Baleike

Zumaiako ikasleek biodibertsitatearen aldeko konpromisoa berretsi dute

Erredakzioa — Thu, 17 May 2012 08:46:48 +0000

Zumaiako ikastetxe guztiak Eskolako Agenda 21 heziketa-programan hartzen dute parte 2005etik. Ikasturte bakoitzean herriaren egoera aztertzen dute, gai zehatz baten diagnostikoa eginez. 2011-2012 ikasturtean, herriko biodibertsitatea landu dute, ikasgelan saio teorikoak eta ekosistema naturalak ezagutzeko irteerak eginez.

Egungo egoera aztertu ondoren, herrian aurkitu dituzten arazoak konpontzeko proposamenak luzatu dizkiete udal ordezkariei, maiatzaren 15ean ospaturiko udalbatzarrean. Horrela, alkatea, ingurumen zinegotzia eta ingurumen teknikaria ikastetxe bakoitzeko ikasle ordezkariekin elkartu dira. Ikasleek egindako proposamen bakoitzari erantzuna eman zaio, eta Udalak etorkizunera begira dituen proiektuak azaldu ditu.

Modu berean, ikasleek biodibertsitatearen alde hartzen dituzten konpromisoak aurkeztu dituzte: babestutako eremuak eta izaki bizidunak errespetatzea, garbiketa taldeetan parte hartzea, besteak beste. Proiektua garatu ahal izateko, hezkuntza-komunitatea eta Udalaren arteko harremana ezinbestekoa da. Horregatik, komunikazio hori indartuko duten bilerak burutu dira ikasturtean zehar.

Gipuzkoako Belaontzi Txapelketa jokatuko da asteburuan Zumaian

Erredakzioa — Thu, 17 May 2012 08:42:21 +0000

Maiatzaren 19an eta 20an, Gipuzkoako VII. Belaontzi Txapelketa ospatuko da Zumaiako uretan –Zumaiako Udala Saria–. Gipuzkoako, Bizkaiko eta Lapurdiko ontzi eta eskifaiak izango dira lehian.

Txapelketari hasiera emateko hitzordua larunbateko 13:00etan jarri da eta txandak nagusiki haizealde eta haizebe (barlovento-sotavento) erara jokatuko dira, baldintza atmosferikoek lagunduz gero; itsasaldeko ibilbide bat egiteko aukera ere ez da alde batera utziko. Igandean aldiz, txandak 12:00etatik aurrera hasiko dira.

Zumaiako estropada eremua berezia da eta aukera taktiko eta estrategiko ugari ematen ditu, batez ere hego osagaia duen haizea nagusi denean.

Ustez faborito diren Maitena, Phoenix eta Akelarre eta beste belaontziek elkar neurtzeko aukera izango dute denboraldiko txapelketa garrantzitsuenetakoan.

Igandean ospatuko da Indamendi eguna

Baleike — Thu, 17 May 2012 08:27:37 +0000

Maiatzaren hirugarren igandea izanik, etzidamu ospatuko dute herriko mendizaleek Indamendi eguna. Goizeko 9:00etan abiatuko dira Beheko plazatik, Indamendiko tontorreraino. Han salda beroa, haragi eta txorizo egosia dastatzeko aukera izango da. Ondoren sari banaketa eta opari zozketa egingo dute. Aurtengo saridunak:

Maria Amonarriz Agirre, Jurgi Esnal Zuluaga, Ane Etxabe Yeregi, Iñigo Mendizabal Eyang eta Ioritz Ponce Plaza.

‘Plazatik Gaztetxera’, bertso txapelketako saioa egingo da larunbatean Torreberrin

Baleike — Thu, 17 May 2012 08:20:58 +0000

Plazatik Gaztetxera bertsolari gazteen txapelketa martxan da beste urte batez. Lehen fasearen baitan, Zumaian ere bertso-saioa izango da. 21:00etatik aurrera, luntxa izango da Torreberri Gaztetxean, eta jarraian, kanporaketa hasiko da. Finala Eibarren izango da, ekainaren 30ean. Bertsolariek bikoteka hartuko dute dute. Hauek dira Zumaian kantatuko duten bertsolariak:

-Jagoba Apaolaza eta Ander Solozabal.
-Mikel Artola eta Imanol Irazustabarrena.
-Maddi Gallastegi eta Jon Rubio de Pinedo.
-Hodei Iruretagoiena eta Joritz Bastarrika

Txapelketari buruzko informazio gehiago.

Darahli 2012 proiektuaren bideo emanaldia

Baleike — Thu, 17 May 2012 08:14:04 +0000

Apirilean sahararren errefuxiatu kanpalekuetara egindako bidaiaren bideo eta argazki emanaldia egingo du gaur Darahlik, Oxford aretoan, 19:00etan.

Broadway Beheko plazan, Astinduren eskutik

Baleike — Thu, 17 May 2012 08:08:59 +0000

Astinduko kideek lan handia egin dute Broadway ikuskizuna prestatzen. Argazkia: Arnaitz Rubio Aprea

Maiatza dantzan jaialdia antolatu du Astindu dantza elkarteak datozen bi asteburuetarako, “maiatza nazioarteko dantzaren hilabetea delako”. Lau saio izango dira guztira, bihartik hasita. Ekitaldi nagusia, baina, Astinduko kideek beraiek eskainiko duten Broadway ikuskizuna izango da. Saioa larunbatean izango da, maiatzak 19, 22:30ean hasita, eta Cabaret edo Chicago bezalako musikal ezagunetako hiru koreografia prestatu dituzte. Amaia plazatik abiatuta, kalejira egingo dute Beheko plazara. Bidean, koreografia batzuk dantzatuko dituzte, eta behin plazan, ikuskizun osoa jarraitzeko aukera izango da. Sorpresak ere izango direla agintzen dute. Hemen daukazue egitarau osoa:

Argazki bilduma: Broadway prestatzeko entsaioak
Erreportaje zabala Baleike aldizkarian

Maiatza dantzan

Maiatzak 18, ostirala

19:30ean, Txori Txiki musika eskola eta dantza eskolako heldu nahiz haurrek parte hartuko dute. Euskal dantzan oinarritutako dantzak dira. Hala, aurten dantza klasikoa eta garaikidea ere uztartu dituzte. Kofradiatik hasi eta kalejiran Beheko plazaraino joango dira. Bertan eszenatoki bat egongo da eta han dantzatuko dute guztiek.

Maiatzak 19, larunbata

19:30ean, Jhonson & Josune eskolakoak ZUMBA erakustaldia egingo dute. Bertan batxata, merengea eta antzeko dantzak musika komertzialarekin uztartuko dituzte. Hauek ere Kofradiatik hasi eta Beheko plazara bidean kalejira egin eta eszenatoki berberean amaituko dituzte lanak.

22:30ean, Astindu elkarteak bazkideentzat antolaturiko proiektu bat aurkeztuko dute. Broadway izenpean, musikal ezberdinetako abestiak erabiliaz koreografia berriak sortu ditu Isaak Aranberri irakasleak. Ondartxo plazan hiru koreografia egin, Erribera kalean zehar kalejiran joan eta Beheko plaza osoan amaituko da saioa. Ez da luma, argi, fleko eta dotoreziarik faltako!

Maiatzak 27, larunbata

19:30ean Sensala eskolaren eskutik Capoeira erakustaldia egingo digute. Beheko plazatik kofradiara kalejira eta bertan azken erakustaldia egingo dute.

“Talentu ihesa” ekiditeko ekimena jarri du martxan Udal Elkarteak

Baleike — Wed, 16 May 2012 13:19:04 +0000

Prestakuntza maila oso altua izan arren, askotan gazteek kanpora joan behar izaten dute lan bila. Gazte horiei eskualdean bertan aukerak eskaintzeko ekimena jarri du martxan Urola Kostako Udal Elkarteak, lau proiekturen bitartez.

Informazio zehatza: Udal Elkartea

Aste Berdearen egitaraua

Baleike — Wed, 16 May 2012 13:05:22 +0000

Ekainaren 2tik 10era antolatu da aurten Aste Berdea, ingurumenarekin lotutako hainbat ekintzez osatua. Hemen daukazue egitaraua:

Maiatzak 19, larunbata

-Helduen Argazki Rallya, 8.00-14.30, KZgunean.
-Haurren Argazki Rallya, 10.00-13.30, Algorrin.

Ekainak 4, astelehena

-Errausketari ateak ixten dokumentalaren emanaldia, 19.00, Aita Marin.

Ekainak 5, asteartea

-Kutsidazu bidea hondakinen inguruko jolasa, 17.30-19.30, Algorri Interpretazio Zentroan.
-Atez ate hondakinen bilketa sistema, Kataluniako esperientzia hitzaldia, 19.00, Alondegian. Hizlaria: Eduard Moreno, Canet de Mar udalerriko ingurumen teknikaria.

Ekainak 6, asteazkena

-Sorgin-orratzen sekretuak hitzaldia, 19.00, Algorrin. Hizlaria: Iñaki Mezquita, Aranzadi Zientzia Elkartea.

Ekainak 7, osteguna

-Argazki Rallyen Sari banaketa, 19.00, Alondegian.

Ekainak 8, ostirala

-Zaragozako Ecozine Ingurumeneko Zinemaldiaren 2011. edizioko zinema-emanaldia, 19.00, Aita Marin.

Ekainak 9, larunbata

-Algorriko jolasa Zumaiako ekosistemen inguruko tailerra, 11.00-13.00, Algorri Interpretazio Zentroan.
-Baratza balkoian, 11.00-14.00, Beheko Plaza.
-Algorri Interpretazio Zentroan ate irekiak.

Ekainak 10, igandea

-“Jolas eta zilarrezko txartela” antzerkia, 12.00, Aita Mari arteoan.
-Algorri Interpretazio Zentroan doako “barne bisita eta oinezko irteera geologikoa”, 12.00-13.30.
-Algorri Interpretazio Zentroan ate irekiak.

Ekainak 2-10

Erakusketa: “Sorgin-orratzen sekretuak” Aranzadiko partaidea den Iñaki Mezquitaren argazki erakusketa, Algorri Interpretazio Zentroan.

‘Birziklapena bai, atez atekorik ez’ plataforma aurkeztuko dute datorren astelehenean

Baleike — Wed, 16 May 2012 09:55:28 +0000

Maiatzaren 21ean egingo dute Birziklapena bai, atez atekorik ez’ plataformaren aurkezpena, Alondegiko Oxford aretoan, 19:00etan. Sinadura bilketa izango da platafomaren ekimenetako bat. Horrela dio zabaldu duten prentsa oharrak:

“Zumaiako herritar talde bat gara. Zumaiako Udalak inposatu nahi duen “Atez Ateko” zabor bilketa sistemaren aurka gaude eta sistema horrekiko gure desadostasuna azaltzeko herri plataforma bat osatu dugu. Herritarren sinadurak bilduko ditugu, prentsa ohar baten bidez jakinaraziko den toki eta egunetan. ”Atez Ateko” zabor bilketa sistema horren aurka dauden zumaiar guztiei dei egiten diegu beren sinadurarekin ekimen honi babesa eman diezaioten. ‘Birziklapena bai, Atez Atekorik ez’ plataformaren aurkezpena Alondegiko Oxford aretoan egingo da datorren astelehenean, maiatzak 21, arratsaldeko zazpietan”.

Zumaiako Herri Eskola Gipuzkoako Txapeldun

Baleike — Wed, 16 May 2012 09:09:47 +0000

Zumaiako Herri Eskolako 5 gaztetxok irabazi dute taldekako Gipuzkoako Txapelketa, alebin mailan. Eskola-kirolak ekimenaren barruan jokatu ohi da taldekako erlojuren kontrako txapelketa, eta bigarren urtez jarraian Zumaiako Herri Eskola nagusitu da. Hernanin jokatutako txapelketan, Mattin Etxaniz, Julen Mujika, Xabat Gastañares, Ekain Saizabal eta Ioritz Manterola izan ziren Gipuzkoako onenak. Jesus Mari Osa eta Alberto Urangaren ardurapean dabiltzan infantil eta alebinentzat oso emaitza inportantea izan da hau.

Datorren asteburuan iraupeneko txapelketa jokatuko da Urretxun. Alebin mailan, Ioritz Manterolak eta Gaizka Gurrutxagak badute aukerarik podiumeko borrokan sartzeko. Infantil mailan, berriz, finalerako sailkatzeko lehen helburua errezen gainditu beharko luketenak Markel Castillo eta Ian Zanon dira. Nesken artean, Eider Manzisidorrek ere baditu aukerak podiumeko borrokan sartzeko, nahiz eta aurten maila estreinatzen duen.

Gorka Etxabe, pistako Espainiako Txapelketara

Gipuzkoako eta Euskadiko txapelketak irabazi ondoren, Gorka Etxabek asteburu honetan Espainiako pistako txapelketetan hartuko du parte hartuko Euskadiko Selekzioarekin. Tafallan jokatuko dira txapelketak, ostiraletik igandera bitartean.

Errepidean, aurreko larunbatean Zumaian ihesaldi onean sartu ez arren, lan ona egin zuten Zumaiako txirrindulari Elkarteko-Viveros San Antongo kadeteek. Haritz Eizagirre erdi gaisorik ibili arren, denboraldiko posturik onena lortzeko gauza izan zen, 7. Amaitu baitzuen lasterketa. Gorka Etxabe gogotik saiatu zen hasieran ihesaldiekin, ez zuen zorterik izan baina azkenean 19. sailkatu zen; eta Mikel Santxezek ziklismoko bere lehen denboraldian tropelean amaitzeko gaitasuna izan zuen: 36. izan zen. Bizi-bizi ibili ziren txirrindulariak Zumaian, eta ia 39 kilometro orduko abiaduran osatu zuten lasterketa. Larunbat honetan Ataunen izango dute karrera kadeteek.

Juniorrek, berriz, bi lasterketa izan zituzten aurreko asteburuan. Arantzazuko igoeran, larunbatean, Ibon Egañak eta Jose Manuel Castillok karrera bukatu zuten. Ibon Egañak oso lan duina egin zuen, eta sailkapeneko erdi parean heltzea lortu zuen. Igandean, berriz, Mutrikun Euskadiko Txapelketa jokatu zen eta ez zuten lasterketa amaitzerik izan.

Igandean Donostiako Egia auzoan dute lasterketa.