laino guztien gainetik

Lehengo asteburuan pasa genuen beroa bai, bereziki igandean, orduan hego haizea ibili baitzen goiz osoan zehar, 38 ºC-raino iritsiz. Gero ipar-mendebala sartu eta freskatu zuen, baina oro har bero handia egin zuen. Asteburu honetan ez dugu horrelakorik izango.

Bihar dexente kaskartuko da eguraldia fronte bat pasako baita, baina larunbatean hobera egingo du. Oraindik ere goizean zehar hodeiak ibiliko dira zeruan eta euria ere egin dezake, baina eguerditik aurrera ostarte zabalak irekiko dira eta arratsalde eguzkitsua geratuko da. Tenperatura ederra maximoa 20 ºC inguruan geratuz.

Igandean jarraipena izango du hobekuntzak eta eguzkia izango da nagusi. Gainera tenperatura ere gorako bidean ipiniko da eta maximoa 24 ºC inguruan geratu daiteke.

Beraz, eguraldi polita eta gainera bero handi hura gabe.

Egoera sinoptikoa aztertuz beroa ikusten da astebururako. Hego haizeak muturra sartu nahiko du, baina brisa ere momentu batzutan agertzea posible da giroa pixka bat freskatuz. Dena den, egoera hauetan komeni da iragarpenak egunez egun jarraitzea, zeren eta edozein aldaketa txikia bada ere, asko aldatu dezake tenperatura. Adibidez, hego haize garbia izango bagenu 35 ºC-ak errez gaindituko lirateke, baina brisa sartzen bada, 30 ºC-tik ez gara pasako. Oraingo datuekin hauxe izango litzateke iragarpena:

 Larunbatean hodei baxuekin esnatu gaitezke, baina desagertzera egingo lukete, zerua nahiko garbi lagaz eguerdi partean. Haizea hego aldetik nahiko suabe eta arratsaldean momenturen batean ekialdeko haizea egon arren, bukaerarako berriro hego haizea nagusituko da. Horrela, tenperatura maximoa 35º C inguruan geratuko da (brisa gehiago edo gutxiago sartzen bada dexente aldatu daiteke balio hau). Gainera, egun hauetan bezala tenperatura minimoa ere altua izango da 20 ºC. Beroaren ondorioz, egunaren bukaeran ekaitza izateko arriskua egongo da.

Igandean giroa ezegonkotu egingo da eta hodeiak eta ostarteak ibiliko dira zeruan egun osoan zehar. Ekaitz zaparradak eman daitezke. Oro har, hego haizea ibiliko denez tenperatura goian mantenduko da, maximoa 36 ºC inguruan geratuz.

Beraz, asteburu beroa espero dugu. Plaian freskatu beharko deu.

Bihar eguraldi dotorea izango dugu jaiaz gozatzeko. Antizikloiaren menpe egongo gara egun osoan zehar eta eguzkia izango da jaun eta jabe. Arratsalde gauerako hodei batzuk agertu daitezke, hodei altu eta xumeak, baina ez dute giroa aldatuko. Gainera, eguerdian brisa irtengo denez bero handirik ere ez da espero, maximoa 25 ºC inguruan geratuz.

Asteburuan ordea, giroa aldrebestu egingo da, bereziki igandean fronte bati esker.

Larunbatean oraindik ere goizean zehar giro polita izango dugu, ostarte zabalekin, baina arratsalde gauerako giroa ezegonkortu egingo da eta zaparrada trumoitsuren bat izateko aukera hor egongo da. Dena den egun osoa kontuan hartuta eguraldiak aguantatu egingo duela esan dezakegu. Tenperatura antzera mantenduko da, maximoa 25 ºC inguruan geratuz.

Igandean bai, erabat kaskartuko da fronte baten bisitari esker. Gainera goizean zehar ematen du iritsiko dela, beraz, goiz goizetik zerua estalita egongo da eta euria gailenduko da. Gainera frontea bete betean iristen denean ezin da baztertu zaparrada trumoitsuak ematea, eguerdi aldera. Haizeak ipar-mendebaldera egingo du goizean zehar eta indartu egingo da. Tenperatura jaitsi egingo da eta maximoa 22 ºC inguruan geratuko da. Kontuan izan Zarauzko estropadak direla (uste dut)  igande eguerdian (bigarren jardunaldia) eta Zumaia lehenengo txandan irteten bada, haize aldaketaren arabera, sorpresa galantak eman daitezke (Zumaia lehen postutik gertu ibili daiteke). Ikusiko dugu noiz ematen den haize aldaketa.

Beraz, bihar eguraldi dotorea eta asteburuan okerrera, bereziki igandean.

Uda nahiko triste doa eta asteburu honetan ere ez gara giro horretatik iresiko. Egia esan, uztaila petrala joan da, giro fresko eta euri egun askorekin, eta abuztuak ere bide berdinetik nahiko du jarraitu, gutxienez abuztuaren 10era arte. Bihar fronte bat iritsiko da eta etzi beste fronte kate bat. Hau da hau panorama. Beraz, asteburuko momenturik egokienak larunbat goiza eta igande arratsaldea izango dira.

 Horrela, bihar fronte horren bisitarekin euria egingo du, bereiziki goizean, gero arintzera egingo duelarik. Tenperatura maximoa 21 ºC inguruan.

 Larunbatean goiza polita izan daiteke. Lehen orduetan hodeiak izango ditugu, baina ostarteak irekiz joango dira, eguerdirako ostarte zabalak izango ditugularik. Momentu hori aprobetxatu beharra dago, zeren eta arratsalderako fronte kate batek hodeiak eta euria ekarriko dizkigu. Oraingo datuekin euria bostak aldera hasi daiteke (hau aldatu daiteke hurrengo irteeretan). Tenperatura maximoa 25 ºC inguruan geratuko da, baina kontuan izan fronte katea iristen denean behera egingo duela, ipar-mendebaldeko haizea ere indarrez sartuko delarik.

Igandean hodeiekin eta euriarekin esnatuko gara, baina pixkanaka hobera egingo du eta arratsaldea nahiko ateri eta ostarteekin geratu daiteke.  Haizea iparraldetik eta tenperatura fresko antzean maximoa 19 ºC inguruan geratuz.

Beraz, kontuan izan nahiz eta larunbat eguerdi aldean eguraldi ona izan, gero berbenarako euria egingo duela.