laino guztien gainetik

Izan genuen kriston beroa igandean eta astelehenean, baina ederki jaitsi da termometroa. Gaur freskura puntua ere hartuko du 20 ºC-ra iritsi ezinik ibiliko baita tenperatura eta gainera iparraldeko haizea nahiko fin ibiliko da. Zirimiria ere egingo du.

Dena den bihartik aurrera hobera egingo du eguraldiak. Oraindik goizean goiz hodeiak nagusi izango dira eta ezin da baztertu zirimiri pixka bat egitea, baina goizean zehar ostarteak irekitzen joango dira eta arratsaldea polita geratuko da. Tenperatura errekuperatuz joango da eta maximoa 20 ºC inguruan geratuko da.

Astebururako tenperatura gorantz joango da, baina brisa ibiliko denez giro atsegina izango dugu. Larunbatean giro eguzkitsua nagusituko da eta igandean beharbada ekaitz giroa nagusi daiteke, baina hori ikusteko dago. Tenperatura maximoa larunbatean 25 ºC inguruan geratuko da eta igandean ezegonkortasunarekin behera egin dezake, baina 20 ºC-tik gora geratuz.

 Beraz, bihartik aurrera hobera, baina igandean beharbada ekaitz giroa. Gaur San Pedro eguna, egun ilun eta freskoa.

Badator asteburua eta oraingoan bi zati garbi izango ditu. Alde batetik larunbata iluna, freskoa eta euriarekin, bereziki goizean, eta beste alde batetik igandea, eguzkia nagusi delarik. Beraz, kanporako planak egiteko hobeto igandea.

Larunbatean zerua ilun egongo da, hodeiez betea, bereziki goizean. Gainera, euria ere egingo du, nahiz eta gehiegi ez izan. Gero, arratsaldean arintze aldera egingo du eta euria egitea zailagoa izango da, ostarteak ere zabaldu daitezke. Haizea iparraldetik ibiliko da eta tenperatura freskoa izango da garairako. Tenperatura maximoa 18 ºC inguruan geratuko da.

Igandean berriz, frontea urrutiratuko da eta antizikloiak sartuko du muturra. Horrela, oraindik goizaldean hodeiren bat agertu badaiteke ere, azkar asko nagusituko da eguzkia eta egun argi eta polita geratuko da. Gainera, tenperaturak ere gora egingo du eta maximoa 21 ºC inguruan geratuko da.

Egia esan lehengo asteburuan iragarpenak ez ziren fin ibili, eta esan nizuen zaila zegoela iragartzea. Horrelakoak urtean zehar ez dira askotan gertatzen, baina badaude egoera batzuk iragartzeko oso zailak direnak.

Asteburu honetan ematen zuen antizikloia gure gainera etorriko zela eta eguraldi polita izango genuela, baina fronte sistemak asko hurbilduko dira eta ematen du antizikloiaren harresia gainditu egingo dutela, baina hori bai indarra galduta. Horrexegatik hodeiak izango ditugu zeruan, mendebaldetik ekialderako igaroan, baina ez dute euri kontu gehiegirik ekarriko, behintzat oraingo datuak kontuan hartuz.

 Beraz, larunbatean hodeiak izango ditugu zeruan gehienak hodei altuak izango dira, baina zerua nahiko estalia ikusiko dugu. Dena den, ostarteren bat edo beste ere azaldu daiteke. Euri konturik ez dute lagako hodei hauek. Ipar haizea nagusituko da brisa moduan eta tenperatura atsegina izango da, maximoa 19 ºC inguruan geratuz.

Igandean ere antzeko giroa. Hodeiak nagusi eta kasu honetan euria egiteko aukera aipatu beharra dago, bereziki arratsalde partean, zaparrada modura. Berriro ere eguerdi partean iparra nagusituko da eta tenperatura pixka bat gorago geratuko da, maximoa 21 ºC inguruan ibiliz.

Beraz, hodeiak bai baina nahiko alperrak izateko itxura dute oraintxe bertan.

Altueran aire hotza duen poltsa bat kokatuko da Kataluina aldean eta bere kokapenaren arabera ezegonkortasuna handiagoa edo txikiagoa izango da. Egia esan, egoera hauetan zaila izaten da iragarpena egitea, baina dena den ezegonkortasuna hor egongo da.

Gehiegi zehaztu gabe bi egunak, bai larunbata eta baita ere igandea, antzekoak izango dira. Hodeiak nagusi izango dira, baina ostarteak izateko aukera ere ezin da baztertu, bereziki goizetan. Egoera ezegonkor honekin zaparradak botatzeko aukera egun osoan egongo bada ere, arratsaldean probabilitatea altuagoa izango da. Tenperatura gaurkoarekin konparatuz pixka bat gorantz mugituko da, maximoa 20 ºC-ren bueltan geratuz.

Ematen du hurrengo astean ere, behintzat lehen egunetan, ezegonkortasunak jarraituko duela.