laino guztien gainetik

Asteburuan ere orain dugun eguraldi berdintsuarekin jarraituko dugu. Laino ugari, bereziki egunaren hasieran eta bukaeran, eta momentu horietan zirimiria egitea ere posible da. Eguerdi partean berriz, ostarteak irekitzeko aukera dago, nahiz eta batzutan horrelako egoeretan egun osoan zehar hodeiak mantendu. Igande arratsaldean gainera, egoera ezegonkortu egingo da eta ekaitz arriskua ere aipatu beharra dago, bereziki arratsalde bukaeran. Haizea iparraldetik ibiliko da eta honek tenperaturak nahiko fresko mantenduko ditu garai honetarako, maximoak 21 ºC inguruan geratuz, dena den tenperatura atseginak.

 Beraz, San Pedro eguna lanbro lainoarekin hasiko da, beharbada zirimiri pixka bat era bai, gero eguerdi partean ostarte batzuk ireki daitezke, eta arratsalde erditik aurrera berriro ere hodeiak ugarituko dira eta ekaitz ikutuko zaparradaren bat ere eman daiteke. Gauerako, zaparrada arriskua mantendu egingo da eta gainera berriro ere zirimiri pixka bat egiteko aukera dago.

Hurrengo mapa, isobara mapa bat da, baina fronterik ez da irudikatzen. Iganderako iragarpena adierazten digu, eta ikusi dezakegu nola Azoreetako antizikloia ekialderantz zabaltzen den, baina bere zabaltze horretan ipar haizea bidaltzen digu eta horren erruz sortzen da askotan lanbro laino hau, hodei baxuak dira. Penintsulan beroagatik sorturiko depresio termikoa dugu (udan askotan sortzen da hortxe) eta horrek ez dio uzten antizikloiari ekialderantz mugitzen, eta horrexegatik ziri moduan sartzen da (erderaz cuña anticiclónica esaten zaio). Penintsulako beroa dela eta ekaitz zaparradak eman daitezke egunaren bukaera aldera.

Asteburu honetan udan sartuko gara astronomikoki, eta eguraldiak ere udan gaudela adierazi nahiko digu.

Gaurtik hasi eta igande arratsalderarte eguraldi eguzkitsua eta udako tenperaturak nagusituko dira. Egia da goizean lanbro laino pixka bat agertu daitekeela, bereziki igandean, baina egunean zehar eguzkiak ez du traba handirik izango. Eguraldi on honek igande arratsalderarte iraungo du, zeren igande arratsaldean iparra sartuko da eta hodeiak ugarituz joango dira, berriro ere aurreko asteburuan gertatu zen bezala eta zaparradatxoren bat bota dezake bukaeran. Tenperaturak gora egingo du eta maximoak 25-26 ºC inguruan geratuko dira, gehiago igo gabe brisari esker. Astelehenean okertze txiki bat izango dugu, baina ez du ematen asko iraungo duenik.

 Hurrengo mapan 1500 m inguruan izango ditugun tenperaturak aztertu daitezke eta ikus dezakegu Penintsulako beroa nola iristen zaigun. 20 ºC-ko tenperatura asko da 1500 metroko altueran. Horrela, Euskal Herriko barnealdean beroa egingo du 30 ºC-tik gora, baina hego haizeak indar handirik izango ez duenez, Zumaian brisa ibiliko da eguerdi partean. Bestela, brisagatik ez balitz Zumaian ere tenperatura oso altuak izango genituzke.

Ezegonkortasun handia izan dugu azken egunetan eta zaparrada mardulak bota ditu hainbat tokitan, baina egoerak egonkortze aldera egingo du hemendik aurrera.

Asteburua nahiko ondo portatuko dala ematen du. Larunbatean hodeiekin esnatuko gara, baina egunean zehar ostarteak nagusituko dira eta eguzkia ikusteko aukera izango dugu. Igandean hodei gehiago egongo dira zeruan eta baliteke egunaren bukaeran euri pixka bat egitea, hurrengo aste hasieran datorren okertzearen seinale. Tenperaturak atseginak izango dira, maximoak 20 ºC inguruan geratuz.

Hurrengo mapak larunbaterako espero den egoera azaltzen digu, isobara eta fronteen mapa da eta pixkanaka joango gara horrelako mapak aztertzen, baita ere beste era bateko mapak. Kasu honetan, gure gainean ez dugu fronterik eta Penintsulan agertzen den depresiogune horrek ez du inolako eraginik izango (beroagatik sorturiko depresio termikoa da). Baina mendebaldetik agertzen den depresioguneak igande bukeran eta hurrengo asteko hasieran izango du eragina guregan.

Asteburuan eguraldiak egonkortze aldera egingo du, baina oraindik ere iparraldeko haizea ibiliko denez, egia esan indar handirik gabe, euri pixka bat egitea posible da. Dena den, izan dugun astearekin konparatuz egoera hobeagoa izango da. Ostarteak ere zabalduko dira eguerdi partean eta ondo aprobetxatu, zeren eta astelenean berriro ere beste okertze bat etortzeko aukera handiak baitaude.