Zumaiako Arraun Elkartea

Bosgarren izan da Zumaia Euskadiko Txapelketan, gaur, Zierbenan. Berez, seigarren bukatu du, baina Urdaibai kaleratu dutenez epaileek, postu bat irabazi du Telmo Deunek. Baina postua gorabehera, emandako itxura ona izan da, eta horrek balio du orain. Lehen txandan aritu da, eta bigarren izan da, Orioren atzetik; Zierbena eta Isuntza utzi ditu atzean, KAE 1 Ligakoak. Kaikuk irabazi du Txapelketa, oso erraz; bigarren Orio izan da, eta hirugarren, Hondarribia.Luxia pozik da arraunlarien lanarekin: “Gure maila eman dugu, nahiz eta bueltako luzeetan etortzeko kale ona ez eduki. Baina ondo ibili gara. Garbi dugu San Miguel Ligatik  ez jaisteko kanporaketa jokatuko dugula, eta balizko bi aurkari izan daitezkeenak, Zierbena eta Isuntza atzean utzi ditugu. Bi talde horiek onenak atera dituzte, eta gustura gaude gure lanarekin. Gainera, Zierbenak talde onena atera du, propioen muga kontuan hartu gabe (kanporaketan errespetatu egin behar da muga), eta hala ere, aurretik izan gara. Gustura gaude, bai”Gaurko denborak: http://estropa.net/berriak/archive/2010/07/28/kaiku-euskadiko-txapelduna

Etzi, ostiralean, Zumaiako Arraun Elkarteko bazkideei kamixeta gorri bana oparituko die Arraun Elkarteak. Kalari Tabernaren inguruan izango da, 18:00etatik 20:00etara. Bazkide-txartela dutenek erakutsi egin beharko dute; txartelaren jabeak ezin badu azaldu, besteren batek hartu ahal izango du bere izenean, baina betiere txartela erakutsiz. Dena dela, zenbait bazkidek oraindik ez dute jaso txartela etxean, baina horiek ere izango dute kamixeta, bazkideen zerrendan agertzen baitira.  Asteburuan, Zumaia gorriz jantzi behar dugu denon artean.Kamixetak banatzeaz gain, bazkide egiteko aukera ere egongo da, bete beharreko orria bertan hartzeko aukera egongo baita. Aukera ederra da arrauna bultzatzeko, arraunlariei laguntzeko eta klubeko partaide izateko.

Gizonezkoak bai, gizonezkoak Euskadiko Txapelketan aterako dira. Bihar, Zierbenan, 19:00etan, lehen txandan aterako dira, Zierbena, Isuntza eta Oriorekin batera. Bigarren eta azken txandan, Kaiku, Urdaibai, Hondarribia eta San Juan lehiatuko dira. Aukera ona da zumaiarrentzat KAE 1eko bi ontzi indartsunetakoekin lehiatzeko (Zierbena eta Isuntza). Irailean, horietako bat aurkari izan daiteke KAE 1era ez jaisteko kanporaketan, eta erreferentziak ikusteko probestu behar da biharko estropada.

Gipuzkoako Txapelketa irabazi zuten arren, emakumezkoen traineruak ez du parte hartuko bihar, Euskadiko Txapelketan. Euskadiko Federazioak ezarri duen arau batek galarazten dio aukera. Arau horrekin ez daude ados arraunlariak, eta idatzi hau plazaratu dute:

Zumaiako neskak ez goaz Euskadiko Txapelketera

Gipuzkoako txapeldunak izan arren, Euskadiko Federazioaren araudiak ez digu uzten parte hartzen.

Gaur jokatuko da Euskadiko Txapelketa Zierbenan, baina emakumezkoetan, onenak ez dira ariko. Gipuzkoako txapeldunak, esaterako, ez dugu parte hartuko. Euskadiko Federazioaren araudiak ez digu uzten txapelketa preziatu horretan parte hartzen.

 Gu irrikaz geunden Gipuzkoan lortutakoa uretan erakusteko, baina ez digute uzten. Federazioak erabaki duelako jubeniletako hiru arraunlari bakarrik atera daitezkeela ontzi bakoitzean. Eta guk, trainerua osatzeko, gehiago ditugu, oso taldea gaztea baita gurea.  Ez dugu ulertzen araudi hori. Arrazoi askorengatik. Hauek dira :  1.      Gipuzkoako Txapelketa jokatzeko ez genuen arazorik izan, ez zegoelako mugarik adinari dagokionez. Orduan ez ziguten hiru jubenilen araudi hori ezarri.  Zergatik ez du gauza bera egin Euskadiko Federazioak ?  2.      Joan zen urtean ez zuten irizpide bera erabili. Gure kasuan, zortzi jubenilekin egin genuen arraunean, eta horietako hiruzpalau lehen urteko jubenilak. Aurten, hiruzpalau horiek ezin dute parte hartu. Zertara dator aldaketa hau? Ez dauka logikarik gure ustez. Urtebete zaharragoak dira, baina Federazioak ez die uzten parte hartzen.  3.      Araudi honekin, emakumezkoen arraunari ez zaio behar duen bultzada ematen. Kontrakoa egiten zaio: ahuldu, indarra kendu.  4.      Ulertzen dugu araudiak araudi direla, baina garai honetan, jakinik emakumezkoen arraun talde gehienetan jubenil asko daudela, egokiago litzateke araudiari beste interpretazio bat ematea, Gipuzkoako Federazioak oraingoz egin duen bezala.  5.      Euskadiko Txapelketaren maila asko jaisten da arraunlari gazteenei mugak jarriz. Gure kasuan, ez gara osatzen, eta beste klub batzuek ezin izango dute talde onena atera. Horrek guztiak mesede baino kalte gehiago egiten dio emakumezkoen arraunari.  6.      Gizonezkoen eta emakumezkoen berdintasuna sustatu behar dela esaten da, baina arraunaren kasuan gero eta aparteago gaude. Gizonezkoek, Euskadiko Txapelketan, arraunlari guztiak sartzeko aukera daukate, propioen eta ez propioen muga ez baita ezartzen; baina emakumezkoetan, ez zaigu uzten talde onenak ateratzen, adinaren muga horregatik.   7.      Arraunlari gazteenei jartzen die debekua Euskadiko Federazioak, eta ez dugu ulertzen. Beraiek direlako etorkizuna. Beraiek dira zaindu beharreko arraunlariak, eta beraiek jokatu behar dituzte estropadak. Beste Federazioek eta beste Ligetan Euskadiko Federazioaren bidea hartu izan balute, arraunlari gazte horiek ezingo lukete arraunean egin, eta ondorioa larria izango litzateke: arraunean aritu beharrean, beste kirol batera joango lirateke. Horrekin batera, ezin izango ziren Euskotren Liga, Gipuzkoako Liga eta beste hainbat estropada antolatu. Garbi esanda: ez zen egongo emakumezkoen estropadarik.  8.      Euskadiko Federazioak irizpidea aldatu du hilabete gutxian. Trainerilletako txapelketan, gure ontzian sei arraunlari ziren jubenilak, eta ez zuten orain ezarri duten debekua ezarri. Baina, Federazio berdinak antolatzen duen traineru txapelketan, debekua jarri dute. Ez da erraza ulertzen zertara datorren aldaketa hau.   Horiek dira gure arrazoiak, eta ez ditugu bota gure mesedetan soilik direlako. Emakumezkoen arrauna bultzatzeko iritzia da gurea. Urtez urte sekulako lana ari gara egiten klubean, eta beste taldeak ere horretan dabiltza. Euskadiko Federazioaren araudi honekin justu kontrakoa gertatzen dela uste dugu. Bide horretatik segituz gero, akabo emakumezkoen arrauna.  Ez dugu eskatzen araudi osoa aldatzeko. Jubenilen muga ez jartzeko, araudiak ematen du aukerarik, baina oraingoan, Euskadiko Federazioak ez du aukera hori baliatu. Horixe salatu nahi dugu, emakumezkoen arrauna bultzatzen ari garelakoan.  Besterik gabe,  Zumaiako emakumezkoen traineruko arraunlariak eta entrenatzaileak

Ez da ohikoa izango datorren asteburua Zumaian. Arraunak bereganatuko du arreta handia, hiru estropada jokatuko baitira gurean. Larunbatean, 12:00etan, KAE 2 Ligako bederatzigarrena ikusteko aukera egongo da, eta igandean, Euskotren Ligako seigarrena (11:35ean)  eta San Miguel Ligako hamargarrena (12:00etan). Hiruretan ariko da Zumaia, eta ederra litzateke zumaiarrak gorriz janztea, arraunlariei merezi duten babesa emateko.Hiru estropaden aurkezpena etzi egingo da, 12:00etan, Algorri Interpretazio Zentroan.

KAE 2 Ligako estropada Santanderren (Espainia) izan da gaur, eremu zeharo baldarrean, eta halakoetan kale onak izatea erabakigarria izaten da. Zumaia Bri ez zaio halako zorte onik egokitu, eta zazpigarren egin du. Lehen kalean zen onena, eta hortik irabazi dute azken hiru txandetako garaileek, erraz asko. Bigarren kalean joan dira zumaiarrak. Aldeak oso txikiak izan dira bosgarrenaren eta bederatzigarrenaren artean, hiru segundoan sartu baitira bost traineru horiek, eta Zumaia B erdian gelditu da sailkapen txiki horretan. Gaurko emaitzaren eraginez, atzera egin du sailkapen nagusian, eta ohorezko txandatik kanpo da orain: bosgarren dago.Gaurko denborak: http://www.liga-arc.com/eu/regata/68/xli-ciudad-de-santanderLigako sailkapena: http://www.liga-arc.com/eu/resultados

Bere-berean ibili da Zumaia San Miguel Ligako bi estropadetan, Pasaian. Atzo hamargarren eta gaur hamaikagarren. Denboraldia hasi zenetik hor ibili da ia beti, eta asteburuan ez da aparteko berririk egon. Emaitzak gorabehera, orain arraunean gustura egitea da helburua, ez jaisteko kanporaketara  konfiantza bete-betean iristeko. Horixe da helburua, eta egiten den guztia iraileko asteburu horretara bideratuta egongo da.Gaurko denborak: http://www.ligasanmiguel.com/resultados/ver.php?id=eu&r=1269259153Ligako sailkapena: http://www.ligasanmiguel.com/resultados/index.php?id=eu Zumaia atzoko estropadan, Pasai Donibanen. KLAUSSER

Zortzigarren estropada du KAE 2 Ligak igandean. Santanderren, 12:00etan. Hantxe izango da Zumaia B, sailkapen nagusiko postu bikainari eusteko asmoz, eta aukera badu, hobetzeko intentzioz. Lan ona egiteko, ordea, kale zozketak aldekoa izan beharko du, eremua zeharo baldarra delako. Sekulako aldea egoten da kale batetik bestera, eta hori gutxi ez, eta bertako ontzien jabeek estropada eremua gurutzatzeko ohitura txarra daukate, lehiaketa jokoan dagoenean. Edozer gerta daiteke, beraz. Azkeneko txandan aterako da Zumaia B, Portugalete, Getaria eta Santoñarekin.Liga oraintxe bukatuko balitz, zumaiarrek KAE 1era igotzeko kanporaketa jokatuko lukete. Hirugarren dira sailkapenean, 81 punturekin. Bigarren Getaria da, 86rekin, eta aurrena, Portugalete, 95ekin. Laugarren eta bosgarren Ondarroa eta Santoña daude, 77na puntuz. Igandekoa zorte kontua izango denez, hobe onena pentsatzen jartzea: dena aldekoa bada zer?Zumaia B, Getxoko estropadan. KLAUSSER

San Miguel Ligako beste bi estropada jokatuko dira asteburuan, biak Pasaian: bihar Pasai Donibanen (17:30ean), eta etzi, Pasai San Pedron (12:00etan).  Han izango da Zumaia. Joan zen asteko emaitzen eraginez, oso zaila dauka jaitsierako kanporaketa saihestea, eta estropada horietan jarri du arreta. Hala ere, Ligako lehiak garrantzitsuak dira zumaiarrentzat, lehiatzeko sena ez galtzea funtsezkoa baita. Asteazkenean erakutsi zuten gai direla arraunean ondo egiteko, Gipuzkoako Txapelketan emaitza ona lortu baitzuten (laugarren izan ziren). Gustura aritu ziren arraunean, eta sentsazio horiei eustea izan daiteke erronka asteburu honetan.Pasaiko bi estropadetan, ez dira eremu berdinetan ariko. Bihar, ibaian jardungo dute, modu bitxian, gainera: txandako bi ontzi alde baterantz aterako dira, eta beste biak besterantz. Zumaia lehen txandan aterako da, Zarautz, Kaiku eta San Pedrorekin. Igandean, erlojuaren aurka ariko dira; zati bat badia barruan egingo dute, eta bestea itsasoan, Pasai San Pedron ohikoa den bezala.

Sekulakoa egin dute Zumaia Kiroljokoa ontziko arraunlariek Donostian. Balentria. Gipuzkoak txapeldun dira. Emakumezkoak traineruetan lehiatzen direnetik, hauxe da aurreneko bandera Zumaiarentzat (lehen urtean irabazi zituen hainbat, baina getariarrekin bat eginda, Zumaia-Getaria izenarekin). Gaurkoa berezia da, hortaz. Getaria-Tolosa zen faboritoa, baina aise menderatu dituzte zumaiarrek. Hasieratik joan dira buruan, eta azkenean, 30 segundoko aldea egon da. Egundoko estropada zumaiarrena. Lau luzetara jokatu dute, besteetan bi izaten dituzten arren.Poza da nagusi arraunlarien artean, eta halaxe da Joseba Urbieta entrenatzailea ere: “Oso gustura gaude. Estropada latza jokatu dugu, hasieratik nagusi izan gara. Pentsa, bigarren ziabogan, 23 segundo aurretik ginen. Itsaso txarra zegoen, eta ederki moldatu gara”.Gaurko lehen postuak beste sari bat ere badu: Euskotren Ligako azken bi estropadetan, Zarautzen, zumaiarrek egingo dute arraun Gipuzkoaren izenean.Sailkapena: 1. Zumaia (24.22,32); 2. Getaria (24.53,16); 3. San Juan (25.44,12); 4. Orio (27.35,18); 5. Hondarribia  (27.40,16 ) ARGAZKIAK: KLAUSSERArgazki gehiago hemen: http://picasaweb.google.com/Arrauner/GipuzkoakoTxapelketa210710#