Zibergela

Nork esan zuen bideo jokoen kontsolen munduan guztia asmatuta zegoela? 2006an indarra galduta zegoen Nintendo etxeak Wii kontsola merkaturatu zuen. Ordura arte kontsolen merkatuan jaun eta jabe ziren PlayStation (Sony) eta XBox (Microsoft) zur eta lur utzi zituen. Gainera, urte gutxiren buruan sekulako arrakasta izan du, eta ez hain justu gaztetxoen artean. Wii-k irekitako bideari helduz, beste kontsola bat ateratzear dago, Zeebo izenekoa, kontsolen jokoan laugarren partaidea izan duena.

Bideo jokoen kontsolen inguruan beti egon izan da beraien prezio altuaren inguruko eztabaida. Orain artekoak 300-500 euro bitartean dabiltza, horietan Wii delarik merkeena. Prezio hobea duen arren, dauzkan ezaugarriak beste bienak baino xumeagoak dira. Hala ere, beraietan jokatzeko jokoen prezioa benetan garestia izan ohi da, eta horretaz kexatzen dira erabiltzaileak. Hori dela eta, jokoen kopiak egitea praktika ohikoa da.

Garatzeko bidean dauden herrialdetarako

Faktore horiek guztiak kontuan hartuta, garapenean dauden herrialdetan harrera ona izan dezakeen kontsola berria da Zeebo. Herrialde horietarako ordenagailu eramangarriak merkaturatu diren bezala, oraingoan kontsola bat izango da. Hasiera batean BRIC bezala ezagutzen den herrialde multzoan merkaturatuko da, alegia, Brasil, Errusia, India eta Txinan. Bertan, beste kontsolek eta jokoek duten prezioa ordaindu ezin duten pertsona asko baitaude. Hori dela eta, negozioa egiteko aukera ikusi dute Qualcomm eta Manos Tectoy enpresek bertan. Izan ere, herrialde horietan teknologia berrien erabileran hazkunde handia aurreikusten da.

Ezaugarriak

Zeebo kontsolak ez du CD/DVD irakurgailurik izango, eta jokoak sarearen bitartez soilik erosi ahal izango dira. Horretarako, 3G motako konexio bat dakar, eta doakoa izango dena gainera. Brasilen Claro telekomunikazio enpresak emango du konexio hori. USB motako lau konexio izango ditu, eta SD memoria-txartelarentzako erretena. Disko gogorraren ezaugarriei buruz gauza gutxi esan da oraingoz. RAM memoria berria, 1GB tamainakoa izango du.

Jokoak, merkeago

Aurrez aipatu bezala, jokoak sare bidez bakarrik deskargatu ahal izango dira. Horrela, dendetara iristeko egin behar diren paketatze eta banaketa lanak saihestu egiten dira. Bitartekaritza hauek kentzean, jokoen prezioa askoz merkeagoa izango da, hamabi dolar ingurukoa izango dela kalkulatzen da. Gainera, hasiera batean jokoak ezingo dira ez grabatu ez eta inori utzi ere. Zeebo-ren arduradunek diotenez, prezio baxuekin eta horrelako ezaugarriekin, Brasilen dagoen pirateriari aurre egin nahi diote. Azken helburu hau lortuko den ikusteke dago.

Jokoen ordainketa egiteko Z-Credits deituriko txanpona erabiliko da. Joko bakoitzak hainbat Z-Credits balioko ditu. Horiek gastatu ahala, kontsolatik bertatik Zeebonet sarearen bitartez edo Zeebo-ren webgunean lortu ahal izango dira. Z-Credits hauek kontsolan gordeko dira, eta ezin izango dira beste batekin elkarbanatu. Jokoen erosketan arazorik egon ez dadin, joko osoa jaitsi dela ziurtatu arte ez da kobratzerik egingo.

Jokoak garatzeko hitzarmena

Kontsola izateak ez du ezer askotarako balio ondoren jokorik ez baldin badago bertan jolastu ahal izateko. Hori dela eta, Zeebok hitzarmen bat sinatu du EA, Namco, Sega eta gisako joko-garatzaile garrantzitsuekin. Horrela, 2009. urtearen amaierarako 50 joko eskuragarri izatea espero dute.

Brasilen ekaina hasieran merkaturatzeko iragarrita dago. Oraindik ikusteko dago zer-nolako erantzuna izango duen, baina hasiera batean interes handia piztu du gailu berri honek. Horrelakoetan esan ohi den bezala, denborak jarriko du bere lekuan.

Interneten dauden jokoetan jolastea gustatzen bazaizu, baina azaltzen diren pertsonaiak aspergarriak iruditzen bazaizkizu, hau izan daiteke zure aukera: Fyrebug. Bertan, eskaintzen den joko bilduman jokatzeko aukeraz gain, jokoa bera pertsonalizatzeko aukera eskaintzen da. Hori egiteko, joko bat aukeratu behar da, eta bertan azaltzen diren pertsonaiak beste batzuengatik aldatu. Hori egiteko orduan, erabiltzaileak nahi duenaren irudia jar dezake, argazkiak igotzeko aukera ere ematen du. Horrez gain, jokoaren musika eta fondoa ere aukera daitezke.

Behin jokoa sortuta, modu publikoan edo pribatuan argitara daiteke. Argitaratzen diren jokoetan jokatzeaz gain, gogokoenen artean ere gorde daitezke, puntuazio bat eman eta komentarioak jarri.

Ezaguna da Nintendoren Wii kontsola, nagusiki jokoekin jokatzeko era
hankaz gora jarri zuelako. Baina kontua ez da hor amaitu, eta orain
erabiltzaileak etxetik irten gabe sasoian jartzeko asmoa du. Duela
gutxi kaleratu berri du Wii Fit izeneko jokoa, eta Wii Balance Board
hankak gainean jarriz dabilen plataforma modukoa. Jokoak aukera anitz
eskaintzen ditu, baina lehenengo pertsona bakoitzarentzako
konfiguratzea komeni da. Horretarako, erabiltzailearen oinarrizko
datuak (pisua eta adina esaterako) eman behar dira eta hasierako test
batzuk egin. Hortik abiatuta, jokoak hainbat ariketa proposatzen ditu
erabiltzaileak dituen helburuen arabera. Yoga eta oreka lantzeko
ariketak eta baita korrika edo step modukoak ere eskaintzen ditu.
Kiroldegira joan gabe ariketa batzuk egiteko aukera interesgarria da.
Gainera, hau hasi besterik ez da egin; teknologia berriak eta kirola
gero eta lotuago daude eta laster ikusiko dira honelako joko gehiago.

(more…)

Modan daude adimena lantzeko jokoak. Horietako bat oso ezaguna da,
Nintendo DS eskuko kontsolarako dagoen jokoa. Beste hainbat
plataformatarako ere badira antzeko jokoak, eta, nola ez, Linuxerako
ere badago, gBrainy izena du. Zenbait joko mota eskaintzen ditu: puzzle
logikoak, buruz egiteko kalkuluak eta memoria jokoak. Gnome
ingurunerako programatua dago, baina bestetan ere funtziona dezake.
Interfazea oso intuitiboa da. Bertan jokatzeko lau erabiltzaile mota
daude: berria, haurra, ongi pasatu nahi duen heldua eta entrenatu nahi
duen heldua.

Linux banaketa ezagunenetarako paketeak prestatuta aurki
daitezke. Beraz, jaitsi, instalatu eta jokatzen hastea besterik ez da
falta.

(more…)

Jolasteko moduak aldatu egin dira, eta duela urte gutxi bideo-jokoak tabernetako makinetan ikusten genuen mundu miragarria baino ez baziren ere, gaur egun gertutik bizi dugun fenomenoa dira. Haurrek bideo-jokoekiko duten zaletasunak kezka sortzen du askotan. Kontuan izan behar da, ordea, jolasteko moduak aldatu egiten direla belaunaldiz belaunaldi, eta belaunaldi honek eduki digitalak oso modu zuzenean bizi dituenez, onartu beharra daukagu bideo-jokoek gure seme-alaben aisialdian duten garrantzia.

(more…)

Jolasek beti izan dute paper garrantzitsua ordenagailuaren
erabileran. Hasieran, diskete batean edo gutxitan sartzen ziren; gero,
CDetan; eta orain, berriz, DVDetan. Hala ere, ordenagailuan ezer
instalatu gabe jokatzeko aukera ere badago. Interneten dauden jokoek
eskaintzen dute, hain zuzen ere, aukera hori.

Askotan oinarrizko jokoak izaten diren arren, oso erosoa da
helbide bat idatzi, bertan sartu eta ezer instalatu gabe jolastu ahal
izatea; gainera, orokorrean doan izaten dira. Erabiltzen dituzten
grafiko eta irudiak ezin dira kontsolek ematen dituztenekin konparatu,
baina behar dituzten baliabideak ere askoz gutxiago dira. Jokatzeko ez
zaio joystick-a edo aparteko gailurik jarri behar ordenagailuari, teklatua eta saguarekin aski da.

(more…)

Elhuyar Fundazioak 5-8 urteko haurrentzako bideo-joko didaktiko bat argitaratu berri du. Plataforma-joko dibertigarri bat da, eta matematikaren, hizkuntzaren eta inguruaren ezaguerari buruzko gaiak tartekatzen ditu.
(more…)

Euskaraz bideo joko gutxi dago merkatuan, baina aste berean bi joko argitaratu dituzte euskaraz, eta biak doan, gainera.
Glest da joko horietako bat. Glest denbora errealeko 3Dko estrategia joko bat da; Galiziako joko diseinatzaile talde batek garatutako kode irekiko jokoa da, eta 3arrano elkarteak euskaratu du. Joko horretan, ordenagailuak kudeatzen dituen beste hiru talderen aurka joka dezake erabiltzaileak. Herrixkak eraikitzea, babesteko edo lehengaiak biltzeko unitateak sortzea eta aurkariei erasotzea da jokoaren funtsa. Horretarako, bi talderen artean aukeratu beharko da: teknologikoak eta magikoak. Bi taldeek alde onak eta txarrak dituzte: alde onak erabiliz lortu behar da garaipena. Glesten webgunea www.glest.org helbidean dago; euskarazko bertsioa, berriz, http://www.3arrano.com/jokoak/glest.php helbidean.
Beste jokoa Hattrick da, gaur egun hain modan dauden on line jokoetako bat da. Hattrick erabiltzaile gehien dituen futbol manager simulatzailea da. Joko hori, jatorriz Suediakoa da, eta urteetan munduan zabalduz joan da, gaur egun dituen ia milioi bat erabiltzailetara iritsi arte. Jokoaren euskal erabiltzaileek egin dute itzulpena, eta webgunean jartzen duenez, inoiz egin den itzulpenik azkarrena izan da. Hattrickeko hizkuntzen artean, berrogeigarrena da euskara.

(more…)

Azken datuek diotenez, Wii kontsola PlayStation 3aren bikoitza baino
gehiago saltzen ari da AEBetan: Wiiak 335.000 ale saldu ditu, eta PS3ak
127.000 ale, hain zuzen ere. Bitxia da Sonyren kasua, PS2a oraindik oso
ongi saltzen ari baita, 297.000 ale denbora berean. Wiiren eta PS3ren
aurkaria Microsoften XBox da, eta urtebete lehenago merkaturatu zen,
eta bien artean dago salmentei dagokienez: 228.000 ale saldu ditu.
Japonian ere Nintendoren harribitxi berria emaitza hobeak lortzen ari
da Sonyren bideokontsola baino. Agian, gakoa salmenta prezioan egon
daiteke: Wiia 250 dolarretan saltzen da, eta PS3a 600 dolarretan. (more…)

Bandai etxearen azken asmakizuna merkaturatuko da martxoan: Human Player izeneko tresna horrek aukera ematen du erabiltzailea bera maskota birtual bihurtzeko. (more…)