laino guztien gainetik

Orain arte denborale ugari izan ditugu eta euri asko egin du, baina ez dugu oraindik negu honetan benetako hotzaldi bat izan, eta horixe espero da asteburu honetarako, aire masa oso hotz bat iristea gurera. Europa barrena eta Siberiako aire masa hotz eta lehorra iritsiko zaigu ostiral gauetik aurrera. Hasiera batean aire masa hau lehorra bada ere, itsasotik pasatzerakoan hezetasuna hartuko du eta larunbat gauetik aurrera prezipitazioak lagako dizkigu, seguruenik elur moduan larunbat gauean, eta igandeko lehen zatian. Gerora ikusiko dugu. Beraz, hotza izango da hizpide bihartik aurrera eta hurrengo asteko hasieran, eta gainera elurra beharbada ere bai. Oraintxe bertan Zumaian elurra egiteko aukerarik handiena larunbat gauean eta igande goizaldean eta goizean izango litzateke. Gerora, igande arratsaldean eta astelehenean oraindik ere elurra egiteko aukera hor egongo da, baina aukera hori txikiagoa izango da, epeltzera egingo baitu zertxobait.

Beraz,larunbatean goizean zehar hotza egingo du baina ateri eutsiko dio. Aipatu behar da goiza oso hotza izango dela eta izotza ere egin dezakeela, tenperatura minimoa 0 ºC ingurukoa izango baita. Goizean dena den ostarteak ere ikusiko ditugu eta eguzkia ikusteko aukera ere izango dugu, nahiz eta eguzkiak ez duen lan askorik egingo. Tenperatura maximoa 5 ºC-ra iritsiko da. Arratsaldean hodeitza ugaritzen joango da eta iluntzerako elur pixka bat egin dezake. Gauerako prezipitazio gehiago espero da eta seguruenik elur moduan egingo duenez posible da kaleak zuritzen hastea.
Igandean elurra egiteko aukerarekin jarraituko dugu goiz osoan zehar, eta baliteke gainera kaleak zuri daudela esnatzea. Gero arratsaldean botatzen jarraituko luke, baina zertxobait epeltzera egingo duenez, elurra, euria edo elur bustia egin dezake. Egun osoan zehar ekaitz zaparradak eta txingorra ere bota dezake. Giroa benetan hotza izango da, tenperatura minimoa 0 edo 1 ºC-koa izango da eta maximoa 6 ºC ingurukoa. Haizea iparraldetik ibiliko da bizi-bizi hotz sentsazioa areagotuz.
Hurrengo aste hasieran hotzarekin jarraituko dugu, baina epeltze txiki bat espero dugunez, euria izango da botatzen duena.
Beraz, esandakoa hotz bolada baten aurrean gaude eta bihar gauean hasiko gara igertzen, momenturik hotzena asteburua izango delarik. Gainera, elurra egiteko aukera handia da larunbat gauean eta igandeko lehen partean. Igandean esnatzen garenean baliteke dena zuri egotea. Ikusiko dugu.

Dagoeneko hementxe daukagu hotz bolada. Tenperaturak nabarmen jaitsi dira eta horrelaxe geratuko dira igandera arte. Azkenean iritsi zaiguna ez da izango 1956an gertatu zenaren antzekoa, zeren eta aukera hori bazegoen orain dela 3 egun genituen iragarpenetan, baina hala ere iritsi zaiguna ez da iristen urtero.

Tenperaturak oraindik ere beherago joango dira bihar eta bereziki larunbat goizean.

Zumaian izango ditugun tenperaturak:

Bihar, ostirala: tmin: -3 ºC  tmax: 3 ºC

Larunbatean: tmin: -5 ºC  tmax: 5 ºC

Igandean: tmin: 3 ºC  tmax: 9 ºC

Beraz, momenturik hotzena larunbat goiza izango da. Ostiral eta larunbata bitarteko gau horretan zerua nahiko garbi geratu daitekeela ematen du eta horrexegatik tenperatura minimoak behea joko du. Zumaian horrelako tenperatura orain dela aspalditik ez da izan. 1985eko urtarrilaren 6an -6 ºC izan genuen Zumaian eta ordutik ez da tenperatura hori izan. Larunbat honetan balio horretara hurbildu daiteke.

Elur kontuak berriz gaur arratsaldean oraindik egin dezake, baina bihar ez da prezipitaziorik espero, beharbada goizaldean zertxobait. Arratsaldean ostarte zabalak irekiko dira.

Larunbatean eguna argi hasiko da, tenperatura baxuekin, baina goizean zehar estaltzen joango da eta eguerditik aurrera prezipitatzen hasiko da. Ematen du hasieran elurra izango dela, baina pixkanaka elur bustia izango da eta bukaeran euritara joko du. Tenperatura goiz hotz baten ondoren, pixkanaka errekuperatzen joango da.

Igandean fronte bero batek euri asko ekarriko digu, baina beste aldetik tenperatura asko igoko da. Beraz, igande euritsua espero dugu.

Hurrengo astean berriro ere Europako aire hotza sartu daiteke berriro eta tenperaturaren beherakada handia ekarri berriz ere, baina hori ikusiko dugu.

Igande honetan itsasoa nola egongo den, denok nahi dugu jakin, bereziki lehengo igandean eduki zuen garrantzia eta gero. Ba ematen du oraingoan ere ez dela bare egongo eta emozioa ere oraindik egon daiteke gizonen estropadan. Nesken estropadan dudarik gabe emozioa hor egongo da dagoen itsasoa dagoela.

Iragarpenak oraintxe bertan zera esango luke:

Igandean hondoko itsasoa handituz joango da goizean zehar eta estropada momenturako ipar-mendebaldeko hondoko itsasoa 2 metro ingurukoa izango da 13 segunduko periodoarekin (eta hori ez da gutxi). Bestalde haizea goizean zehar ipar-mendebaldetik finkatzen joango da eta baita ere indartuz, ez ordea aurreko igandean bezain beste. Goizeko hamaiketan ia haizerik ez da egongo, orduantxe hasiko baita haizea ipar-mendebaldetik finkatzen (batazbeste 3 km/h-ko abiadura). Baina hamabitan ipar-mendebaldeko haizea 10 km/h-ra iritsi daiteke eta bigarren tandan 13 km/h-ra.

Hau ikusi ondoren esan dezaket itsasoa bare ez dela egongo. Haizeak beharbada ez du haize olatu gehiegi sortuko, eta beraz lehengo igandearekin konparatuz oso ezberdina izango da egoera. Garrantzitsuena hondoko itsasoa izango da, 2 metro ingurukoa. Honek esan nahi du olatu erregularrak eta bueltan hartzeko modukoak izango direla, eta gainera handiak. Horrek diferentziak markatu ditzake. Beraz, itsasoa lehengo igandearekin konparatuz ez da horren nahasia izango, haize olatu gutxi, baina olatuak izango ditugu eta ez dira txikiak izango.

Aupa Zumaia!!!!!

Bihar beroa albiste izango da. Hego haizea espero dugu, gainera indarra hartuz joango da egunean zehar eta bukaerarako nahiko zakar joko du. Hego haize honek tenperatura gorantz bultzatuko du eta 28 ºC-ko maximoa izan dezakegu. Ez dago gaizki garai honetarako. Dena den, hau ez da gauza arraro bat eta badaki garai honetan horrelakoak egiten. Bihar gainera eguzkia izango da jaun eta jabe eta horrek ere lagunduko du tenperatura igotzen.

Larunbatean goizean oraindik ere hego haizea izango da nagusi eta eutsiko dio oraindik. Arratsaldeak aurrera egin ahala hodeiak ugarituz joango dira eta zaparradaren batekin bukatu daiteke eguna. Gainera haize aldaketa emango da eta hegotik iparrera pasako gara. Horrek tenperaturaren beherakada ere ekarriko du, bereziki iganderako. Tenperatura maximoa 23 ºC inguruan geratu daiteke.

Igandean ipar haizearekin hodeiak izango dira nagusi eta euria ere egin dezake. Dena den, oraintxe bertan ez dago batere garbi zenbat egin dezakeen. Hori bai, tenperatura nabarmen jaitsiko da eta maximoa 15 ºC inguruan geratuko da. Beraz, aldaketa handi samarra.

 Dena den, okerraldi honek ez du gehiegi iraungo eta asteartetik aurrera berriro ere giro antiziklonikoa bueltatuko da.

Aipagarria biharko tenperatura. Aprobetxatu.

Gaur arratsaldean jokatuko da Kontxan sartzeko estropada eta itsasoaren egoera ez da txarra izango. Ipar mendebaldeko haizea ibiliko da batazbestekoa 10 eta 15 km/h bitartean kokatuz. Olatuak metro bete inguruan. Beraz, bare-bare ere ez dugu izango itsasoa.

Bestalde, astebururako eguraldi bikaina espero da. Oro har eguzkia izango da nagusi eta tenperatura oso atsegina izango da maximoak 20 eta 25 ºC bitartean geratuz. Beharbada, igandean zertxobait beroago 25 ºC inguruan ibiliko da termometroa, baina dena den eguraldi dotorea eta bero handirik gabekoa, oso aproposa bai hondartzara joateko edo baita ere iganden Kontxara hurbildu (estropada ikustera) eta egun pasa egiteko.

 Datorren astean 7tik aurrera aldaketa garrantzitsua etorri daiteke, udazken giroa ekarri bait dezake mendebaldetik hurbilduko zaigun depresiogune batek. Honekin tenperaturaren beherakada eta euria iritsiko lirateke, haizea ere protagonista izan litekeelarik. Ikusiko dugu hori. 

Ostiralean Euskal jai eguna ospatuko da eta eguraldiaren nondik norakoak eman nahi ditut. Ez da eguraldi eguzkitsua espero, baina batzutan horrek ere festari lagundu egiten dio, zeren eta jendea hondartzara joan beharrean kalean ibiltzen baita.

 Beno, gaur gauerako fronte bat iritsiko zaigu eta eguraldiaren aldaketa ekarriko du. Horrela, bihar goizean euria, ipar haizea eta tenperatura freskoa nagusituko dira. Arratsaldean, zerbait arintzea posible da, frontea pasata egongo baita, baina hodeiek jarraituko dute nagusitzen.

 Ostiralean fronterik ez dugu izango, baina antizikloia Atlantikoan ipinita, ipar haizea bidaliko digu eta horrekin hodeiak izango dira nagusi. Horrela, goiz goizetik zeru estaliak eta zirimiria nagusituko dira eta gainera ipar haizearekin tenperatura fresko-fresko mantenduko da, maximoa 19 ºC inguruan geratuz. Arratsaldean, zertxobait arindu dezake, eta ostarteren bat edo beste ere zabaldu daiteke, baina une batzutan berriro ere zerua estaltzeko eta euri pixka bat egiteko aukera ezin da baztertu. Beraz, udako eguraldia ez dugu izango, baina dena den euri askorik egitea ere ez da espero. Horrelako eguraldia festaz gozatzeko nahiko aproposa izan daiteke, jendea hondartzara joan beharrean kalean geratuko baita, giro polita sortuz.

Larunbatean ere nahiko goibel ibiliko da eguraldia, eta igandetik aurrera hoberako bidea hartu dezake, baina egun dexente falta dira eta beste aukera batzuk ere badaude. Dena den, probabilitate handiena oraintxe bertan eguraldiaren hobekuntza izateko aukerak du. 

Hego haizea dabil agintari aste osoan eta gainera momentu batzutan gogor jotzen ari da.

 Astebururako egoera berezia daukagu gure aurrean. Atlantikoan Penintsularen hego mendebaldean ziklogenesi prozesu bat gertatuko da probabilitate handiarekin ostiral gauean eta azkar asko sakonduko da, bapateko ziklogenesia izan daitekeelarik. Horrek zikloi sakon bat sortuko du eta Galizia aldetik pasako dela ematen du. Momenturik sakonenean 970 mb-ko presioa izan dezake bere erdigunean. Horrek hego aldeko haize bolada bortitzak sortu ditzake Euskal Herri osoan eta baita ere Zumaian. Dena den bere ibilbidea oraindik ere zehazteko dago eta aldaketa nabariak eman daitezke. Beraz, iragarpenen jarraipen bat egitea komeni da.

Oraintxe bertan ditugun datuekin hauxe gertatu daiteke.

Larunbatean zeruan hodeiak izango dira nagusi, baina ostarteak ere zabalduko dira. Euri pixka bat egin dezake baina ezer gutxi. Aipagarriena haizea izango da. Goizean hego-ekialdeko haizea ibiliko da eta bolada gogorrak eman daitezke, 80 km/h-koak, baina okerrena arratsaldeak aurrera egin ahala etorriko da. Orduan hego-mendebaldeko haize boladek 120 km/h-ko abiadura gainditu dezakete. Hori horrela mantenduko da igande goizaldean ere. Gero igandean gauzak bere onera bueltatuko dira. Bestalde, larunbatean tenperatura oso altua izango da 22 ºC inguruan geratuz maximoa.

Igandean hodeiak eta ostarteak tartekatuko dira, euri pixka bat egitea baztertu gabe. Tenperatura jaitsi egingo da eta maximoa 15 ºC-tan geratuko da eta haizea mendebaldetik ibiliko da, goizaldean oso zakar, baina egunak aurrera egin ahala indar gutxiagorekin.

Iragarpen guztia zikloi horren ibilbidearen eta sakontze prozesuaren menpe dagoenez, iragarpen berrien jarraipena egitea komeni da.

Beraz, kontuz haizearekin asteburuan.