ansola berriz, finaletik kanpo geratu zen. Mailan honetan irabazle Emilio Llamedo asturiarra izan zen.

Jubenil mailan, Kepa Etxabe 34. postuan helmugaratu zen eta Miren Lopetegik 20. postuarekin konformatu behar izan zuen, hasieran arazotxo batzuk izan ondoren. Kadeteei dagokionez, Maitane Ruiz 27. sailkatu zen, Loredi Altzibar 31. Laura Peña 42. eta Amaia Olaizola 44. Taldekako sailkapenean, 23. postua eskuratu zuten piraguistek. Emaitza guztiak hemen dituzue ikusgai.

Beterano mailari dagokionez, Xabi Osak 2. postua eskuratu zuen. Beteranoen emaitza guztiak hemen dituzue ikusgai.

Atzo arratsaldean iritsi ginen Sevillara. Eguraldi ona lagun, uretara irten ginen bidai luzearen ondoren gorputza martxan jartzeko asmoarekin. Entrenamendu labur bat egin eta hotelerako bidea hartu genuen.

Hotela ez daukagu Sevilla bertan, baizik eta kilometro gutxi batzuetara dagoen Sanlucar la Mayor herrian. Oso gustura gaude hotelean, oso lasaia eta atsegina da. Bitxikeri moduan, hoteleko bezero gehienak txinatarrak direla esan dezakegu.

Gaur goizean, goiz jaiki gara eta entrenatzera joan gara, eguzkiak asko berotu baina lehenago. Biharko klasifikazio estropadari begira entrenatu dugu eta berriz hotelera bueltatu gara deskantsatu eta bazkaltzera. Arratsaldean beste entrenamendu labur bat egingo dugu, eta ondoren, burua pixka bat distraitze aldera buelta bat emango dugu merkatal zentroren batean.

Eguraldi zoragarria egiten du, aukeran beroegi guretzako, ez baikaude ohituta bero honekin entrenatzera. Bihar hasiko da txapelketa, ea albiste onak idazteko moduan garen. Besterik gabe agur bat Sevillatik.