San Pedro Abesbatza Kantuz Kantu…

Martxoaren 8an Emakumeen Nazioarteko Eguna ospatzen da. Gure herrian, azken urteetan ohikoa bihurtu da kontzertu bat izatea egun honen inguruan antolatzen diren ekitaldien artean. Lehen urteetan kontzertuak Forondan izan ohi ziren arren, gaur egun komentuan egiten dira. Iaz adibidez, Ondarruko “Unanue Kamara Korua” taldearen kontzertuaz gozatu ahal izan genuen. Aurten klarinete, piano eta ahotserako musikak izango ditugu entzungai. Horretarako hiru emakume musikari izango ditugu: Ainhoa Franco (sopranoa), Amaia Aldalur (pianoa) eta Marixi Sesma (klarinetea).

Ez da lehenengo aldia izango klarineta eta pianoa uztartuta entzungo ditugula, baina aurten bi musika tresna hauei ahotsa gehituko zaie. Hemen duzue eskainiko diguten egitaraua, era askotako kantekin: alemaniako lieder-ak, opera edo zarzuelako pasarteak eta argentinako doinuak, Carlos Gustavino musika-egilearen lanei esker.

Der Hirt auf dem Felsem, Op.129

Franz  Schubert

Deutsch Lieder, Op.103

Louis Spohr

• Sei still mein Herz
• Das heimliche Lied

Semiramide, Acto I

Gioacchino Rossini

• Bell raggio lusinghier

Tonada & Cueca

Carlos Guastavino

La rosa y el sauce

Carlos Guastavino

Carceleras

Ruperto Chapí

• Las hijas de Zebedeo.

Musikariei begiratuz gero, bai Marixik bai Amaiak ez dute gure artean aurkezpen handirik behar. Marixi askotan entzun dugu klarinetea jotzen ZUMBeko lagunekin, ganbera musika egiten edo orain direla hillabete gutxi, harizko orkestra baten laguntzaz, bakarlari bezala. Amaia ere entzun izan dugu pianoan, bai bakarlari bai ganbera musika egiten, eta nundik idazten ari garen kontutan harturik, ezin dugu ahaztu San Pedro Abesbatzako zuzendaria denik. Ainhoa Francoren izena agian askori ezezaguna egingo zaio. Gaur egun Zumaiako Txori Txiki musika eskolan bibolin eta kantuko irakasle bezala dihardu. Soprano bezala Iruñako Gayarre Antzokian, Donostiako Kursaal aretoan edo Bilboko Arriaga antzokian egindako ekitaldietan parte hartu du, pianoaren edo orkestraren laguntzarekin.

Gure atalaia txiki honetatik, igande honetan, martxoak 7, Komentuan arratsaldeko zazpiretan ospatuko den kontzertu honetara gonbidatu nahi zaituztegu. Gainera, esan digutenez, sorpresak ere izango dira….

Joan zen ostiraleko gauean, Ondartxo Plazan, erritmo beltzen laguntzarekin hotzari aurre egin genion. Rythm&Blues-eko kantuak eta doinu rockeroagoak ere entzun ahal izan ziren. Eskerrak eman ahi diegu zuzenean entzun zuten zaletu sutsuei. Guztientzat hemen dituzue Jon Urbietak ekitaldi honetan atera zituen bideo pare bat, mila esker Jon. Gure argazki galerian ere aurkituko dituzue ekitaldiko argazkiak.

GOSPEL TRAIN

Urte berria hasi dugu eta gainean ditugu ihauteriak.  Festa hau dela eta, ZUMB-ekoekin batera ikuskizun berezi bat egitea pentsatu dugu. Lehenengo aldia da horrelako ekintza batean parte hartzen dugula eta gogotsu gabiltza.

Ekitaldia Musika Eskolatik hasi eta Erribera kalea zeharkatuz hasiko da gabeko 11etan, ZUMBeko lagunek prestatutako ikuskizunarekin. Honen erdian Missisipiko musika beltzean murgilduko gara, Saint Peter’s Gospel Choir-ari esker. Ondartxo Plazan eskainiko dugun kontzertuan gainera, gospel, jazz eta rythm&blues erritmoko kantak izango ditugu.

Gure partehartzea amaitzen denean ordea ZUMB Spirits bandakoek bere arima rockeroena atera eta AC/DC, Deep Purple, Queen eta hainbat talde ezagunen kanta famatuak joko dituzte.

Ea eguraldiak laguntzen digun… Zuen gustokoa izango delakoan gaude.

Badira hainbat urte Zumaiako herriak Itziarra erromesaldia egiten duela eta nola ez, Zumaiako herriarekin batera gure korua. Beraz, ohiturari jarraituz, bertan izango gara datorren igandean, otsailak 7 12:00tan, meza ospakizunean.

Abestuko ditugun obren artean bi azpimarratu nahi genituzke, jaunartzearen ondoren kantatuko dugun “Ave Maris Stella” eta amaieran herriarekin batera abestuko dugun “Zeru ertz batetik…” Itziarko Amaren Koroatzearen ereserkia. Bi abesti hauek egile bera dute Luis Urteaga Iturrioz, aurten musika-egile honen heriotzaren 50. urteurrena ospatzen delarik.

Hemen irakurri dezakezue Jose Luis Ansorenak, Urteagari buruz “Txistulari” aldizkarian idatzitako biografia.  1905tetik 1920rarte bizi izan zen Zumaian, parrokiko organo-jole, koruko zuzendari eta musika bandako zuzendari bezala. Urte hauetan hainbat zumaiarrei musika irakatsi zien, hoien artean Angel Embil eta Jose Azarola piano-joleari. Gure herrian lortutako ospeak, Donostiko parroki garratzitsuenetako batera, San Bizente,  eraman zuen arte. Azpimarratzekoa da organorako idatzi zituen obren artean “handienak” (luzeran eta estiloan) Zumaian idatzi zituela, agian gaztetasunaren indarrak bultzatuta. Obra hauek Parisen eta Leipzig-en argitaratuak izan ziren, ez ordea Espainian. Geroago idatzitakoak berriz “liturgikoagoak” izan ziren, xumeagoak baina beti idazkera musikal ederrez egindakoak. Bere lanak mugitzen zen mundura mugatu ziren, batez ere organorako eta korurako obra sakroak idatzi zituen, baita txisturako obrak ere, Isidro Ansorenaren lagun mina izan zelarik.

Argazki honetan ikusi daiteke garai hartako euskal musika egile garratzitsuen artean, bere ondoan Jose Maria Beobide musika-egile zumaiarra duelarik, bertan Jesus Guridi, Aita Donosti, Nemesio Otaño, Pablo Sorozabal ere agertzen dira.

Gutxi diren arren, bere obra batzuk grabatuak izan dira. Hemen duzue Esteban Elizondok Urteagaren obrekin San Bizenten grabaturiko diskoaren kritika bat. Gabon Koruaren diskoan berriz bi armonizazio aurki daitezke: Birjina maite eta Haurtxoa troxatzen. Azkenik San Pedro Abesbatzaren CD-an, Itziarren abestuko dugun Ave Maris Stella aurkituko duzue.

           Urtearen azken egunetan gaudenez egokia da 2009ri begirada txiki bat botatzea. Urte mamitsua izan da aurtengoa, hainbat gertaerez eta bizipenez betea. Eskaini ditugun emanaldiei begira jarriz gero (kontzertuak, mezak, kalejirak…) hainbat une goxo datozkigu gogora: Alegiko lagunekin egindako harremana, XV. Nazioarteko Musika Jaialdiaren barne ZUMBeko lagunekin egindako kontzertua ere ez zaigu ahaztuko, mikrofoniaren inguruan genituen zalantzak uxatuz, jendearentzat, eta guretzat jakina, oso emanaldi erakargarria egin baikenuen. Honen lekuko, hainbat entzuleek, zeuden jarlekuak agortu ondoren, kontzertu osoa zutik ikusi zutela.

           Ustekabeak ere izan ditugu, Gipuzkoako Abesbatzen Federaziotik jasotako gutunarena adibidez, zorionak ematen zizkiguten baina zergatik? Hasieran ez genekien arren azkenean ohartu ginen, 25 urte igaro dira San Pedro Abesbatza izena hartu eta federatu egin ginela. Eibarren Gautenaren alde emandako ekitaldiaz gain ez dugu honen inguruan ezer berezirik egin, baina urteari begirada bota ondoren ez genituzke egindakoak aldatuko.

           Eta zer esan orain direla egun gutxi Errenterian bizitakoaz, pozik joan ginen egindako lanarekin eta saria jaso ondoren zer esanik ez. Guzti hau hilabeteetan egindako lanaren fruitua da, honen inguruan eskerrak eman nahi dizkiegu koruko partaide guztiei erakutsi duten jarrerarengatik: entsaioak, ahots teknikako klaseak, grabaketen bitartez ikastea, Xexili egunerako dantzatu genituen koreografia dibertigarriak prestatzea, kantatzeak nahiko lan ematen digun arren orain hezurrak ere mugitu behar dira eta….

          Amaitzear dagoen urteari ematen ari garen begiradan ordea ezin ditugu ahaztu bizi izan genituen une gogorrak, gure bihotzak oinazez busti zituztenak. Alegiako kontzertua gogoz prestatzen ari ginela, gure lagun Maite agurtu behar izan genuen gure eztarrietatik inongo doinurik atera ezinik. Bere oroimena gure musikan eta bihotzetan sutsu darrai, hau Itziarren berari eskaini genion kontzertuan agerian geratu zelarik, batez ere amaierako une hunkigarrietan. Une hauek ere ondo erakutsi digute koru bat ez dela oholtzara igotzen den abeslari talde bat bakarrik.

         Eskerrak eman nahi dizkiegu, aurten burututako ekintza guztiak ahalbidetu dituzten guztiei, gurekin ekitaldi ezberdinetan parte hartu duten guztiei (Beheko Plaza Abesbatza, Txintxarri Abesbatza, ZUMB, Maria Zubimendi eskusoinu-jolea, Musika Eskolako Dantza Taldea…), nola ez komunikabideei eta Zumaiako Udalean Kulturan lan egiten dutenei, gure emanaldien berri emateagatik eta hauetan jasotako laguntzagatik. Modu berezi batean ere Mari Carmen Azpeitiari eskerrak eman nahi dizkiogu, koruko partaide bada ere, bere lana bai organo-jole bezala baita entsaioetan ematen digun laguntzagatik ere txalogarria baita. Baleikekoei ere mila esker interneteko munduan gure burua ateratzea ahalbidetu duzuelako.  Eta azkenik gure emanaldietara joan zareten guztioi.

         Baina ez dugu 2009ra begira geratu nahi,  urte honetan bizitako guztiak, datorren urtean egingo dugunaren oinarri izan behar du. Hainbat ideia eta proiektu ditugu hurrengo hilabeteetan burutzeko. Eta nola ez, hainbat kantu ikasteko. Honen inguruan, musika maite eta ikasteko gogoa dutenentzat koruko ateak beti irekita daudela berretsi nahi dugu.      

     Pausuz pausu, kolpez kolpe eta kantuz kantu egiten da gure bidea. Horregatik ez dugu lerro hauei amaiera hobeagorik aurkitu,  Antonio Machadoren hitzen gainean Joan Manuel Serratek idatzitako “Cantares” abestia baino. Hemen duzue abuztuko emanalditik aterata. San Pedro Abesbatzaren izenean, Urte Berri On.

Hainbat lan eta entsaio egin ondoren, abenduaren 26an, Errenterian ospatu zen 63. Gabon Abesti Sariketa Probintzialean parte hartu genuen. Gustora geunden egindako lanarekin eta gozatzera joan ginen. Urduritasunak ere baziren, jakina, baina hauek behar den tentsio puntu hori mantentzeko balio izan zuten. Ereintza Elkarteak antolatzen duen ekitaldia Errenteriako Udal Polikiroldegian izaten da. Bertara autobusez hurbildu ginen, korukideen farren artean, Errenteriako polizi munizipalak “eskoltatuta”. Itxura bitxia zuen polikiroldegiko kafetegiak, baserritarrez jantzitako jendea nagusi zen eta bertako mahaietan gure koruko emakumeak buruzapiak jartzen.

Txapelketa hiru maila ezberdinetan banatuta dago, goizean haurren abesbatzen txanda izan zen. Arratsaldez berriz federatuen eta talde herrikoiena. Federatuen artean bost izango ginelakoan joan ginen, egitarauetan ordea hiru bakarrik agertzen ziren eta horietatik, ez dakizkigun arrazoiengatik, Lazkaoko Kantaka Abesbatzak ez zuen parte hartu.  Zozketari esker parte hartzen lehenak izan ginen. Abestu genuen lehenengo kantua Julen Ezkurrak moldatutako Aritz adarrean - Kattalin izan zen, bien artean agian zailtasun gehiena duena, hasiera goxoa, erritmo aldaketak, matizez betetako kantu ederra. Adierazgarria da orain dela bi urte Tolosako Nazioarteko Abesbatzen Lehiaketan derrigorrezko obra izan zela folklore atalean. Koruaren barnetik askotan ez dugu erreferentzi osoa izaten, baina Amaiaren aurpegia ikustea besterik ez zegoen ondo kantatu genuela jakiteko. Eta honen ondoren, Javi Bustok moldatutako Olentzero abesti herrikoia, hainbat lan eman dizkiguten “orra orra orra” saltokariekin. Benetan pieza alaia eta energiaz betea.

Harmailetara egin genezakeen lana ondo eginda eta itxura ona eman genuelakoan bueltatu ginen. Orduan izan zen, urtero parte hartzen duten, Villabonako Eresargi abesbatzako kideen garaia. J.A Hillerud-en Zatoz Enmanuel eta, hamabost urtez Zumaiako organo-jole, koru zuzendari eta musika bandako zuzendari izan zen, Luis Urteagaren Txiru ta liru eskani ziguten. Nahiz eta gizon gutxi izan lau ahots grabetarako zatiak eskaini zizkiguten eta Urteagaren obra batez ere zailtasun handikoa zen. Guk atzekaldean zegoen harmailetatik entzun genuen baina gurekin joan zirenek  sortu zuten soinua laua zela esan ziguten, agian energi apur bat falta izan zitzaien. Gauzak estu egongo ziren, hala ere beraien emanaldia amaitu bezain laister zalantza bat sortu zitzaigun, ez al zen Eresargikoen emanaldia luzeegia izan?

Federatutako abesbatzen ondoren talde herrikoien txanda iritsi zen. Kantatzeko ohitura handia dago Errenterian eta Gabon Abestien Leihaketa honen adierazgarri da, sei taldeetatik bost Errenteriko abeslariez osatuta zeuden, beste bat Oiartzungo eta Errenderiako jendearekin eta azkenik Usurbilgo Zumarte Musika Eskolako Zumarte Gazte Abesbatza. Estilo ezberdineko piezak eskaini zizkiguten, orohar maila altuarekin: abesti zailak, koreografiak… Aipatzekoa da gizonez osatutako Pakezaleak taldeak Angel Embil musika-egile zumiarraren abesti bat eskaini zigula. Eta ezin dezakagu Zumartekoen emanaldia aipatu gabe utzi, beraien zuzendaria Amaia Aldalur baitzen. Abestu zuten lehenengo kanta A. Adams-en Oh gau santu izan zen, pianoaren laguntzaz, nesken ahotsen garbitasuna eta enpastea izugarria izan zen eta nahiz eta gizon gutxi izan ondo bete zuten beraien lana. Bigarren abesti bezala H. Bittrich-en Festejo de Navidad abestiaren euskarazko moldaketa eskaini ziguten, koreografia alai eta koloretsuarekin. Ondo merezitako txalo zaparrada jaso zuten.

Sari banaketako ordua iritxi zenean, aurretik aipatutakoa baieztatu egin zen, eta sariak eman aurretik Eresargi abesbatzakoei 20%ko penalizazioa ezarri zioten beraien partehartzea araututako 7 minututik gora joan baitzen. Ez dakigu bestela zer gertatuko zen, baina Talde Federatuen artean zegoen Saria guretzat izan zen. Honen aurretik pozik bageunden, sariaren ondoren zer esanik ez. Baina hau ez zen poz bakarra izan, talde herrikoietan Usurbilgo Zumarte Gazte abesbatzak irabazi baitzuen. Zorionak Amaia!, bitik bi ez da marka makala…

Ekitaldiari amaiera emateko partehartzaile guztien artean Ator, ator abestu genuen Amaiaren zuzendaritzapean. Eta hortik autobusera. Itzulerako bidaia, nola ez, kantuz kantu egin genuen eta hortik, txarangarik gabe bada ere, ospatzera joan ginen.

Mila esker etorri zineten guztioi, zuen animoengatik. Hemen dituzue komunikabideetan agertu diren berriak: Diario Vasco eta Noticias de Gipuzkoa. Ea egun gutxitan han ateratako irudi gehiago eta bideoren bat jartzeko  aukera dugun…

Lehenik eta behin, igandean Itziarko parrokian emandako Gabon Kontzertuari buruz bi hitz idatzi nahi genituzke.

Jende gutxi izan arren, gustora egon ginen kantatzen. Momentu unkigarria izan zen gure korukide Maite Irigoien gogoratu genuenean, berari eskeinia izan zen gure kontzertua eta propina gisa abestu genuen Egin Maite kantatzean, bat baino gehiagok negar zotinean ezin izan zuen kanta bukatu.

Hemen duzue, Mari Carmen Azpeitia pianoan lagun zutela koruko emakumeek kantatutako Non degu non abestiaren grabaketa:

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

Eguraldi kaxkarra izan arren, hurbildu zen guztiei eskerrak eman nahi dizkiegu. Hemen duzue, eskaini genuen emanaldiari buruz Mikel Emazabalek bere blogean idatzi duen kritika.

Gabon Kontzertua atzean utzi dugu eta Errenteriako Gabon abestien lehiaketa dugu orain buruan. Datorren larunbatean, abenduak 26, Errenteriako Gabon Kanten lehiaketan hartuko dugu parte. Bi gabon abesti kantatuko ditugu bertan: J. Ezkurraren Aritz adarrean-Kattalin eta Javi Bustoren Olentzero.

Emanaldi honekin bukatzen dugu urtea. Mila esker gure emanaldietan izan zareten guztioi.

San Pedro Abesbatzako kideok, Egu Berri zoriontsu eta Urte Berri on bat opa dizuegu.

Eibarko Coliseo antzokiko emanaldia atzean utzi dugu, gustura kantatutako kontzertua izan zen. Bertan Zumaian uda pasatzen duten jende ugari bildu zen. Hemen duzue han eginiko grabaketa bat:

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

Aste honetan buru belarri sartu gara Itziarko Gabon Kontzertua prestatzera.

12etan izango den mezan parte hartuko dugu, lehenengo zatian agertzen diren bi abestiak Komunio garaian Jainkoak Gizondu eta bukaeran Suite de Navidad abestuko ditugularik.

Bigarren zatian berriz, mota eta erritmo desberdinetako gabon kantak izango dira: zortzikoa, Olentzero-ren bertsio berri bat, ahots zuriek abesturiko Non degun non, Zumaiako Musika Eskolako Helduen Dantza Taldea eta Maria Zubimendi eskuko soinu jolearen laguntzarekin Ator, ator famatua.

Aipamen berezi bat egin nahi dugu: igandeko meza eta kontzertua, urte honetan utzi digun gure korukide Maite Irigoieni eskeini nahi diogu. 

Gogoratu, abenduak 20, eguerdiko 12etan Itziarko parrokian. Zuen gustokoa izango delakoan, iganderarte agurtzen gara.

25 urte igaro dira San Pedro Abesbatza Gipuzkoako Abesbatzen Federazioan sartu zela. Hau ospatzeko asmoz aurtengo GABON KANTUZ jaialdian parte hartzera gonbidatu gaituzte. Ekitaldia datorren igandean izango da (Abenduak 13) Eibarko Coliseo Antzokian eguardiko 12:30etan.

Gutaz gain, Azpeitiko Antxieta, Trintxerpeko Ilunbe  eta Eibarko Sostoa Abesbatzek parte hartuko dute jaialdian. Azpimarratzekoa da ekitaldi honetan jasotako diru-sarrera, autismoaren munduan dabilen GAUTENA elkartearentzat izango dela. Sarrerak salgai daude Kutxanet-en 3€-ko salneurrian.

 Guk eskainiko ditugun abestiak, hauek izango dira:

Xexili eguna atzean utzi ondoren, gabon munduan murgildu gara kanta berriak ikasten.

Sartu berri garen hilabete honetan, emanaldi ugari ditugu:

•  Abenduak 13, 12:30etan: Gabon Kantuz, Eibarko Coliseo Antzokian
• Abenduak 20, 12:30etan:Gabon Kontzertua, Itziarko Parrokian
• Abenduak 26, 18:30etan: Gabon Abestien Lehiaketa, Errenteriako Polikiroldegian

Ea hiru emanaldi hauetan elkar ikusten dugun.