Pulpoeskubaloia

SUMOFIC PULPO K.E.-REN  GARAIPENA SALAMANCA-REN AURREAN
  
           Partida erritmo handiz hasi zen, Salamancakoek irabazteko asmoa erakutsi zuten hasiera-hasieratik, eta etxekoak partidaren lehen minutuetan zalantza handiekin eta aukera gutxi sortuz. Salamancakoen defentsa irekiak akats ugari eta jaurtiketa okerrak eragin zituen erasoan eta etxekoen 5-1 defentsak huts egiten zuen Salamancakoen jokoaren eta pibot onaren aurrean. Bisitariak berehala hasi ziren aldea hartzen eta 5 eta 6 goletako errenta lortu zuten. Etxekoen aldetik 6-0 defentsara aldaketa egin zen eta handik aurrera Salamancak askoz ere arazo handiagoak izan zituen erasoan. Hala ere, gure erasoa ez zen eraginkorra eta ezinezkoa egiten zitzaigun markagailuan hurbiltzea. Horrela, bada, 5 goleko abantailarekin iritsi ginen atsedenaldira, 10-15.                                                                                                                                                                                  Atsedenaldiaren ondoren partidak berdin jarraitu zuen, eta zenbait unetan are okerrago, Salamancakoek aldea handitzea lortu zuten eta 7 goleko abantaila izatera iritsi ziren. Oker zihoan partida etxekoentzat, defentsan hobera egin bagenuen ere erasoan ez genuen asmatzen. Bigarren zatiaren 10. minututik aurrera aldea murriztuz hasi ginen, eta Salamancakoen kanporaketa bat aprobetxatuz aldea 3 goletara gutxitzea lortu genuen. Handik aurrera etxeko taldeak gora egin zuen, erasoan jokoa argiagoa zen, defentsa oso sendo agertu zen (atezainen,  Iriondo eta Peñalbaren partida handia), eta batez ere, zaleek asko animatu zutelako, baita zazpi golez galtzen genuenean ere.                                                   Partida amaitzeko 5 minuturen faltan 1 gora jarri ginen, eta hortik amaiera arte berdinketak eta gol bateko aldea etxekoen alde; baina 30 segundo falta zirela markagailuan berdinketa genuen 28na eta baloia Salamancakoen alde. Beste behin, bihotzekoa dutenentzat gomendagarria ez den amaiera (egunen batean zerbait larria gertatzeko ere!). Hamar segundoren faltan kanpotarrek jaurtiketan huts egin zuten, Iriondok baloia hartu, bi hegalekoak kontraerasora atera, atezainaren pase bikaina eta azken segundoan Gutierrezek garaipenaren gola sartu zuen bozina jotzen ari zela!!! Pozak gainezka egin zuen Lubakin, talde osoa goleatzaileari besarkatuta eta beste bi puntu etxekoen alde. Sumofic Pulpo K.E.-ak laugarren postuan jarraitzen du 16 punturekin, Zarautz, San Antonio eta Ereintzaren aurretik, hauek 13 punturekin. Aurretik Salamancarrak hirugarren dira 18 punturekin, eta bigarren Senda Viva Tudelarrak 20 punturekin. Lider sendo jarraitzen du Torrelavegak 24 punturekin.                                                                                                     Taldeak harmailetatik jaso zuen laguntza eskertu nahi du, beste behin ere oso ondo portatu ziren zaleak, kiroldegia leporaino bete zen eta unerik zailenetan ere ez zioten animatzeari utzi. Etxeko taldearentzat partida bigarren zatiko hamargarren minutuan amaitu zitekeen (10-17), baina Pulporen ezaugarri nagusia azken unera arte borroka egitea da, izan ere, talde honek ez du inoiz partida galdutzat ematen. Horren erakusgarri Lubakin jokatu diren azken hiru partidak dira, Trapagaran, Zarautz eta Salamancaren aurka ia partida osoan zehar markagailuan atzetik joan arren, partidak garaitzea lortu da.   

Gaur Lubaki kiroldegian Sumofic Pulpo Kirol Elkarteak arratsaldeko 18:45etik aurrera B.M. Salamanca-ri egingo dio aurre. Partida zuzentzen Díaz Fernández eta Fernández García epaile madrildarrak arituko dira.

Salamancakoek talde indartsua osatu dute aurtengo denboraldian, maila handiko jokalariak fitxatu dituzte. BM Valladolid-ek hiru jokalari utzi dizkio: Alejandro Sánchez Capón atezaina, junior mailan internazionala 18 aldiz, Roberto Pérez, Lehen mailako goleatzaile nagusia joan den denboraldian, eta orain denboraldi batzuk C. Aranga-ko pibote izandako Francisco Pérez. Horiekin batera, Oscar Álvarez eskuineko hegalekoa, Carlos Domínguez albokoa eta Valladolideko César Pérez zentral gaztetxoa, junior mailan internazionala 24 aldiz, etorkizun handiko jokalaria kirol honetan. Berez indartsua zen taldea sendotzen dute jokalari hauek guztiek. Rtel. Jero taldeak beldurtzeko zenbakiak ditu ligan: goleatzaile nagusia dira 367 golekin 11 partidatan, eta Oscar Álvarez jokalaria ere ligako goleatzaile nagusia da 103 golekin.

Gaztelarrak bigarren dira sailkapenean, igoera fasea jokatzeko aukera ematen duen postua; 18 puntu dituzte, Tudelako Senda Vivak adina. Laugarren postuan daude Zumaiako gorritxoak sailkapenean, 14 punturekin. Gaurkoa bi talde handiren arteko lehia gogorra izango da, eta jakina, Alex Olidenen mutilak azken emaitza onak mantentzen saiatuko dira. Lubaki kiroldegia beste behin leporaino bete behar da, etxeko jokalariak animatu eta beste garaipen bat lortu goiko postuetan jarraitzeko. Lubakin partida bakarra galdu dute zumaiarrek, Torrelavega indartsuarena urka, 11 partidatan garaipenak bata bestearen atzetik lortu dituen talde indartsu eta gogorra. Etxekoen artean jokalari guztiak prest daudela dirudi, zalantza bakarra Ion Rubio izango da, azken partidan kolpe handia jaso zuen eta min du oin batean.

Garaipen handia zumaiarrek lortutakoa (30-28) eskualdeko arerio nagusiaren aurka. Partida oso berdindua agertzen zen, bietako edonor aurkezten zen irabazteko aukerekin. Garaipen handi honi esker Alex Olidenen mutilak bosgarren jarri dira sailkapenean 12 punturekin, laugarren diren zarauztarrak eta seigarren den Antonianoren filialak adina.

Partida hasieran kanpokoek agintzen zuten, izan ere etxekoen urduritasuna nabaria zen. Bosgarren minuturako kanpotarrak 1-4 ziren aurretik. Minutuak aurrera egin ahala, gorritxoek abantaila murriztea lortu eta lehen zatiaren erdialderako 7-6 jarri ziren aurretik. Hortik aurrera eta lehen zatiaren amaiera arte berdinketak bata bestearen atzetik etorri ziren, eta horrela atsedenaldira 14nako berdinketarekin iritsi ziren.

Bigarren zatiaren hasieran etxekoak oso indartsu atera ziren. Bost minututan 5-0ko partziala egitea lortu zuten eta markagailuan 19-14koa jarri zuten zumaiarren alde. Handik aurrera gorritxoen nagusitasuna erabatekoa izan zen, zarauztarrek ezin zuten zumaiarren defentsa hautsi eta erasoan kamuts aritu ziren. Bigarren zatiaren lehen 15 minutuetan zarauztarrek 4 gol baino ez zituzten lortu eta hortxe lortu zuten etxekoek abantailarik handiena, 24-18. Zarauztarren entrenatzaileak denbora eskatu behar izan zuen, eta handik berehala aldea murriztea lortu zuten. Hamar minuturen faltan kanpotarrak gorantz zetozela zirudien, eta 26 eta 23koarekin Alex Olidenek denbora eskatu zuen. Handik aurrera etxekoek ondo kontrolatu zuten partida, eta amaieran kanpotarrek markagailuan zertxobait gerturatzea lortu zuten epaileak erabaki zorrotz baten ondorioz Ion Rubio kaleratu zuenean. Partida amaieran 30-28 etxekoen alde.

Lubaki kiroldegia leporaino bete zen, etxeko zaleak oso motibaturik etxekoak animatuz. Garaipena lortzeko oinarrietako bat izan zen.

Sumofic Pulpo K.E.-ren aldetik ondorengoek jokatu zuten: Ibon Sasiain, Sagasta, Aizpurua (1), Gutiérrez (1), Agirre (3), Ioritz Sasiain, Peñalba, Hernández (3), Uribeetxeberria (6), Arrieta, Iriondo, Ugarte, Rubio (9) eta Leibar (7).

Larunbata, 2008.eko Azaroak 22

J.D. ARRATE - SUMOFIC PULPO K.E. 17:30

ORMAIZTEGI – DECOTENA PULPO K.E. 18:15

ASADOR BASUSTA PULPO K.E. – LEIZARAN 18:00

ESCOLAPIOS – PULPO K.E. 16:30 (Jubenil Mutilak)
ESCOLAPIOS – PULPO K.E. 18:00 (Kadete Mutilak)

PULPO K.E. – EGIA 16:15 (Kadete Neskak)

PULPO “A” – ALOÑA MENDI 10:00 (Infantil Mutilak)
PULPO “B” – UDARREGI 11:15 (Infantil Neskak)

Igandea, 2008.eko Azaroak 23

PULPO “B” – LEZO 10:00 (Kadete Neskak)
PULPO “B” – ARRASATE 11:30 (Infantil Mutilak)
PULPO K.E. – IRURENA OET 12:30 (Kadete Mutilak)

Sumofic Pulpo K.E-ak 34-27 irabazi zion Trapagaran-i Lubaki kiroldegian. Alex Olidenen mutilak 40 minutuz atzetik joan ziren markagailuan baina galdutzat zuten partida irabaztea lortu zuten.

Partidaren hasieran berdintasun handia izan zen eta 10. minutura arte berdinketa izan zen nagusi. Handik aurrera kanpokoek aurrea hartu eta 4 goletako aldea izatea lortu zuten lehen zatiaren erdialdean. Zumaiarrek jaurtiketa garbiak huts egin zituzten lehen zatiaren amaieran eta horrela atsedenaldira markagailuan 13 eta 17koarekin iritsi ginen kanpotarren alde. Bigarren zatiaren hasiera ere ez zen ona izan etxekoentzat, izan ere 37. minuturako kanpotarren aldeko abantaila handitu egin zen, 15-21. Handik aurrera etxekoek gora egin eta bost minututan jokalari bat gehiagoz arituz partida berdintzea lortu zuten. Bigarren zatiaren erdialdera kanpotarren abantaila gol batekoa zen, 21-22. Zenbait minututan berdinketa izan zen nagusi, baina berehala kiroldegia bete zuten zaleen laguntzari esker etxekoek gora jo zuten eta partidan lehen aldiz aurrea hartzea lortu zuten markagailuan. Zumaiarrek erakutsi zuten jokoaren indarraren aurrean kanpotarrek etsi egin zuten eta partida amaieran Alex Olidenek zuzentzen dituen mutilek 34-27 garaitu zituzten Trapagarangoak.    

Garaipen honi esker zumaiarrek aurrera egin dute sailkapenean eta 9 punturekin seigarren jarri dira, puntu berak dituen Ereintzaren aurretik. Zarauztarrak daude etxekoen aurretik 10 punturekin, eta hain zuzen ere, bi jardunaldi barru elkarren artean jokatuko dute Lubaki kiroldegian. Datorren astean, Sumofic Pulpok Eibarko Ipurua kiroldegian jokatuko du larunbat arratsaldean Arrateren aurka.

Sumofic Pulpo K.E.-ren aldetik ondorengoek jokatu zuten: Sagasta (1), Aizpurua (4), Gutiérrez (9), Agirre (5), Ioritz Sasiain, Peñalba, Hernández (2), Uribeetxeberria (2), Arrieta (1), Iriondo, Ugarte (2), Rubio (7) eta Leibar (1).

SUMOFIC PULPO KIROL ELKARTEAK TRAPAGARANEN AURKA JOKATUKO DU GAUR

Gaur arratsaldean 18:45etik aurrera Sumofic Pulpo Kirol Elkarteak Bizkaiko Aparcabisa Trapagaran talde gogorraren aurka jokatuko du. Epaileak Monjo Ortega eta San Pedro Colorado madrildarrak izango dira. Bi taldeak orain 10 urtetik daude maila berean, eta 9 aldiz jokatu dute Lubaki Kiroldegian, etxekoek 6 garaien dituzte, berdinketa bat eta bitan irabazi dute bizkaitarrek Zumaian. Kanpotarren bi garaipenak azken lau urte hauetan izan dira, eta beraz, Alex Olidenen mutilak azken bi denboraldi hauetan Lubaki Kiroldegian lortu ez duten garaipenaren bila aterako dira. Dirudienez Alex Olidenek jokatzeko moduan izango ditu joan den astean Zizur Nagusian garaipena lortu zuten 14 jokalariak, baina Joseba Sagastarekin daude zalantzak, belaunean arazoak baititu. Zumaiarrek badakite Trapagaran taldearen aurkako partida oso zaila izango dela, borrokalaria da oso talde bizkaitarra, batez ere defentsa lanetan. Sailkapenean bizkaitarrak 11. postuan daude 4 punturekin, eta etxekoak zazpigarrenak dira 7 punturekin. Aukera ona da zalantzarik gabe beheko taldeekin aldeak handitzeko eta horrela ligaren bigarren zatiari lasaiago ekiteko. Euskal Ligako kadete eta jubenil mailako taldeek Zarauzko talde gogor eta sendoen aurka jokatuko dute gaur arratsaldean Lubaki Kiroldegian. Igande goizean ere bi partida jokatuko dira Lubakin, lehenik Decotena Pulpo K.E.-k jokatuko du 10:30etik aurrera Donibane-ren aurka, eta ondoren 12:15etik aurrera Asador Basusta Pulpo K.E.-ko neskek Errenteriako Ereintzaren aurka jokatuko dute.

Senior mailako bi taldeek garaipena lortu zuten. Asador Basustako neskek Lubaki kiroldegian denboraldiko lehen garaipena lortu zuten Elorrioko Eskubaloi taldeari 25-15 irabazi ondoren. Letamendiak entrenatzen dituen neskak hasieratik egin ziren partidaren jabe, eta atsedenera 14-8ko alde nabarmenarekin iritsi ziren. Bigarren zatian abantaila handitu egin zen eta partida amaieran 25-15 etxekoen alde. Bi jardunaldi jokatu ondoren hirugarren postuan dira zumaiarrak Aloña Mendi eta Zarautzen atzetik.

Asador Basustaren aldetik ondorengoek jokatu zuten: Onintza Salegi, Izaro Isidro (3), Eneritz Irigoien (5), Josune Herencia (5), Deñe Izaga (1), Lierni Martínez, Jone Salegi (3), Maider Alberdi (4), Leire Martija (2), Maialen Aldabaldetreku, Ainhoa Aranzabal (2), Jaione Ruiz eta Ane Irigoien.

Bestalde, Sumofic Pulpo Kirol Elkarteak ere garaipena lortu zuen Nafarroan (Zizur Nagusia) jokatutako partidan. Alex Olidenen mutilek inolako arazorik gabe irabazi zuten, 23-28. Partidaren hasieran bi taldeen artean ez zen alderik izan, baina lehen zatiaren erdialdetik aurrera gorritxoek beraien alde jarri zuten markagailua, 5-8. Zumaiarrak ez ziren gelditu eta 20. minuturako 5-12ko alde nabarmenaz irabazten zuten. Azken minutuetan etxekoek abantaila zertxobait murriztea lortu zuten, eta atsedenaldian 10 eta 15ekoa zen kanpotarren alde. Bigarren zatian abantaila mantendu ez ezik handitu ere egin zen, 15-22 genuen markagailuan 45. minutuan. Handik aurrera etxekoen erreakzioa iritsi zen, zumaiarrak erlaxatu egin ziren, ez zuten erasoan asmatzen eta nafarrek gora egin zuten. Horrela, 53. minutuan 3 goletara gerturatu ziren, 20-23. Orduan Alex Olidenek denbora eskatu zuen, batez ere erasoko jokoa sendotzeko asmoarekin. Handik aurrera partida amaiera arte ez zuten zumaiarrek arazorik izan eta 23-28 irabazi zuten partida. Aipagarria da Markel Peñalba atezain zumaiarrak egindako lana. Denboraldiko partidarik onena egin zuen eta talde nafarra desesperatzea lortu zuen.

Sumofic Pulpo K.E.-ren aldetik ondorengoek jokatu zuten: Ibon Sasiain (1), Sagasta (1), Aizpurua (1), Gutiérrez (4), Agirre (1), Ioritz Sasiain, Peñalba, Hernández (5), Uribeetxeberria (2), Arrieta (4), Iriondo, Ugarte, Rubio (5) eta Leibar (4).

          Partida Kantabriarrek irabazi zuten nagusitasunez 27-37. Hasiera-hasieratik partidaren jabe egin ziren kanpotarrak eta etxekoek ez zuten inolako aukerarik izan. Partidaren 15. minuturako 4-11 galtzen zuten etxekoek, eta zumaiarrak behin eta berriz saiatu arren, kantabriarren kalitateak eta luzerak hutsean uzten zituen behin eta berriz etxekoen ahaleginak. Hala eta guztiz ere, Alex Olidenen mutilek desabantaila murriztea lortu zuten eta atsedenaldira 12-17koarekin iritsi ziren. Bigarren zatian kanpotarren nagusitasuna mantendu egin zen, partidan zehar abantaila sei goletakoa zen, eta azken minutuetan soilik lortu zuten aldea handitzea. Jokalari zumaiarrak ahal zuten guztia egin arren, azkenean amore eman behar izan zuten kantabriar talde boteretsuarena urka. Bisitariek talde handia dutela erakutsi zuten, jokalari guztiak oso maila handikoak dira eta ziurrenik liga amaieran sailkapenaren lehen postuetan agertuko dira. Sumofic Pulpo K.E.-ren aldetik ondorengoek jokatu zuten: : Iriondo, Ibón Sasiain, Sagasta, Aizpurúa (3), Gutiérrez (1), Agirre (1), Ioritz Sasian, Peñalba, Hernández (2), Xabier (5), Iosu (3), Ugarte (3), Rubio (8) eta Beñat (1).

Azkenik aipatu lehen taldeak urtarrilean Tenerifera egin behar duen bidaian laguntzeko Itziar Beristain izan zela saritua. Zorionak!

SUMOFIC PULPO K.E.-ak TORRELAVEGA-ri EGINGO DIO AURRE

Gaur arratsaldean, 18:45etik aurrera, Sumofic Pulpo K.E.-ak taldeko liderrari egingo dio aurre, Grupo Pinta Torrelavega. Kantabriarrek jokatutako partida guztiak irabazi dituzte, eta oso konplikatua izango da Alex Olidenen mutilentzat emaitza positiboren bat lortzea. Hala ere, gure taldearen ezaugarri nagusia burua inoiz ez jaistea eta amaiera arte borroka gogor egitea da. Iazko denboraldian ere oso konplikatua zirudien partida honek, baina zumaiarrak irabazteko zorian izan ziren. Kantabriarrek irabazi zuten, 36-38, baina irabazteko zailtasun handiak izan eta gero.

Torrelavegako taldeak nazioartean aritzen diren bi jokalari letoniar ditu, pibote errumaniar bat, alboko bielorrusiar bat, hegaleko kanariar bat eta ziurrenik iazko denboraldiko jokalaririk onena, Eugenio González zentrala, iaz Santanderreko Sinfín taldean. Badirudi zumaiarrek ez dutela aukera handirik, baina Lubaki kiroldegiak gotorleku izaten jarraitu behar du, etxean lortu behar baitira puntuak amaieran larrialdirik ez izateko. Beste behin, zalegoen laguntza ezinbestekoa izango da denboraldi honetan Lubakin garaiezinak izaten jarraitzeko. Bi partida jokatu dira zumaian eta bietan etxekoek irabazi dute, lehena Tenerifeko La Laguna-ren aurka eta bigarrena Bizkaiko Urdaneta-ren aurka.

Gogoan hartu partidaren atsedenaldian Kanarietara bidaia bat zozketatuko dela, txartela ordaindu duten bazkide guztien artean gure taldeak urtarrilean Tenerifen jokatuko duen partidan laguntzeko.

Bestalde, larunbat honetan jarriko da martxan Asador Basustak babesten duen emakumezkoen senior taldea. Portugaleten jokatuko dute arratsaldeko 16:30etik aurrera. Talde berri hau Xabier Letamendiak zuzentzen du, eta dirudienez denboraldi zaila izango dute, talde hau oso gaztea baita. Taldea zazpi jokalari jubenil eta zazpi seniorrek osatzen dute.

Decotena Pulpo K.E.-ak ere kanpoan jokatuko du bere partida, Legazpin hain zuzen. Partida igandean izango da eta goizeko 11:15ean hasiko da. Zumaiar gazteek ez dute oraindik garaipenik, ea oraingoa aukera ona duten.

SUMOFIC PULPO K.E.-ak GALDU EGIN ZUEN EREINTZAren AURKA

Zumaiarrek 39-34 galdu zuten Ereintzaren aurka Errenterian

Partida osoan zehar erasoko jokoa nagusitu zen defentsaren aurrean, etxekoen golari kanpokoen beste gol batek erantzuten zion, eta berdintasuna mantendu zen ia lehen zati osoan. Lehen zatiaren amaieran lortu zuten Errenteriakoek abantaila handitzea (20-18), eta horrela iritsi zen atsedenaldira.

Bigarren zatiaren hasieran etxekoek aldea handitzea lortu zuten, eta Alex Olidenek partida geratu zuen zumaiarrak 32-27 atzetik zirela. Handik aurrera zumaiarrek gora egin zuten, Iriondok pare bat jaurtiketa geratu zituen eta erasoak ez zuen hutsik egiten, pibotearekin konbinazioak eta kanpoko jaurtiketek ederki funtzionatu zuten. Partida amaitzeko 7 minutu falta zirela 35-34 jarri ziren zumaiarrak, eta une horretan eskatu zuen etxeko teknikoak hutsartea. Hiru aldaketa egin zituen eta partida dominatzera pasa ziren. Handik partidaren amaierara 4-0eko partzial batek erabaki zuen partida etxekoen alde.

Sumofic Pulpo K.E.-ren aldetik honako hauek jokatu zuten: Iriondo, Peñalba, Sagasta (5), Aizpurua (1), Gutiérrez (2), Agirre (4), Lizeaga, Sasiain, Hernández (6), Uribeetxeberria (6), Arrieta (4), Ugarte, Rubio (3) eta Intxausti (3).

Zumaiarrek 5 puntu lortu dituzte 5 partidatan, sailkapenean zazpigarren postuari eusten diote eta datorren astean Lubaki Kiroldegian liderraren aurka jokatuko dute, Torrelavegako Grupo Pinta taldea. Partida 18:45ean hasiko da, eta atsedenaldian ordaindu duten bazkide guztien artean gure taldeak Tenerifen jokatuko duen partidan laguntzeko Kanarietara bidaia zozketatuko da.