Txinparta

EHEk Tourreko arduradunei bidalitako eskutitza

Aipatu kirol probaren etapa bat Euskal Herritik igaroko da aurten, zehazki uztailaren
12an. 1996ko eta 2003ko edizioetan egin bezala, EHEk Tourreko arduradunei
eskutitza bidali die, euskarari behar duen tratamendua eman diezaioten eskatuz.
Jarraian Christian Prudhomme-i bidalitako gutunaren kopia:

Prudhomme jauna,

Aurten ere urteroko legeari jarraiki Frantziako Txirrindulari Itzuliaren
edizio berria ospatu nahian zabiltzatela jakinekoa da, hori horrela 93. edizioa
izango da aurtengo lasterketa.

Aurtengoan, beste urte batzuetan bezala, Frantziako Itzulia Euskal Herriko
hainbat errepide eta herritatik zehar ibiliko da, Kanbo herrian irteera izango
duen etapan hain zuzen ere, uztailaren 12an egingo den 10. etapan.

Hau dela eta, beste hainbatetan bezala Euskal Herrian Euskarazetik, Euskal
Herri osoan euskararen berreskurapenaren aldeko lanean diharduen elkartetik,
datorren uztailaren 12an Kanbotik irtengo den etapan, euskarak behar duen
presentzia izatea eskatu eta exijitzen dizugu.

Exijitzen diogu, goian esan bezala ez delako lehen aldia horrelako eskaera
bat egiten dizueguna, eta orain arte gure eskaerei muzin egin eta behar adinako
presentziarik ez diozuelako eskaini euskarari Euskal Herria zeharkatu izan
duenean.

Oraindik gaiari heldu eta egokitasun osoz lantzeko nahikoa denbora badagoela
argi dago, beraz horretarako beharrezkoak diren pausoak ahalik eta azkarren
emateko gonbitea egiten dizugu.

Oraingoz, gomendio hori egitera mugatuko gara, baina jakin ezazu aurtengoan
ez dugula onartuko berriz ere Frantziako Itzuliak gure hizkuntza den euskarari
muzin egitea. Eta gure hizkuntzaren duintasuna defenditu beharrean aurkitzen
bagara, ez dugula inongo erreparorik edukiko defentsa hori egiteko behar diren
neurriak hartzeko.

Besterik gabe, gure eskakizuna kontuan hartu eta euskararen presentziak
jantzitako etapa eder bat ikusiko dugunaren esperantzan, jaso ezazu agur bero
bat.