laino guztien gainetik

Orain arte eta urtarrilaren 20tik aurrera hotza nagusitu da, baina giro lehorrarekin. Hurrengo egunetan euria ere etorriko da eta tenperatura zertxobait errekuperatuko bada ere, giro hotzarekin jarraituko dugu.

Depresio bat gure gainean kokatu da eta horrek giro ezegonkorra ekarriko digu biharko. Gainera iganderako, ekialderako bidea egingo du eta hortik ipar haizea bidaliko digunez giro euritsuagoa nagusituko da igandean.

Horrela, bihar hodeiak nagusi izango dira, baina ostarteren bat irekitzea posible da. Euria ere egin dezake baina ez da asko espero. Haizea nahiko aldakor eta tenperatura hotz samarra. Tenperatura maximoa 10 ºC inguruan kokatuko da eta minimoa 6 ºC inguruan.

Igandean ipar haizearekin euri gehiago espero da. Zerua estalia eta tenperatura antzera edo zertxobait beherago. Tenperatura maximoa 9 ºC inguruan kokatuko da eta minimoa 5 ºC inguruan.

Hurrengo astea antzeko tenperaturekin hasiko dugu eta euriak pixkanaka eguzkiari bidea utziko dio.

Urtarrila bete-betean gaudela ahazteko moduko eguraldia daukagu eta horrelaxe jarraituko du hurrengo egunetan ere. Antizikloi bat Penintsula gainean ipini eta Mediterraneoko toki askotara hedatu da, egonkortasun handia ekarriz. Gainera haizeak hego ikututxo bat badauka eta tenperatura oso epela da garai honetarako.

 Bai bihar eta baita asteburu osoan zehar ere, eguraldiak ildo beretik jarraituko du. Lanbroa edo hodei batzuk agertu daitezke, baina oro har eguraldi eguzkitsua nagusituko da, eta gainera hego ikutuko haizea ibiliko denez momentu batzutan, tenperatura oso atsegina izango da, egunez 17 ºC inguruan eta gauetan ere ez da gehiegi jaitsiko 10 ºC inguruan. Egia da baita ere hego haizeak ez duela indar handirik eta batzutan brisa antzeko zerbait izan dezakegu eta itsasoko tenperatura 13 ºC inguruan dagoenez, airearen tenperatura ere balio hortara hurbilduko daiteke, baina maximoa esandakoa 17 ºC inguruan. Igandean ematen du haizeak indar pixka bat gehiago izan dezakeela eta hor maximoa 20 ºC hurbildu daiteke.

Beraz, egutegiak urtarrilaren erdi-erdian gaudela esaten badigu ere, eguraldiak udaberria ekarri nahi digu egun hauetan. Aprobetxatu, zeren eta urtarrilaren 18 edo 19tik aurrera aldaketa etorri daiteke.

Gaur nabaritu dugu tenperaturaren gorakada eta hurrengo bi egunetan oraindik gehiago igoko da. Dena den esan beharra daukat horrelako egoerak ez direla batere arraroak garai honetan.

 Gaur arratsaldean kabalgata ikusteko momentuan zerua estalia egongo da eta hego haize zakarra ibiliko da bazter guztiak astintzen. Euria ere egin dezake, baina hego haize honekin gehiegi ez du egingo. Tenperatura 15 ºC inguruan kokatuko da arratsaldean.

Bihar egoera antzekoa, hego haize zakarra ibiliko da egun osoan zehar eta zerua hodeiz josita, baina euri kontu gutxi, nahiz eta noizbehinka zerbait egin dezakeen. Tenperatura oso epel, minimoa 13 ºC eta maximoa 19 ºC. Ez dago gaizki urtarrilak 6rako.

7an ere antzera jarraituko du eguraldiak eta ematen du 8 edo 9rako aldaketatxo bat etorriko dela, fronte mardulago batekin eta haize aldaketarekin. Mendebaldera egingo du eta horrekin batera euri gehiago eta zaparrada mardulagoak. Tenperatura ere jaitsiko da 9rako maximoa 13 ºC inguruan geratuz. Dena den, okertze honek ez du gehiegi iraungo eta berriro ere giro epel samarra bueltatuko da. Ikusiko dugu, baina urtarrilaren 15era arte gutxienez ez du ematen hotz handirik pasako dugunik. Hala ere, egunez egun joatea komenigarria da.