Pulpoeskubaloia

Urtero bezala, aurten ere heldu da azkenetara eskola arteko eskubaloiko txapelketa. Euria, hotza, haizea, eguzki gozoa eta ilusioa gainezka izan ditugu lagun hiru hilabete hauetan. 36 talde izan ditugu lehia gogorrean, nor baino nor. Benjamin mailako nesketan 10 talde, benjamin mailako mutiletan 9 talde, alebin mailako nesketan 8 talde eta alebin mailako mutiletan 9. Horretaz gain, tropel bat entrenatzaile, dozena erdi epaile, ikastetxeetako kirol-arduradunak eta han-hemenka animoak ematen aritu diren hamaika guraso. Mila esker guztioi, zuek egin duzue eta posible herriko gaztetxoen ilusioa eta kirolerako gogoa asebetzea.

Larunbatean, hilak 19, jokatu ziren finalak. Nesketan TXIBIRITA eta TXUTXIFLUTIS izan ziren lehia bizian. Batzuen eta besteen ahaleginak agerikoak izan ziren. Lehenengo zatian Txibiritak izan zen garaile, bigarrenean, berriz, Txitxiflutis. Partida amaieran ados ziren bi taldeak, enpate. Bost minutuko luzapena jokatu zuten eta horretan ere indarrak parez pare izan zituzten eta enpate bukatu zuten luzapena ere. Azkenean penalti puntuko jaurtiketek erabaki zuten norgehiagoka eta TXIRIBITA izan genuen txapeldun. Ikuskizun paregabea eskaini zuten bi taldeek. Zorionak bi taldeko jokalari guztiei.

Nesken partida bukatu ondoren, mutilena jokatu zen. Horretan MARIA ETA JOSE B eta MATXAKERRAK izan ziren nor baino nor. Mutilen kategorian ere oso final estua ikusi ahal izan genuen. Lehenengo zatian  indarrak oso parekatuak izan ziren, momentu batzuetan talde batek hartzen zuen aurrea markagailuan eta hurrengoan besteak. Azkenean enpate, ados, bukatu zuten lehenengo zatia. Bigarrenean Matxakerrak taldekoen beheraldia aprobetxatu zuten Maria eta Josekoek  markagailuan aurrea hartzeko eta garaile izan ziren, txapeldun. Partida lehiatua eta estua eskaini ziguten bi talde horiek ere. Zorionak bioi!

Finaletara bi talde bakarrik iristen diren arren, goraipatu nahi dugu talde guztiek egin duten lana eta erakutsi duten jarrera ona. Beste behin ere, talde-lana, elkartasuna, parte-hartzeko gogoa, ahalegina eta kiroltasuna izan ditugu nagusi ,eta kirola, eskubaloia kasu honetan, izan da garaile.

Eskerrik beroena parte hartu duzuen guztioi. Aurrerantzean badakizue eskubaloi-eskola martxan dagoela eta ateak zabalik dituzuela eskubaloian ibili nahi duzuen guztiok.