Pulpoeskubaloia

 Joan den astean Zarautzen aurka galdu ostean (33-27), Alex Olidenen mutilek Nafarroako Beti-Onak taldearen aurka garaipen handia lortu zuten 34-29, hasiera-hasieratik nagusitasun sendoa erakutsiz.

Nafarrak jaitsierako postuetan egonik puntuen behar handiarekin iritsi ziren Zumaiara. Etxekoentzat aldez aurretik oso konplikatua zen partida, izan ere Alex Olidek baja asko zituen eta kanpotarrak jaitsiera postuetatik ihes egitea zuten helburu. Zumaiarren aldetik ezin izan zuten jokatu lehen taldeko Peñalbak eta Iriondo bi atezainek, lesionaturik zeuden Hernandez eta Ibon Sasiain bi piboteek eta Leibar hegaleko jaurtitzaileak. Pulpo 12 jokalarirekin aurkeztu zen, tartean lesionaturik zegoen Peñalba atezaina eta bigarren taldeko hiru gazte, Izaga, Ioritz Sasian eta Manterola atezaina. Guztiek jokatu zuten eta garaipenean ondo lagundu zuten.

Partida etxekoen domeinuarekin has izen eta berehala zabaldu zuten tartea markagailuan, eta atsedenera 21-14 aurretik iritsi ziren. Bigarren zatiaren hasieran nafarrek gogor hartu zituzten zumaiarrak eta abantaila hiru goletara murriztu zuten. Dena dela, Alex Olidenen mutilek ongi eutsi zioten abantailari eta partida amaieran 34-29 irabazi zuten etxekoek.  

Garaipen honen ondoren zumaiarrak zazpigarren dira sailkapenean 24 punturekin, aurretik Arrate, Zarautz eta San Antonio daude 27na punturekin liga amaitzeko bi jardunaldiren faltan. Hurrengo jardunaldian Pulpo Salamancara joango da sailkapeneko hirugarrenaren aurka jokatzeko, nahiz eta aste honetako porrotaren ondoren Salamancarrek ez duten aukerarik bigarren sailkatua harrapatzeko.  

Pasa den jardunaldian Pulpo B emakumezko kadete taldeak Leizaranen  aurka 33-25 lorturiko garaipena da emaitzarik aipagarriena. Jardunaldi honen ondoren Juan Manuel Chinchillak entrenatzen dituen neskek, zortzi jardunaldi galdu gabe egin ondoren, Federakuntzaren Garaikurra irabazi dute. Jokatutako partida guztiak irabazi dituzte, 214 gol sartu eta 140 besterik ez dituzte jaso. Zorionak!

Oraingo honetan Alex Olidenen mutilek puntu bat galdu zuten azken unean, epaileek kanpotarren alde penalti bat agindu zutenean denbora amaiturik zegoela.
Oso partida arraroa izan zen. Partida hasi bezain laster etxekoek erasoari ekin zioten eta 15. minuturako 12-3 jarri ziren aurretik. Handik aurrera erasoan asmatu ezinik hasi ziren eta nafarrek, berriz, pixkanaka aurrera egin eta atsedenera iristerako aldea dezente murriztu zen, 15-12. Bigarren zatian golak bi aldeetan banatu ziren, gorritxoek bigarren zatiaren erdira arte agindu zuten, baina handik aurrera Zizurkoak bi aurretik jarri ziren. Azken minutuetan etxekoek zaleen laguntza handiari esker, kontrako aldeari buelta eman eta minutu baten faltan 25-23 aurretik jartzea lortu zuten. Nafarrek abantaila berdintzea lortu zuten, eta etxekoen azken jokaldian epaileek erasoan hogeigarren falta adierazi zuten. Azken baloia kanpotarrentzat zen eta nola edo hala hegalekoari eman zioten baloia, honek Iriondo atezainari jaurti zion. Orduan, epaileek penaltia agindu zuten, eta jakina, Arrieta bi minututarako kanporatu zuten. Kanpotarrek penaltia sartu eta puntu batek ihes egin zuen Zumaiatik Nafarroara.
Sumofic Pulpok gora egin du eta sailkapenaren seigarren postuan dago 21 punturekin, Arrate eta Ereintzaren aurretik. Zumaiarren aurretik San Antonio eta Zarautz daude 23 punturekin. Datorren astean Zumaiarrak Bizkaira joango dira Trapagaranen aurka jokatzeko. Bizkaitarrek ez daramate denboraldi ona eta zuloan sartuta daude 9 punturekin.
Bestalde, Asador Basusta Pulpo nesken taldeak galdu egin zuen Zarautzen taldeko liderraren aurka, 26-20. Jardunaldiak aurrera egina hala, Xabier Letamendiaren taldeak progresio handia egin du eta lehen fasea amaitu denean zazpigarren daude sailkapenean. Decotena Pulpok ere galdu egin zuen Pasaian Donibaneren aurka 28-26.

Alex Olidenen mutilek ez zuten inongo aukerarik izan Torrelavegan mailako lider sendoaren aurka, eta 42-28 galdu zuten. Zumaiarrek 5 minututan heldu zioten berdinketari, 3-3 berdinaketa arte hain zuzen, eta handik aurrera etxekoak abaintaila handitzen hasi ziren kontraeraso azkarren eta geldikako erasoan egindako jaurtiketa gogorren bidez. Atsedenera 24-13 iritsi zen, etxekoek garbi agintzen zutela erakusten zuen markagailuak. Bigarren zatian ez zen ezer aldatu, eta bi taldeek minutuak ematen hasi ziren jokalari guztiei. Zumaiarrek itxura gorde zuten eta 18 eta 15eko partzialarekin amaitu zen partida.

Partida honen ondoren Pulpo zortzigarren postuan da 20 punturekin, seigarren eta zazpigarren diren Ereintza eta Arraterekin puntutan berdinduta. Aurretik San Antonio dago 21 punturekin, eta hauen aurretik Zarautz 23rekin.

Jardunaldi hau nahiko txarra izan da zumaiako taldeentzat, porrot ugari jaso dira, nahiz eta senior mailako gizonezkoen Decotena Pulpok garaipen bikaina lortu sailkapenean lider den Zarautzen aurka (36-31). Etxekoen aldetik geldiketa ugari eginda Manterola atezaina izan zen onenetako bat, eta baita Mikel Aparicio hegalekoa ere, 13 gol sartu zizkien zarauztarrei. Garaipena lortu arren, zumaiarrak ez dira jaitsiera postuetatik atera Egiak ere irabazi egin baitzuen, baina oraindik salbatzeko aukera zumaiarren esku dago. Sailkapenean Urnietako da azkena 0 punturekin eta ondoren Iñaki Sorazuren zumaiarrak 12 punturekin. Jaitsiera postuetatik kanpo daude Egia eta Irungo Gazteak 13na punturekin eta Soraluze 14 punturekin.

Beste garaipen bat kadeteek lortutakoa da, Pulpo B taldeko mutilek amaiera arte erabaki ez zen oso partida berdinduan 38-37 irabazi zioten Zarautz B taldeari. Azkenik, infantiletan Pulpo B taldeko mutilek 21nako berdinketa lortu zuten Egia taldearen aurka. Gainontzeko emaitzak porrotak izan ziren.

Alex Olidenen mutilek kanariar irletan garaipena lortu ondoren, ez zuten aukerarik izan TID San Antonioren aurka eta 30-37 galdu zuten Lubakin.
Denboraldi honetan Pulpok etxean galtzen duen bigarren partida da. Min eman duen porrota izan da, izan ere nafarrek elkarren arteko bi partidak garaitu dituzte, eta sailkapenean puntu bakar batera jarri dira.
Partida ez zen gaizki hasi, bi taldeek ez zutela defendatu nahi ematen zuen eta eraso guztiak golean amaitzen ziren. Lehen zatiaren 10. minutura 10-8 harrigarri batekin iritsi ginen; handik aurrera hasi ziren jaurtiketetan akatsak eta atezainen geldiketak. Kanpotarren defentsak 4-2koa erabiliz etxekoen defentsa ustekabean harrapatu zuen, eta eraso estatikoan arazo asko sortu zizkien zumaiarrei. Hala ere, etxekoak lehen zati osoan aurretik mantendu ziren abantaila txikiekin, baina tarterik ireki gabe. Atsedenean 17 eta 16 zen markagailuan.
Bigarren zatian nafarrak hasi ziren agintzen, eta berehala 5 goletako errenta lortu zuten. Etxekoek mixta bat egin zioten geldiezina zirudien Humet-i, baina amaieran 12 gol sartu zituen. Bost minuturen faltan etxekoen erreakzioa iritsi zela ematen zuen, 2 goletara hurbiltzea lortu zuten 29-31, eta jokalari bat gehiagoz. Baina lanik zailena egina zegoela ematen zuenean, partida hankaz gora jarri zen; jaurtiketa aukera kaxkarrak eta baloi-galtze inozoak, eta azkenean, etxeko taldeak etsi egin zuen. Partida amaieran 30 eta 37 markagailuan, egur handia Pulporentzat, partida azken markagailua baino berdinduagoa izan baitzen.
Porrot honen ondoren Alex Olidenen mutilek laugarren postua mantentzen dute 18 punturekin, jarraian dituen San Antonio eta Zarautz baino puntu bat gehiago. Datorren astean zumaiarrak Loiura joango dira Urdaneta taldearen aurka jokatzeko. Bizkaitarrak sailkapenaren erdi aldean daude 12 punturekin, azken partidan Sorian gol bakar batez galdu ondoren.
Bestalde, gizonezkoen senior mailako bigarren taldeak, Decotena Pulpok, garaipen garrantzitsua lortu zuen Irunen Irungo Gazteak taldeari 30 eta 32 irabazi ostean. Garaipen honi esker, jaitsiera postuetatik irteteko bi puntura jarri dira, Egia taldearen atzetik. Jubenil mailako gazteek ere oso garaipen garrantzitsua lortu zuten Askartzari 31 eta 29 irabazi ondoren, eta bigarren fasean jokatzeko aukera asko dituzte, Euskadiko Txapelketan aritu ahal izateko. Azkenik, partida oso berdindua jokatu ondoren, Basusta Erretegiko neskek 24nako berdinketa lortu zuten Elorrion

st1:*{behavior:url(#ieooui) }

Zailtasunak zailtasun, meritu handiko garaipena lortu du Sumofic Pulpo K.E. eskubaloi taldeak Tenerifen bertako La Laguna taldearen aurka.  Ostiralean goizeko 5etan irribarreak ziren nagusi 30 laguneko espedizioa Bilboko aireportura abiatu zenean. Barajasen 24 orduko atzerapena jasan beharra izanagatik ere, irribarreak ziren artean ere nagusi azkenean Kanarietako irlara eramango zituen hegazkina aireratu zenean.

Irribarrea bai, baina baita kontzentrazioa ere. Lo laburra, zenbait jokalariren gripe puntua, partidura jokatzera denboraz juxtu juxtu ailegatu izana, ez ziren oztopo izan partidua hasi zenean erabateko kontzentrazioa erakusteko.

Lehen zatia ia borobila izan zen, hasierako tanteo minutuen ondoren erasoan kanpoko jaurtiketeei esker eta defentsa trinkoa aprobetxatuz zenbait kontraeraso burutu izanak bost goleko abantaila eman zieten zumaiarrei atsedenaldirako (13-18).

Bigarren zatian gauzak bide onetik jarraitu zuen. Hamargarren  minuturako 7 goleko abantaila zutenean, zailtasunak etorri ziren. Etxekoen defentsa gogorra, arbitroen zenbait erabaki okerrek eta tentsio puntua pixkanaka galdu izanak abantaila gutxika murriztera eraman zuten, hiru minutuen faltan gol bakarrekoa izateraino (28-29). Bazirudien garaipena arriskutan zegoela, baina orduan azaldu zen jokalarien kontzentrazioa eta irabazteko grinak gauzak bere onera ekarri eta azkenean 28-31eko emaitza markagailuan finkatzeko.

Azken unean tentsio handiko egoera bizi izan zen baina kontzentrazioak lagundu zuen irribarrea mantentzeko garaian.

Orain irribarrea izango da nagusi asteartean (hilak 13) 30 laguneko espedizioa Zumaira bueltan etorri arte.

             Aurten Gabonetako oporretan gure jokalari gazteenak, alebinak, infantilak eta kadeteak, neska eta mutilak  zenbait lehiaketatan hartu dute parte Usurbilen, Urnietan, Errenterian, Arrasaten eta Oñatin. Gogo handiz jardun dira jokalari guztiak eta oso emaitza onak lortu dituzte. Kadete mutilak nagusi izan dira Arrasaten,  alebin mutilak ere garaile izan dira Errenterian; infantil eta kadete neskak finalera iritsi eta partidu onak jokatu arren, bigarren izan dira Urnietan  eta Errenterian. Gainerako jokalari guztiak ere, finaletara iritsi ez arren, gogotsu aritu dira eta oso goian utzi dute klubaren izena. Zorionak guztiei!

             Abenduaren 21an jokatu ziren Lubaki kiroldegian aurtengo eskola kiroleko azkeneko partiduak. Aurten ere Zumaiako, Zestoako eta Aizarnazabaleko 400 inguru neska-mutilek hartu dute parte eskubaloian. Alebin mailan 9 neska talde eta 10 mutil talde izan dira eta benjamin mailan 9 neska talde eta beste 9 mutil talde. Hilaren 21ean izan ziren finalak. Oso giro ederrean jokatu ziren eta kiroltasun handiz lehiatu ziren bai neskak bai mutilak. Nesken kategorian Zestoa A eta Wakamoliak izan ziren aurrez aurre eta zestoarrak nagusitu ziren. Mutilen kategorian zumaiarrak izan ziren aurrez aurre, Txoixo muturra eta You Riding, eta mutilen artean Txoixo muturra taldea izan zen garailea. Zorionak zestoarrei eta Txoixo Muturra taldekoei, Zorionak baita ere parte hartu duten jokalari, entrenatzaile eta epaile guztiei; izan ere, haiek egindako lanari esker burutu ahal izan dira partiduak. Hemendik aurrera nahi duten neska-mutilek aukera izango dute, eskola kirolean parte hartzeaz gain, eskubaloiko eskolara etortzeko eta ikasteaz gainera jolasean gozatzeko. Zorionak parte hartu duzuen guztioi eta hurrengo urtera arte.

SUMOFIC PULPO K.E.-REN  GARAIPENA SALAMANCA-REN AURREAN
  
           Partida erritmo handiz hasi zen, Salamancakoek irabazteko asmoa erakutsi zuten hasiera-hasieratik, eta etxekoak partidaren lehen minutuetan zalantza handiekin eta aukera gutxi sortuz. Salamancakoen defentsa irekiak akats ugari eta jaurtiketa okerrak eragin zituen erasoan eta etxekoen 5-1 defentsak huts egiten zuen Salamancakoen jokoaren eta pibot onaren aurrean. Bisitariak berehala hasi ziren aldea hartzen eta 5 eta 6 goletako errenta lortu zuten. Etxekoen aldetik 6-0 defentsara aldaketa egin zen eta handik aurrera Salamancak askoz ere arazo handiagoak izan zituen erasoan. Hala ere, gure erasoa ez zen eraginkorra eta ezinezkoa egiten zitzaigun markagailuan hurbiltzea. Horrela, bada, 5 goleko abantailarekin iritsi ginen atsedenaldira, 10-15.                                                                                                                                                                                  Atsedenaldiaren ondoren partidak berdin jarraitu zuen, eta zenbait unetan are okerrago, Salamancakoek aldea handitzea lortu zuten eta 7 goleko abantaila izatera iritsi ziren. Oker zihoan partida etxekoentzat, defentsan hobera egin bagenuen ere erasoan ez genuen asmatzen. Bigarren zatiaren 10. minututik aurrera aldea murriztuz hasi ginen, eta Salamancakoen kanporaketa bat aprobetxatuz aldea 3 goletara gutxitzea lortu genuen. Handik aurrera etxeko taldeak gora egin zuen, erasoan jokoa argiagoa zen, defentsa oso sendo agertu zen (atezainen,  Iriondo eta Peñalbaren partida handia), eta batez ere, zaleek asko animatu zutelako, baita zazpi golez galtzen genuenean ere.                                                   Partida amaitzeko 5 minuturen faltan 1 gora jarri ginen, eta hortik amaiera arte berdinketak eta gol bateko aldea etxekoen alde; baina 30 segundo falta zirela markagailuan berdinketa genuen 28na eta baloia Salamancakoen alde. Beste behin, bihotzekoa dutenentzat gomendagarria ez den amaiera (egunen batean zerbait larria gertatzeko ere!). Hamar segundoren faltan kanpotarrek jaurtiketan huts egin zuten, Iriondok baloia hartu, bi hegalekoak kontraerasora atera, atezainaren pase bikaina eta azken segundoan Gutierrezek garaipenaren gola sartu zuen bozina jotzen ari zela!!! Pozak gainezka egin zuen Lubakin, talde osoa goleatzaileari besarkatuta eta beste bi puntu etxekoen alde. Sumofic Pulpo K.E.-ak laugarren postuan jarraitzen du 16 punturekin, Zarautz, San Antonio eta Ereintzaren aurretik, hauek 13 punturekin. Aurretik Salamancarrak hirugarren dira 18 punturekin, eta bigarren Senda Viva Tudelarrak 20 punturekin. Lider sendo jarraitzen du Torrelavegak 24 punturekin.                                                                                                     Taldeak harmailetatik jaso zuen laguntza eskertu nahi du, beste behin ere oso ondo portatu ziren zaleak, kiroldegia leporaino bete zen eta unerik zailenetan ere ez zioten animatzeari utzi. Etxeko taldearentzat partida bigarren zatiko hamargarren minutuan amaitu zitekeen (10-17), baina Pulporen ezaugarri nagusia azken unera arte borroka egitea da, izan ere, talde honek ez du inoiz partida galdutzat ematen. Horren erakusgarri Lubakin jokatu diren azken hiru partidak dira, Trapagaran, Zarautz eta Salamancaren aurka ia partida osoan zehar markagailuan atzetik joan arren, partidak garaitzea lortu da.   

Garaipen handia zumaiarrek lortutakoa (30-28) eskualdeko arerio nagusiaren aurka. Partida oso berdindua agertzen zen, bietako edonor aurkezten zen irabazteko aukerekin. Garaipen handi honi esker Alex Olidenen mutilak bosgarren jarri dira sailkapenean 12 punturekin, laugarren diren zarauztarrak eta seigarren den Antonianoren filialak adina.

Partida hasieran kanpokoek agintzen zuten, izan ere etxekoen urduritasuna nabaria zen. Bosgarren minuturako kanpotarrak 1-4 ziren aurretik. Minutuak aurrera egin ahala, gorritxoek abantaila murriztea lortu eta lehen zatiaren erdialderako 7-6 jarri ziren aurretik. Hortik aurrera eta lehen zatiaren amaiera arte berdinketak bata bestearen atzetik etorri ziren, eta horrela atsedenaldira 14nako berdinketarekin iritsi ziren.

Bigarren zatiaren hasieran etxekoak oso indartsu atera ziren. Bost minututan 5-0ko partziala egitea lortu zuten eta markagailuan 19-14koa jarri zuten zumaiarren alde. Handik aurrera gorritxoen nagusitasuna erabatekoa izan zen, zarauztarrek ezin zuten zumaiarren defentsa hautsi eta erasoan kamuts aritu ziren. Bigarren zatiaren lehen 15 minutuetan zarauztarrek 4 gol baino ez zituzten lortu eta hortxe lortu zuten etxekoek abantailarik handiena, 24-18. Zarauztarren entrenatzaileak denbora eskatu behar izan zuen, eta handik berehala aldea murriztea lortu zuten. Hamar minuturen faltan kanpotarrak gorantz zetozela zirudien, eta 26 eta 23koarekin Alex Olidenek denbora eskatu zuen. Handik aurrera etxekoek ondo kontrolatu zuten partida, eta amaieran kanpotarrek markagailuan zertxobait gerturatzea lortu zuten epaileak erabaki zorrotz baten ondorioz Ion Rubio kaleratu zuenean. Partida amaieran 30-28 etxekoen alde.

Lubaki kiroldegia leporaino bete zen, etxeko zaleak oso motibaturik etxekoak animatuz. Garaipena lortzeko oinarrietako bat izan zen.

Sumofic Pulpo K.E.-ren aldetik ondorengoek jokatu zuten: Ibon Sasiain, Sagasta, Aizpurua (1), Gutiérrez (1), Agirre (3), Ioritz Sasiain, Peñalba, Hernández (3), Uribeetxeberria (6), Arrieta, Iriondo, Ugarte, Rubio (9) eta Leibar (7).

Sumofic Pulpo K.E-ak 34-27 irabazi zion Trapagaran-i Lubaki kiroldegian. Alex Olidenen mutilak 40 minutuz atzetik joan ziren markagailuan baina galdutzat zuten partida irabaztea lortu zuten.

Partidaren hasieran berdintasun handia izan zen eta 10. minutura arte berdinketa izan zen nagusi. Handik aurrera kanpokoek aurrea hartu eta 4 goletako aldea izatea lortu zuten lehen zatiaren erdialdean. Zumaiarrek jaurtiketa garbiak huts egin zituzten lehen zatiaren amaieran eta horrela atsedenaldira markagailuan 13 eta 17koarekin iritsi ginen kanpotarren alde. Bigarren zatiaren hasiera ere ez zen ona izan etxekoentzat, izan ere 37. minuturako kanpotarren aldeko abantaila handitu egin zen, 15-21. Handik aurrera etxekoek gora egin eta bost minututan jokalari bat gehiagoz arituz partida berdintzea lortu zuten. Bigarren zatiaren erdialdera kanpotarren abantaila gol batekoa zen, 21-22. Zenbait minututan berdinketa izan zen nagusi, baina berehala kiroldegia bete zuten zaleen laguntzari esker etxekoek gora jo zuten eta partidan lehen aldiz aurrea hartzea lortu zuten markagailuan. Zumaiarrek erakutsi zuten jokoaren indarraren aurrean kanpotarrek etsi egin zuten eta partida amaieran Alex Olidenek zuzentzen dituen mutilek 34-27 garaitu zituzten Trapagarangoak.    

Garaipen honi esker zumaiarrek aurrera egin dute sailkapenean eta 9 punturekin seigarren jarri dira, puntu berak dituen Ereintzaren aurretik. Zarauztarrak daude etxekoen aurretik 10 punturekin, eta hain zuzen ere, bi jardunaldi barru elkarren artean jokatuko dute Lubaki kiroldegian. Datorren astean, Sumofic Pulpok Eibarko Ipurua kiroldegian jokatuko du larunbat arratsaldean Arrateren aurka.

Sumofic Pulpo K.E.-ren aldetik ondorengoek jokatu zuten: Sagasta (1), Aizpurua (4), Gutiérrez (9), Agirre (5), Ioritz Sasiain, Peñalba, Hernández (2), Uribeetxeberria (2), Arrieta (1), Iriondo, Ugarte (2), Rubio (7) eta Leibar (1).